O Concello de Silleda vén de asinar un convenio de colaboración coa empresa Culinaria para desenvolver un servizo de reparto alimentario dentro do programa Silleda Solidaria, co obxectivo de reforzar a cobertura das necesidades básicas de alimentación de persoas e familias do municipio en situación de vulnerabilidade.

O acordo foi asinado pola alcaldesa de Silleda, Paula Fernández Pena, e polo director da empresa Culinaria, Manuel Araújo Prado, e permitirá ofrecer menús ou pratos individuais gratuítos a familias en situación de necesidade, sempre previa valoración e derivación por parte dos Servizos Sociais comunitarios municipais.

A través deste convenio, Culinaria comprométese á doazón dos menús ou pratos individuais, elaborados conforme a criterios de alimentación saudable e equilibrada e cumprindo coa normativa sanitaria e hixiénico-alimentaria vixente. Pola súa banda, o Concello asumirá o custo do reparto, fixado en 0,25 euros por menú, cun importe anual máximo de 2.600 euros con cargo á aplicación orzamentaria correspondente ás axudas de emerxencia social.

A alcaldesa, Paula Fernández, destacou que este convenio “é un novo exemplo da importancia da colaboración entre o Concello e o tecido empresarial local para dar resposta ás necesidades da veciñanza”. Neste sentido, agradeceu “a implicación e sensibilidade social de Culinaria, cunha achega moi valiosa para apoiar ás persoas e familias que atravesan situacións máis difíciles”.

Beneficiarios

As persoas beneficiarias serán aquelas residentes no municipio que, tras a correspondente valoración técnica dos Servizos Sociais municipais, se atopen en situación ou risco de exclusión social e presenten necesidades alimentarias básicas non cubertas.

O procedemento de funcionamento artellarase mediante unha comunicación directa e coordinada entre o Concello e Culinaria. As profesionais dos Servizos Sociais serán as encargadas de seleccionar ás persoas ou unidades familiares beneficiarias, tramitar as altas e baixas no programa e facer o seguimento técnico de cada caso.

O convenio terá unha vixencia inicial dun ano dende a súa sinatura. Ademais, crearase unha comisión mixta de seguimento, integrada por representantes do Concello, dos Servizos Sociais e da empresa colaboradora, para supervisar o correcto desenvolvemento do programa, avaliar incidencias e propoñer melloras operativas se fose necesario.

O programa de obradoiros gratuítos de capacitación persoal para persoas maiores de 55 anos, promovido por Solidariedade Interxeneracional coa colaboración do Concello de Silleda, vén de comezar este mes de maio no Centro Social de Maiores cunha excelente acollida, ao cubrirse a totalidade das prazas ofertadas.

As sesións desenvolveranse ata o vindeiro 25 de xuño, todos os luns e xoves, en horario de 16.00 a 18.00 horas, no Centro Social de Maiores de Silleda. A actividade enmárcase no programa Silleda Activa e ten como obxectivo fomentar o envellecemento activo, o benestar persoal, a participación social e a creación de espazos de encontro e convivencia entre as persoas maiores.

A primeira sesión estivo centrada na risoterapia, cunha dinámica participativa e amena coa que as persoas asistentes puideron compartir unha tarde de humor, expresión e convivencia. Ao longo das vindeiras semanas, os obradoiros abordarán tamén outros contidos vinculados á relaxación, as emocións, a creatividade e a capacitación persoal.

Espazo para participar, aprender e compartir

A concelleira de Benestar, Ángela Troitiño, asistiu ao inicio do programa e destacou “a moi boa resposta ante esta proposta, que demostra as ganas de participar, aprender, compartir e seguir activas”.

Troitiño sinalou que “o feito de cubrir todas as prazas confirma a necesidade de seguir impulsando actividades deste tipo, pensadas para favorecer o benestar físico, emocional e social das persoas maiores”. A edil engadiu que “estes obradoiros son moito máis ca unha actividade puntual: son un espazo para relacionarse, reforzar a autoestima, expresar emocións e gozar dun tempo compartido”.

Dende a Concellería de Benestar agradecen a implicación de Solidariedade Interxeneracional nesta iniciativa, que conta co financiamento da Xunta de Galicia, a través da Consellería de Política Social e Igualdade, e coa colaboración do COAG. A actividade inicial continuará con dúas sesión semanais con contidos como risoterapia, relaxación, emocións e creatividade.

