> Silleda |Decembro 2024

O convenio permitirá poñer en marcha o proxecto de musealización

> Redacción

Permitirá desconxestionar a Avenida Ramón de Valenzuela mellorando o tráfico

> Redacción

O Concello de Silleda finalizou os traballos de adecuación dos novos aparcadoiros na Bandeira, unha actuación clave para mellorar a mobilidade e reorganizar o espazo público neste núcleo urbano, destacan desde o goberno local. Grazas aos convenios asinados con Urbanizacións do Deza e Antonio Domínguez García, xunto co solar cedido pola familia Pichel, logrouse dispoñer dunha ampla zona de estacionamento no corazón da Bandeira, beneficiando tanto á veciñanza como ao comercio e hostalería local ao garantir máis plazas de aparcamiento das que había antes da intervención integral de mellora do centro urbano da vila.

A reorganización do espazo inclúe a modificación do uso do solar cedido pola familia Pichel, inicialmente destinado a xardíns e un skate park, para convertelo en xardíns e aparcadoiro. Este cambio permitirá desconxestionar a avenida Ramón de Valenzuela, mellorando o tráfico nunha das rúas máis transitadas do núcleo urbano.

A futura ubicación do skate park farase noutro solar cedido ao concello, por Dona Carmen Soto Lareo, situado no ámbito da plaza, garantindo así un acceso seguro para a mocidade que o utilice ao estar rodeado de vías de prioridade peonil.

Reorganización na zona

Os contenedores situados na Rúa Ramón de Valenzuela, nos seus primeiros tramos, tamen serán obxecto de modificación, recolocándose no propio aparcamento de Pichel como nas calles peonís adxcentes, para así garantizar máis prazas de aparcamiento na propia vía. “Este tramo ten un altísimo nivel de paso de camións, polo que debemos deixala o máis liberada posible de obstáculos que invisibilicen aos peóns” di a Alcaldesa que incide en que ademais así “se poderán xerar prazas para persoas con mobilidade reducida neste centro urbano”. Os novos aparcadoiros terán un uso limitado durante as feiras e mercados da Bandeira, xa que se atopan na área de celebración. Neses casos, estarán reservados para facilitar o acceso ás persoas visitantes do mercado, segundo explican desde o Concello.

A corporación despediu entre loubanzas ao concelleiro Antonio Ferro

> Redacción

Falaron de contaminación lumínica e influencia dun uso responsable da luz na vida cotiá

> Redacción

O traxecto Lalín-Santiago pasará de 13,4 euros a 3,35 euros

> Redacción

O ministro de Transportes, Óscar Puente, confirmaba este mes de decembro no Senado a execución inmediata do acordo entre PSOE e BNG para que as bonificacións das persoas usuarias da autoestrada AP-53, que une Santiago con Dozón, se aproben no primeiro trimestre de 2025, cun investimento por parte do Estado de 7,6 millóns de euros. Puente respostaba así ao senador lalinense José Crespo cuestionado polas bonificacións da AP-53, e logo de que o BNG adiantara tamén no Senado a data prevista para a posta en marcha destas bonificacións.

A senadora do BNG, Carme da Silva, anunciou o acordo co Goberno do Estado ao respecto das bonificacións de até 75% da AP-53 e a súa aprobación no primeiro trimestre de 2025, haxa ou non haxa novos orzamentos do Estado. Este acordo obedece ao recollido no Acordo de Investidura conseguido polo BNG en 2023.

Aforro para a comarca

Co obxectivo de cumprir o estabelecido no Acordo de Investidura conseguido polo BNG o pasado ano, o Goberno confirmou o compromiso de axilizar as bonificacións para as persoas usuarias da AP-53.

“Acordamos co Goberno que, no primeiro trimestre de 2025, haxa ou non haxa un novo Orzamento do Estado, se aprobarán as bonificacións de até 75% para as persoas usuarias desta autoestrada” dixo Carme da Silva.

“Isto vai supor que unha persoa usuaria da AP-53 que faga o traxecto Lalín-Santiago pasará de pagar 13,4 euros a 3,35 euros”, unha nova moi agardada en toda a Comarca do Deza. O BNG anunciou que “seguiremos a traballar para que tamén esta autoestrada sexa libre de peaxes e galega”. A nova foi recibida con satisfacción en todos os concellos do Deza, con usuarios que sofren as peaxes máis caras de todo o Estado e que teñen criticado tamén a falta de mantemento e a necesidade de melloras neste vial.

> Silleda |Novembro 2024

O concello reuniuse coa veciñanza para presentar o proxecto de reforma e recoller suxestións

> Redacción

O goberno municipal de Silleda continúa a avanzar no seu proxecto global de transformación urbana baixo o concepto do “cinturón verde”, co obxectivo de impulsar un modelo de mobilidade amable, sostible e segura. Este mes de novembro, a alcaldesa Paula Fernández Pena, acompañada do equipo de goberno e do autor do proxecto -en fase de redacción-, reuniuse con veciños e veciñas da Avenida do Parque e doutros puntos da vila para presentar os detalles do proxecto de remodelación da Praza da Igrexa e o seu entorno, así como do tramo correspondente á Avenida do Parque e a Rúa Santa Olaia. Durante o encontro, explicáronse os materiais previstos para a obra, os novos espazos deseñados e as melloras planeadas.

