> Agolada|Abril 2026

O proxecto mudará a faciana de parte do centro da vila, combinando espazos de lecer e ocio

> Redacción

O Concello de Agolada vén de anunciar na súa páxina web a consecución dun financiamento de 500.000 euros por parte da Deputación de Pontevedra a través do Plan Provincia Extraordinaria 2025 (Plan Extra) para levar a cabo a execución do proxecto denominado “Recuperación e humanización da Praza Alameda e Brántega e o seu entorno”. O proxecto presentado para esta subvención da Deputación permitirá facer máis diáfano este espazo central no casco urbano de Agolada, con máis espazos verdes e unha apertura aos postos das polbeiras nos días de feira e tamén á zona da contorna do Auditorio Costa Casares.

A aprobación da subvención no caso do Concello de Agolada está condicionada á obtención das correspondentes autorización sectoriais, e contempla ademais unha achega a este proxecto desde as arcas municipais de máis de 88.000 euros. En toda a provincia concorreron a estas axudas máis de 50 concellos, entre os que os finalmente beneficiados por cumplir os requisitos reparten o orzamento total previsto polo organismo provincial para este chamado Plan Extra.

Protección Civil

Tamén a agrupación de voluntarios de Protección Civil de Agolada, recibiu en abril notificación da concesión por parte da Deputación Provincial de Pontevedra, dunha axuda por importe de 5.000 euros que servirá para a adquisición de equipamentos para que os membros da mesma poidan seguir a prestar un inestimable servizo á cidadanía do Concello de Agolada así coma puntualmente a entidades e organizacións de fora do noso termo municipal.

Estas axudas se engloban dentro da convocatoria establecida pola publicación no BOP nº 190 do 06 de outubro de 2025, e os citados 5.000 euros supoñen acadar o importe máximo, polo que dende a Agrupación queremos agradecer esta excelente nova e animar á Deputación a seguir apoiando, non so a nosa, senón a todas as agrupacións da provincia, sendo que os servizos prestados son numerosos e moi necesarios, principalmente en concellos de pouca poboación e moi dispersos.