> Vila de Cruces|Outubro 2024

Desde mediados de setembro Vila de Cruces comparte pediatra con Silleda

> Redacción

O Concello de Vila de Cruces vén de remitir este mes de outubro á Xerencia da Área Sanitaria de Santiago E Barbanza, da Consellería de Sanidade, un escrito no que o goberno local reclama da autoridade sanitaria da Xunta de Galicia “a restauración inmediata” do servizo de pediatría a xornada completa do municipio. Desde o concello aseguran neste escrito que actualmente esta atención sanitaria “estase a ver comprometida” polas últimas decisións a respecto de persoal médico de pediatría adoptadas desde o Sergas.

Denuncia o goberno de Luís Taboada que até o pasado mes de setembro o centro de saúde de Vila de Cruces tiña un servizo de pediatría a tempo completo para atender ás 512 crianzas entre 0 e 16 anos usuarios desta atención sanitaria. A mediados do pasado mes de setembro, segundo explica no seu escrito o Concello, a Consellería de Sanidade reduciu esta atención pediátrica en Vila de Cruces a só dous días á semana.

Recorte drástico

Critican que diante da baixa médica dunha pediatra do veciño concello de Silleda, o Sergas optara por mermar este servizo en Vila de Cruces e compartilo con Silleda, no canto de substituír á pediatra de baixa por outra. Deste xeito o que acontece na práctica desde mediados de setembro é que nin os 512 nenas e nenos de Vila de Cruces nin os 1.000 de Silleda contan cun servizo sanitario de calidade e igualitario co de outros territorios.

Desde o goberno local de Vila de Cruces critican no seu escrito que “os prexudicados” destas decisións son os pacientes que demandan atención pediátrica nos dous concellos.

Cualifican coma “un recorte drástico” a decisión tomada polo Sergas e consideran “unha necesidade urxente” que Sanidade reestableza o servizo pediátrico completo que até o de agora tiñan as familias en Vila de Cruces, xa que agora se dan casos de desprazamentos de até 35 minutos para levar ás crianzas cruceñas até o centro de saúde de Silleda para seren atendidas. 

Música e cultura enchen o outono cruceño

> Redacción

O Concello de Vila de Cruces xa anunciou as datas de celebración da agardada XIII edición do Crucesarte, unha cita coa creatividade e as artes plásticas que cada ano desperta máis interese entre a veciñanza e entre a creatividade artística de toda a comarca. Este ano o Crucesarte encherá de cultura, obras e público o auditorio Xosé Casal os días 30 de novembro e 1 de decembro. A cita artística por excelencia de Vila de Cruces agarda seguir aumentando a súa popularidade entre a veciñanza de todo o Deza. O ano pasado, na XII edición, o Crucesarte celebrouse os días 25 e 26 de novembro e contou cunha exposición de artes plásticas de máis de vinte artistas, aos que se sumaron tamén obras procedentes de A Solaina de Piloño, as alumnas dun curso de bolillos en Piloño e doutro de palla da Asociación de Mulleres Rurais de Camanzo. Para a edición deste ano o Concello de Vila de Cruces está xa a traballar para seleccionar aos participantes e a programación.

Programación de outono

A chegada do outono a Vila de Cruces veu acompañada dunha intensa actividade cultural, o Festival de Outono contou o pasado 26 de outubro cun concerto da Coral Polifónica de Piloño no Auditorio Xosé Casal. Tamén este mes de outubro a Coral San Salvador de Camanzo celebrou o seu 25 aniversario, o pasado 12 de outubro no Mosteiro de Camanzo e coa participación do Coro Vales Mahía da Bandeira e o Grupo Vai Nela de Salgueiros. Tamén o Museo da Minaría de Fontao leva este outubro un intenso mes de visitas e actividades. Hóspedes do Hotel Balneario Baños da Bra visitaron este enclave fundamental da historia da minería na zona e tamén pasaron por Fontao os alumnos do Ciclo de Guías de Actividades no Medio Natural e Tempo Libre do IES Terra de Turonio de Gondomar. A estas actividades sumouse tamén o teatro de AsSircópatadas, Sirco de Balde, que acolleu o auditorio cruceño o pasado 20 de outubro.

A xornada puxo en valor o pasado, presente e futuro dun oficio

> Redacción

A zoqueira de Vila de Cruces, Elena Ferro, foi este mes obxecto dunha das cartografías coas que o Consello da Cultura galega (CCG) repasa a traxectoria, evolución e os logros de artesáns do país que teñen posto en valor os seus oficios e os produtos de calidade que seguen a poñer no mercado con valor engadido. Elena Ferro, premio nacional de Artesanía no 2019, é un dos expoñentes desta artesanía galega e dende o seu Obradoiro na parroquia cruceña de Merza ten provocado unha remozada vida a un oficio coma o dos zoqueiros, sen o que non se entendería a historia de Galicia.

 “Antes de zoqueira fun feiranta e as feiras foron a miña universidade” dixo Elena Ferro na entrevista que a xornalista Marga Pazos lle fixo no marco da xornada “Elena Ferro: Creatividade e arte na pel”. Unha cita organizada polo Centro de Documentación en Igualade e Feminismos (CDIF) do Consello da Cultura Galega (CCG) que puxo o foco no traballo das artesás.

Capacidade de transformación

A presidenta do CCG, Rosario Álvarez, destacou a Elena Ferro “singularizando nela que detrás de mulleres singulares hai outras redes de homes e de mulleres que permitiron a capacidade de transformación da artesanía aos novos tempos, do deseño tradicional aos novos mercados”. Na xornada, Ferro lembrou que “o meu lugar dos xoguetes era o obradoiro”. Na súa intervención lembrou o proceso de transformación do seu obradoiro e fixo un percorrido pola historia familiar. Unha circunstancia que avanzou Briggitte Vasallo no inicio da xornada. “Non poderiamos entender a Elena Ferro sen a casa na que naceu” apuntou Vasallo.

Contrapuxo a figura do promotor urbano fronte a mulleres como Elena Ferro que evocan “outro xeito de estar no mundo”. Destacou que “fixo cousas que a modernidade industrial se encargou de dicirnos que non era posible, demostrou que se podía traballar dende o lugar que non é cidade e o que fai Elena non é traballo, é un labor”.