Detalláronse propostas como a creación dunha ampla zona verde con bancos integrados ao principio da avenida, a plantación de novas árbores de gran porte, a reubicación da parada de taxis para optimizar o espazo público, e a ampliación da área da praza mediante a demolición do peche do recinto eclesiástico, o que permitirá crear unha zona con chanzos tipo auditorio.

Cinturón verde

Ademais, informouse á veciñanza de que o proxecto forma parte dun plan global de urbanismo sostible coñecido como “cinturón verde”, que está conectando as principais rúas do casco urbano de Silleda cunha estética unificada e accesible. Este proxecto será presentado oficialmente o día 30 de novembro, consolidándose como unha das iniciativas máis ambiciosas do Concello. No encontro, o goberno local tamén entregou á veciñanza o código QR para acceder a enquisa dixital, permitindo que poidan participar mesmo aquelas persoas que non puideron asistir á reunión. Ademais, o avance do proxecto será publicado na web municipal, onde estará dispoñible a imaxe do plan e a enquisa en liña, para facilitar a consulta e a participación cidadá. A veciñanza valorou positivamente que o Concello optase a unha subvención de 700.000 euros do Plan Extraordinario de Investimentos da Deputación de Pontevedra, á que se sumarán 150.000 euros de recursos propios.

A alcaldesa detallou exemplos de Trasdeza coma a Oficina de Vivenda ou os acordos coa Sareb

> Redacción

A alcaldesa de Silleda, Paula Fernández Pena, participou este mes de novembro na xornada “Avances e boas prácticas nas políticas de vivenda de Galicia”, organizada pola Rede Europea de Loita contra a Pobreza e a Exclusión Social (EAPN Galicia) en Santiago. A alcaldesa destacou a experiencia do municipio coa posta en marcha da Oficina de Vivenda, recoñecida xa, fai dous anos como un exemplo de boa práctica pola EAPN Galicia. Esta iniciativa municipal permite facilitar o acceso á información e ás axudas de vivenda ás persoas interesadas en mellorar a eficiencia enerxética ou a accesibilidade das suas vivendas. Ademais, se coordina co servizo de Benestar Social para achegar estas subvencións as familias en situación de vulnerabilidade, marcando así un modelo que a Rede considera fundamental para ser replicado noutros concellos galegos. Nestes días o personal municipal está informando das axudas do ARI (áreas de rehabilitación integral) vinculadas Camiño de Santiago, polo que cualquera vivenda na zona de afección de esta área pode achegarse a recibir información ao concello.

Loita contra a pobreza

Fernández Pena subliñou a importancia da coordinación entre administracións públicas e o Terceiro Sector para garantir políticas efectivas no acceso á vivenda, un compromiso que é unha prioridade tanto para o Concello de Silleda como para a Rede de Loita contra a Pobreza.

Asemade, na mesa de debate que compartiu cos alcaldes de Ames e Curtis, tamén se falou doutras propostas como o acordo acadado coa SAREB para a construción de 44 viviendas asi como a creación de comunidades enerxéticas nas que as familias vulnerables terán acceso a electricidade gratuita. Con esta participación, Silleda reafirma o seu compromiso con iniciativas innovadoras que favorezan o acceso á vivenda como un dereito fundamental, especialmente para os colectivos máis vulnerables. No marco deste seminario, presentouse ademais o “VIII Informe de situación 2024: Asegurando o dereito a unha vivenda digna, axeitada e accesible en Galicia”, da EAPN, un estudo que analiza as principais dificultades para acceder a unha vivenda na nosa comunidade e avalía as políticas públicas e medidas implementadas neste eido.

Os terreos permitirán tamén crear un skate park na zona

> Redacción

O Concello de Silleda deu a comezos deste mes de novembro un paso decisivo para mellorar a dispoñibilidade de aparcamento e reformular o espazo público no centro urbano de Bandeira coa firma de dous convenios clave. Estes acordos aseguran a cesión de dous solares situados na esquina entre a Rúa da Feira e a Rúa Louras, garantindo así novas prazas de aparcamento que substitúen as retiradas no núcleo central onde se limita la circulación a residentes. Os convenios, asinados con Urbanizacións do Deza, S.L. e D. Antonio Domínguez García, aseguran que estes espazos estarán dispoñibles para uso municipal de aparcamento “mantendo e mellorando a intensidade de estacionamento nesa zona”, engade a alcaldesa e responsable de Xestión Urbana, Paula Fernández.

Con estes dous novos acordos, o Concello consegue dispoñer para uso municipal de case toda a mazá formada pola rúa do Entroido, Rúa da Feira e Rúa Lourás, onde xa existía un solar cedido hai uns anos. Neste último espazo, está prevista a instalación dun skate park, con recursos propios, ampliando a oferta de lecer para a mocidade e consolidando un proxecto de revitalización urbana. Ademais, o Concello, grazas ao convenio asinado fai xa un ano coa familia titular do terreo coñecido como “Finca de Pichel”, facilitará o aparcamento na zona da Rúa Ramón de Valenzuela, unha zona moi concorrida pola proximidade a entidades bancarias, supermercados e cafeterías, o que vai mellorar o acceso e a mobilidade nesta área da vila.

