> Agolada|Novembro 2024

Veciños de Sesto e Brocos lamentan que a Xunta os deixe fóra deste proceso

> Redacción

O pasado 31 de outubro e logo de varias reunións suspendidas pola Xunta na zona, a directora xeral da Axencia Galega de Desenvolvemento Rural (Agader) e técnicos da Consellería mantiveron un encontro na parroquia de Basadre coa veciñanza, pendente desde fai máis de 20 anos, das concentracións parcelarias pendentes na zona. O día 5 de novembro, segundo Agader anunciou nesa reunión, o Diario Oficial de Galicia (DOG) publicou o estudo previo de inicio para tres concentracións parcelarias en Agolada, as de A Baíña-Berredo-Órrea, Agra-O Sexo-Val de Sangorza e Basadre-Eidián-Ramil.

A directora xeral de Agader explicou á veciñanza neste encontro que a Xunta prevé un investimento conxunto duns 11 millóns de euros entre as tres concentracións. Segundo os datos da Xunta, a de A Baíña-Berredo-Órrea permitirá reordenar 1.359 hectáreas; a de Agra-O Sexo-Val de Sangorza, 1.156 hectáreas; e a concentración de Basadre-Eidián-Ramil afectará a 1.438 hectáreas.

O procedemento agora logo da exposición pública do estudo previo de inicio e coa súa aprobación, a Xunta proporá o decreto de utilidade pública para súa aprobación. En Agolada, segundo dixo a directora de Agader, xa se executaron 13 concentracións parcelarias nunha superficie total de 5.323 hectáreas, o que supón arredor do 36% da superficie total do municipio.

Sesto e Brocos

A Asociación Queremos Parcelarias en Agolada leva anos reclamando a reactivación destes procesos pendentes no municipio, e este anuncio da Xunta de Galicia chega deixando fóra a unha parte dos demandantes destas concentracións, en concreto os veciños e veciñas de Sesto e Brocos, que para o goberno galego quedan fóra das parcelarias e son só ‘susceptíbeis’ doutro tipo de solucións alternativas para a concentración das súas Terras.

A veciñanza destas dúas parroquias expresou no encontro con Agader o seu “desacordo” con esta decisión e lembroulle á Xunta que a veciñanza entregou en tempo e forma o aval de máis do 95% dos propietarios pedindo tamén as parcelarias nestas parroquias. Criticaron que a decisión da Xunta “condena de novo á nosa zona”..

A Plataforma Ulloa Viva pide á Xunta información das análises periódicas do estado do encoro

> Redacción

A Plataforma Ulloa Viva presentou diante de Augas de Galicia unha solicitude dos datos das análises obrigatorias que este organismo da Xunta está obrigado a facer para coñecer e actuar sobre o estado das masas de auga da súa competencia. A Plataforma lembra que é obriga de Augas de Galicia (dependente desde fai uns meses da Consellería de Medio Ambiente) “o seguimento do estado das augas para as augas superficiais continentais (ríos, lagos e encoros)”.

Ulloa Viva pide a Augas de Galicia información das mostraxes e resultados obtidos dentro das campañas da rede de control das augas superficiais do encoro de Portodemouros dos últimos tres anos dispoñibles. Desde a Plataforma Ulloa Viva lembran que o estado desta masa de auga é segundo recoñece a Demarcación Hidrográfica de Galicia-Costa, “peor que bo”. A Plataforma alerta logo de telo comprobado e recibido denuncias da veciñanza da zona, que o encoro de Portodemouros “segue a presentar cor verdoso, tanto na presa como na cola do encoro indicativo de bloom de cianobacterias como soe acontecer ó longo do verán, e cuxa frecuencia e persistencia ó longo do tempo vai en aumento”.

Datos de contaminación

Diante desta “alarmante situación” a Plataforma pregunta a Augas de Galicia da Consellería de Medio Ambiente polas medidas que vai a tomar para que o estado do encoro cumpra coa normativa da UE antes de 2027 “e cando vai comezar a poñelas en marcha”.

Tamén este mes un informe de Ecoloxistas en Acción alerta sobre a alta contaminación por nitratos que sofren as augas superficiais da comarca do Deza. As análises efectuáronse entre os meses de agosto e novembro do 2024, en 80 puntos nunha área de 70 quilómetros cadrados. Os resultados das análise reflicten “unha extendida contaminación por unha alta concentración de NO3. Só un 19% das augas superficiais mostreadas poden considerarse fóra de sospeita de contaminación”, conclúe a análise. Diante destes datos, Ecoloxistas en Acción esixe á Xunta da Galiza que “declare esta comarca como Zona Vulnerable a Nitratos e adopte medidas para preservar a calidade da auga”.