> Vila de Cruces |Xuño 2023

Xuntos ten 6 concelleiros, o PP 4 logo de perder 2, o BNG 2 (un menos), Nova Alternativa 1 edil e o PSdeG queda sen representación

> Redacción

As eleccións municipais de maio deixaron en Vila de Cruces 6 concelleiros para Xuntos de Luís Taboada, tres máis dos que tiña; o PP de Jesús Otero perdeu 2 concelleiros e quedou con 4; o BNG de Álex Fiuza ten un edil menos e conta con 2 concelleiros na corporación e entra cunha acta Manuel Souto de Nova Alternativa. O PSdeG finalmente quedou fóra da nova corporación local. Así as cousas, e logo de algunha tentativa de pactos e acordos a varias bandas, finalmente Luís Taboada é de novo alcalde de Vila de Cruces, con tres concelleiros máis que no pasado mandato, pero un goberno en minoría de novo.

Será o segundo mandato de Taboada á fronte do goberno local cruceño. Foron moitos os veciños e veciñas que asistiron o pasado 17 de xuño ao pleno de investidura, e outros moitos os que o seguiron por youtube. Dende a medianoite do 28 de maio houbo reunións e ofertas cruzadas para argallar unha maioría alternativa a Taboada, pero só un acordo a tres bandas sumaba, e o feito de que Nova Alternativa é unha escisión do PP de Otero e o BNG ten liñas vermellas claras ao respecto, impediron chegar a acordo algún. Tampouco Nova Alternativa quixo apoiar a Xuntos por estar en desacordo coa súa xestión no pasado mandato.

Así as cousas no pleno a candidatura de Xuntos obtivo 6 votos. O PP deu a sorpresa pasando Otero o papel de candidato á súa número 2, Vanesa Trigás, o BNG declinou presentar candidatura e Nova Alternativa presentou ao seu único edil. Os 2 votos nacionalistas foron en branco, o resto votáronse a si mesmos, e o elixido alcalde foi Luís Taboada, a lista máis votada nas eleccións.

Conformaron a mesa de idade o propio Luís Taboada e coma a máis nova Mireya Otero, ambos de Xuntos. Os novos concelleiros da corporación prometeron o seu cargo, agás Jesús Otero e Delfina Carrera que escolleron a fórmula do xuramento. Ademais os dous concelleiros do BNG, Álex Fiuza e Carlota Salgado, fixeron a súa promesa do cargo coa man nun exemplar de Sempre en Galiza de Castelao.

Traballar e traballar

Logo da votación o alcalde electo pronunciou un breve discurso no que agradeceu aos grupos da oposición o seu traballo nos últimos 4 anos no consistorio, un mandato que definiu o alcalde coma “bastante fluído” aínda que acabou apostilando que “houbo algo de tensión”. Taboada puxo en valor o traballo dos seus compañeiros no pasado mandato destacando que “foi unha batalla moi continua e sería imposible levar un concello sen concelleiros así”. Co bastón de mando de novo no seu poder cara aos vindeiros catro anos, Luís Taboada asegurou que por diante queda “traballar, traballar e traballar, que temos moito que facer” e pediu o “esforzo” de todos para que os vindeiros catro anos sexan os mellores para Vila de Cruces. O pleno rematou cunha sonora ovación ao novo goberno municipal dun abarrotado salón de plenos.

Ofertas do PP

Logo de ser investido alcalde de novo Luís Taboada, o PP de Otero enviaba un comunicado aos medios lamentando que as súas ofertas de pactos non tiveran acollida nin en Nova Alternativa nin no BNG. Segundo explican os populares, ata o último momento ofreceron os seus 4 votos para que o partido de Souto e o BNG “se puxeran de acordo” e arrebatarlle ao rexedor de Xuntos polo noso Concello o bastón de mando.

Nin BNG nin Nova Alternativa valoraron esta oferta de Jesús Otero, que logo da investidura criticaba duramente que “estes dous partidos non souberon aproveitar nin poñer en valor va xenerosidade do PP”. Otero destaca que o PP “segue a ser o principal partido da oposición en Vila de Cruces neste mandato e lamenta que logo de poñer os seus edís a disposición para impulsar un entendemento entre Nova Alternativa e o BNG “non souberon estar á altura das circunstancias” xa que o PP considera que eran estes dous partidos “os que tiñan a responsabilidade de entenderse e conformar un goberno de coalición”.

Os eólicos na axenda

O mandato en Vila de Cruces comeza coa publicación no DOG este mes de xuño da concesión de autorización administrativa previa e de construcción das instalacións do parque eólico Mesada, promovido por Aldesa Energías Renovables de Galicia SL. Os trámites deste proxecto comezaron en 2010, e foi exposto ao público en 2012. A tramitación ambiental rematou en decembro de 2020, ao ano seguinte actualizouse toda a documentación con informes de varios departamentos da Xunta. O proxecto contempla para este parque unha potencia de 11 MW e un orzamento de 9,6 millóns.

O goberno de Xuntos en Vila de Cruces xa presentou no anterior mandato alegacións aos distintos proxectos de eólicos que afectan ao municipio. 

O alcalde desminte as críticas do PP e aporta un informe da interventora que o avala

> Redacción

A pouco menos dunha semana do comezo deste mandato o goberno de Vila de Cruces asegura que as arcas municipais contan con 3 millóns de euros en positivo. Luís Taboada quixo saír ao paso das críticas do PP á situación financeira do concello, asegurando que “os números non minten” e aportando ademais un informe da interventora que avala estas cifras. Segundo o arqueo da contabilidade local, a día 15 de xuño de 2023, as contas bancarias do municipio reflicten un saldo positivo de 1.391.027,43 euros, “o que demostra unha sólida xestión financeira durante o últimos catro anos”, afirma Taboada.

Dende o goberno de Xuntos destacan tamén que o remanente de tesourería actual sitúase en case 400.000 euros, “o cal indica un equilibrio económico considerable”. A esta cantidade débense sumar os fondos pendentes de recibir por subvencións correspondentes a traballos xa realizados e pagados polo concello, como a implantación de luces LED, pola cal se espera recibir máis de 557.000 euros, e a reforma da rúa Vázquez, pendentes de percibir 363.709,51 euros, a subvención do Plan Concellos do ano 2021 por un importe de 471.313,21 euros “que xa están todos os pagos os provedores e aínda temos pendentes de que o ingresen”.

Ingresos pendentes e facturas

Ademais destaca Taboada que tamén pagou o concello 181.816,63 euros da liña 1 do Plan Concellos do ano 2022 “e teñen que ingresarnos esa cantidade dende a Deputación máis outros 60.000 pendentes de recibir do APROL e do RISGA”, todos eles suman importes pendentes de recibir das administración 1.633.839,35 euros. A esta cifra sumándolle a cantidade que a día de hoxe hai no banco de 1.391.027,43 a cantidade pendente de recibir de subvencións aceptadas que xa están pagadas polo concello, son outros 1.633.839,35 euros “dános un total de saldo positivo de 3.024.866,78 euros”.

Segundo os datos avalados pola interventora, as facturas pendentes de pago do concello ascenden a 15 de xuño de 2023 a 800.476,92 euros. “O que supón que se temos 3.024.866,78 euros, e pagaramos todo o que se debe a 15 xuño que son 800.476,92€. O resultado sería de 2.224.389,86 de saldo nas contas do concello”, explica o rexedor cruceño.