O Concello de Silleda activou a comezos deste mes de maio unha actuación de emerxencia na ponte de Abades, situado sobre a vía do ferrocarril, despois da caída de dous petrís de pedra nun dos extremos da plataforma. O incidente non provocou danos persoais nin afectou á circulación ferroviaria, xa que as pezas desprendidas caeron polo talude e quedaron fóra da zona de paso dos trens. Unha delas localizouse a varios metros do inicio do balastro da vía, segundo informaron desde o goberno de Trasdeza.

A caída detectouse nunha zona de paso habitual de vehículos agrícolas e, segundo as primeiras valoracións, todo apunta a que puido estar provocada polo golpe dalgunha maquinaria pesada. Polo momento non foi posible identificar á persoa ou vehículo responsable, informa o Concello de Silleda. Nada máis ter coñecemento da incidencia, o Concello contactou directamente coa sección de mantemento de ADIF, que desprazou persoal á zona para realizar unha inspección. Tras esa revisión, non se detectou unha situación de perigo para a circulación ferroviaria.

Así, Concello e ADIF acordaron entón a adopción dunha medida provisional de seguridade no paso, que será executada pola administración local, mentres se avanza na definición dunha solución integral para a ponte, que deberá contar coa correspondente autorización do organismo ferroviario.

Medidas preventivas

Como primeira medida, o Concello colocou sinalización provisional, valado e iluminación para advertir da situación aos vehículos que transitan polo paso. Esta actuación completarase coa instalación dun valado fixo con biondas de seguridade, que permitirá protexer o punto afectado e garantir unhas mellores condicións de circulación. O Concello tamén iniciará unha revisión do estado doutros pontes do municipio, co obxectivo de comprobar as súas condicións de conservación e anticiparse a posibles incidencias. “Imos actuar agora en Abades, pero tamén queremos revisar outras estruturas para detectar calquera problema a tempo e evitar situacións semellantes”, sinalou a alcaldesa Paula Fernández Pena. A rexedora lembrou ademais a importancia de extremar a precaución cando se circula con maquinaria agrícola por pasos estreitos ou estruturas antigas. 

Natalia Salgado Rodríguez vén de tomar posesión este mes de maio como nova traballadora social do Concello de Silleda, logo de superar o proceso selectivo iniciado en outubro de 2025 para a cobertura desta praza, incluída na Oferta de Emprego Público municipal. A incorporación de Salgado Rodríguez como funcionaria de carreira permitirá reforzar o departamento de Benestar Social, unha área clave na atención á veciñanza e no acompañamento ás persoas e familias en situación de vulnerabilidade, dependencia ou necesidade de apoio social.

A nova traballadora social súmase ao equipo municipal nun momento no que o Concello de Silleda continúa avanzando na consolidación dos Servizos Sociais municipais. Neste sentido, nas vindeiras semanas tamén está prevista a convocatoria de dúas prazas de auxiliares do Servizo de Axuda no Fogar, que se cubrirán como persoal laboral fixo, unha convocatoria que abrirá prazo ca publicación da mesma no Boletín Oficial do Estado (BOE).

A alcaldesa de Silleda, Paula Fernández Pena, destacou que “a incorporación de Natalia Salgado como nova traballadora social supón un reforzo importante para o departamento de Benestar Social, unha área fundamental para garantir unha atención próxima, humana e eficaz á veciñanza”.

Os servizos sociais, unha prioridade

A rexedora subliñou tamén que “os Servizos Sociais municipais son unha prioridade para este goberno, porque atenden necesidades moi sensibles e acompañan ás persoas en momentos nos que precisan apoio, información e recursos”. Neste sentido, engadiu na toma de posesión da nova traballadora social que “seguir dotando o departamento de persoal estable é esencial para mellorar a capacidade de resposta do Concello”.

Fernández lembrou ademais que “esta incorporación forma parte dunha planificación máis ampla para consolidar os recursos humanos dos Servizos Sociais”, na que tamén se inclúe a futura convocatoria das dúas prazas fixas de auxiliares do SAF. Desde o goberno municipal destacaron que o Concello de Silleda continúa así avanzando na estabilización e reforzo dos servizos públicos municipais, especialmente daqueles vinculados ao coidado, á atención social e á mellora da calidade de vida da veciñanza.