Bandeira renovada

Todas estas cesións completan unha inversión extraordinaria no centro urbano de Bandeira, “que non só reformula o espazo público para darlle maior protagonismo aos peóns, senón que tamén mellora as condicións para a celebración da feira os días 14 e 29 de cada mes, transformando a zona nun punto de referencia para o comercio e a actividade social”, explica Fernández Pena. A alcaldesa de Silleda destaca tamén que “estes convenios son fundamentais para o desenvolvemento dunha nova estratexia urbana que beneficia tanto a mobilidade como á vida social e comercial de Bandeira”, e agradece publicamente ás familias as cesións de todos estes espazos que van a permitir “desfrutar desta Bandeira renovada”.

O Concello habilita unha canle de WhatsApp para informar de actividades

> Redacción

A Concellería de Benestar de Silleda, que dirixe Ángela Troitiño, vén de abrir o prazo para participar nas festas de Nadal organizadas dende o Centro Social dos Maiores. Así, ademais da xa tradicional Xuntanza de Nadal -que se celebrará o xoves 12 de decembro-, tamén volta á programación o Ensaio de Fin de Ano, que terá lugar o venres 27 de decembro. Todas as persoas que desexen asistir poden inscribirse no Centro Social dos Maiores de Silleda ou no propio Concello.

No caso da Xuntanza de Nadal, celebrarase no restaurante Coteliño, cun menú composto por sopa de peixe, langostos, carne asada con guarnición, doces de Nadal e café. O prezo é de 25 euros por persoa. A sesión estará amenizada por Carlos Manteiga e o prazo de inscrición remata o 8 de decembro. O Ensaio de Fin de Ano inclúe petiscos variados, sobremesas, bebida, uvas, cotillón, champán e sidra, cun prezo de 15 euros por persoa. Celebrarase como é habitual no propio Centro Social, coa música de Suso de Melide. O prazo de inscrición remata neste caso o 22 de decembro.

Nova canle para a veciñanza

Doutra banda, tamén este mes de novembro o Concello de Silleda vén de habilitar unha nova canle de difusión para informar das actividades e programas á veciñanza ou calquera persoa interesada en recibir a información, para estar ao día, sobre todo, dos distintos eventos da axenda cultural e social do municipio.

Este canal é un servizo directo, anónimo e que permitirá incluso realizar enquisas para a participación da veciñanza dun xeito áxil. Con esta iniciativa, o Concello de Silleda quere implementar un servizo de comunicación coa cidadanía que conta a día de hoxe con servizos como a APP Liña Verde, na que ademais de información, as persoas usuarias poden remitir incidencias con xeolocalización e fotografías, e ver o estado das mesmas en tempo real.

Comezou a colocación destes colectores nas distintas parroquias

> Redacción

O Concello de Silleda reforza o seu compromiso co medio ambiente e a sustentabilidade coa ampliación da recollida selectiva de residuos no rural, ao instalarse novos colectores específicos para roupa e aceites de cociña usados en nove parroquias do municipio, facilitando a reutilización e reciclaxe destes materiais e mellorando os servizos para a veciñanza.

As parroquias de Cortegada, Saidres, Moalde, Parada, Manduas, Graba e Lamela contarán con colectores específicos para roupa e aceites usados. Pola súa parte, en Escuadro e Cira instalaranse exclusivamente colectores para roupa, xa que nestas parroquias xa existen puntos de recollida de aceites. “As parroquias rurais teñen un papel fundamental na preservación da nosa contorna, e con estas accións queremos facilitarlles ferramentas para avanzar nese obxectivo común”, di Manuel Requeijo, concelleiro de Transición Enerxética e Reto Demográfico.

Aseguran desde o Concello de Silleda que esta medida é un paso máis na ampliación dos servizos no rural, asegurando que a veciñanza poida acceder con facilidade a sistemas de recollida selectiva, un avance clave para fomentar unha xestión responsable dos residuos e protexer o medio natural. A empresa AIR Servicios Ambientales, S.L. será a encargada de xestionar os residuos téxtiles, instalando para elo colectores específicos que permitirán recuperar roupa, zapatos e outros produtos téxtiles, reducindo o volume de residuos enviados aos vertedoiros e promovendo a súa reciclaxe e reutilización.

Os colectores están deseñados para garantir a seguridade e facilitar o seu uso, e AIR será responsable do seu mantemento e baleirado periódico. Este servizo será completamente gratuíto tanto para o Concello como para a veciñanza. Pola súa parte, Green Ambiental, S.L.U. xestionará a recollida de aceites de cociña usados mediante colectores do tipo “botella dentro”. Estes instalaranse nas parroquias sinaladas e garantirán a correcta valorización dos residuos, evitando o vertido na rede de saneamento ou a mestura con outros residuos. Esta empresa é a que ofrece este servizo no resto do territorio, e, ademais, realiza un servizo gratuíto de recollida en locais de hostalaría.