> Deputación |Marzo 2024

A Deputación presenta o novo Servizo da Xuventude e Reto Demográfico provincial

> Redacción

A Deputación de Pontevedra está a avanzar na posta en marcha do I Plan estratéxico provincial da xuventude, o eixe de acción das políticas públicas centradas na mocidade que desenvolverá a institución provincial nos vindeiros anos. Así o anunciou o presidente provincial, Luis López, en conferencia de prensa, ao tempo que lembrou que é un plan que se basea, “como ten costume este Goberno, en tender pontes e na escoita activa de todos os sectores implicados: os concellos, a Xunta de Galicia, a mocidade, as asociacións xuvenís e, internamente, os servizos da Deputación”.

Ademais, o presidente provincial deu a coñecer as convocatorias impulsadas pola Deputación cara a mocidade, así como a intención do Goberno provincial de constituír o Consello Provincial de Xuventude. Desta maneira, o novo Servizo de Xuventude da Deputación ten en marcha numerosas iniciativas dirixidas á mocidade da provincia, coma +Xuventude, os “Campamentos A Lanzada”, os Premios Provinciais á Xuventude ou o Ciclo de conferencias Aida Fernández Ríos. Tamén está previsto que nos próximos días se publique a nova liña de axudas “O teu espazo xuvenil”, que, cun orzamento de 100.000 euros, van dirixidas a dotar os locais xuvenís dos concellos de menos de 20.000 habitantes da provincia.

Vive o Rural

Ademais, estase a tramitar o programa “Vive o rural”, unha liña de axudas dotada con 30.000 euros para financiar actividades medioambientais promovidas por ANPAS e centros educativos públicos en granxas escolas da provincia. O servizo ten en marcha o redeseño dun apartado propio na web da Deputación para darlle resposta á xuventude e ao persoal técnico dos concellos, con información relativa a programas, axudas e espazos destinados á xuventude na provincia, dando a coñecer desde as accións lideradas pola Deputación ata axudas, infraestruturas ou actividades para a xuventude que promoven os concellos ou a Xunta de Galicia.

Luis López tamén anunciou que está prevista a organización dun encontro provincial de xuventude e de mesas de traballo e xornadas técnicas de formación cos concellos, tras detectar na primeira xuntanza que tivo lugar no Edificio Administrativo unha demanda de formación e cooperación para poñer en común experiencias e propostas. “Estamos avanzando a pasos axigantados no compromiso que adquirimos ao comezo deste mandato coa xuventude, o futuro desta provincia”, asegurou.

Parte dos recursos permitirán que Lalín poida acoller o partido entre as seleccións masculinas absolutas de España e Serbia de balonmán

> Redacción

A Deputación de Pontevedra acaba de aprobar dúas axudas ao Concello de Lalín ao abeiro do Plan Extraordinario de Infraestruturas Deportivas por importe de máis de 27.000 euros. Ata o momento, o Goberno provincial xa mobilizou máis de 860.000 euros dos 4 millóns de orzamento total do plan, que se abriu a todos os concellos de menos de 50.000 habitantes da provincia. Polo de agora xa se aprobaron recursos para Pazos de Borbén, Barro, Cerdedo-Cotobade, Redondela, Poio, Arbo, Crecente, Meis, Catoira, Cangas, Salceda de Caselas, Marín, A Cañiza, Fornelos de Montes, Covelo e Lalín.

O Concello de Lalín dedicará unha achega de 17.992,70 euros do Plan Extraordinario de Infraestruturas Deportivas á subministración de dúas pantallas LED que se situarán nos frontais da pista central do Lalín Arena, na parte traseira das porterías.

Seleccións de balonmán

Con esta actuación, a Deputación garantirá que o Concello de Lalín poida acoller o partido internacional de balonmán no que se enfrontarán as seleccións masculinas absolutas de España e Serbia o próximo 8 de maio, un encontro decisivo para a clasificación do mundial de 2025. Esta é unha das esixencias técnicas da Federación Internacional de Balonmán para as instalacións, e as pantallas permitirán tanto o seguimento do encontro como a visualización de estatísticas en tempo real.

Coa segunda achega aprobada, o Concello de Lalín dotará estas instalacións dun elevador acuático portátil que permitirá o acceso ao interior dos vasos da piscina ás persoas con discapacidade, co obxectivo de que estas sexan completamente autónomas no seu uso. Este investimento recibe unha achega da Deputación de 9.504 euros.