> Agolada |Xaneiro 2023

O edil popular Rafael Méndez e o concelleiro do goberno Manuel García pasan a formar parte do grupo de “non adscritos”

> Redacción

Calquera podería pensar que nun Concello coma Agolada, cun pleno municipal de 7 concelleiros do PAYJ e 4 do PP logo das elección de fai 3 anos non habería moito movemento ata a vindeira cita electoral. Nada máis lonxe da realidade, en apenas tres meses Agolada pasou de ter algo semellante a “bipartidismo” a contar cun grupo de “non adscritos” integrado por 2 concelleiros, un do PP e outro do goberno de Luís Calvo. O pleno deste mes de xaneiro fixo efectiva a creación deste terceiro grupo municipal que integran o ex edil popular Rafael Méndez, e o ex concelleiro do PAYJ Manuel García “Nolito”. Con estes cambios aprobados no pleno deste mes o grupo de goberno do PAYJ pasa de 7 a 6 concelleiros, e o do PP na oposición de 4 a 3. De momento estes cambios na composición do pleno municipal non modifican a maioría da que dispón o alcalde, Luís Calvo. O pleno deste mes volveu rematar con polémica, logo de que o alcalde expulsara da sala a unha veciña, que se negou a saír e foron os 2 concelleiros do PP presentes os que abandoaron o salón de plenos.

Descontentos

O primeiro en inaugurar o grupo de non adscritos no pleno de Agolada foi o ex concelleiro do PP Rafael Méndez. Dende o pasado verán o tamén presidente do colectivo Agolada Rural tivo varios desencontros verbais cos seus compañeiros de filas e coa Xunta de Galicia. O que comenzaron sendo só declaracións públicas remataron mesmo coa ruptura da disciplina de voto por parte de Méndez e finalmente o pasado mes de decembro o PP abriulle expediente de expulsión do partido e él solicitou a Baixa no grupo municipal popular e a súa integración coma non adscrito.

No caso de Manuel García “Nolito”, fai meses que amosou nas rúas de Agolada o seu desacordo co proceder do alcalde e líder do seu partido, Luís Calvo do PAYJ. O propio Manuel García sinala que xa foi o 18 de novembro cando comunicou por escrito a concello o seu abandono voluntario do PAYJ criticando as “débedas” do goberno con empresas locais e asegurando que Luís Calvo “toma decisión sen consultar e só sabe mentir”.

A voceira popular, Carmen Seijas, cifra en 700.000 euros as débedas a proveedores, “ninguén debe máis ca nós”

> Redacción

O PP de Agolada convocou a finais deste mes aos veciños e veciñas de Agolada a unha reunión na Casa da Cultura para facer públicos os datos das finanzas municipais. A voceira e candidata á Alcaldía, Mari Carmen Seijas, detallou as cifras do Concello e dixo que“ lonxe de ser un tema conxuntural os datos que vimos na Conta Xeral do 2021, vemos que se trata dun tema estrutural xa que uns meses despois a débeda aínda se incrementou. Non sei onde imos a parar con este home gastando o que non ten”.

O PP amosouse “moi preocupado” polo devir económico do Concello xa que segundo os datos expostos neste encontro coa veciñanza, ao peche do exercicio pasado “se debían a provedores case 700.000 euros, unha cifra incrible para un Concello do tamaño de Agolada, en relación ao noso tamaño e presuposto, ninguén debe máis ca nos”. Xan a última Conta Xeral os populares lembraron que no peche do ano 2021 o Concello tiña máis de 600.000 euros en débeda e menos de 20.000 euros nas contas bancarias, “algo incrible nun Concello, que nin sequera tiña fondos dispoñibles ante calquera eventualidade que puidera xurdir como unha simple avaría”.

O goberno máis caro

Fronjte á xestión do anterior goberno do PP en Agolada, Seijas explicou que o Goberno do PAYJ tan so mantén 380.000 euros de remanentes, “é dicir dilapidou preto de medio millón de euros de aforro do Concello e aínda así se presenta o balance do ano 2021 con máis de 640.000 euros de débedas aos proveedores e tan so mantiña nas contas bancarias 19.800 euros”. A candidato do PP afirmou que “todo este gasto solo vale para manter o goberno máis caro da historia de Agolada e sen embargo non se lle nota nada ao pobo”. Respecto de onde están eses cartos, Seijas asegurou que “este alcalde non fixo nada que non fora botar un pouco cemento e arranxar uns lavadoiros, pero nada fixo do que prometeu, nin residencia da terceira idade, nin PXOM, nin melloras no polígono, nin captou empresas, e incluso non fixo actuación tan vociferadas por el en campaña como o de dar unha axuda a natalidade, todo o gasta en 4 dedicacións aos seus concelleiros e no salario da súa secretaria que suman neste mandato máis de 467.000 euros, cando o goberno de Ramiro apenas gastaba 209.000 euros, é dicir, máis do dobre”.