> Lalín |Xaneiro 2026

Todo está preparado no Concello de Lalín para celebrar por todo o alto unha nova edición, a número 58, da Feira do Cocido, Festa de Interese Turístico Internacional. Inmersos xa no Mes do Cocido “de San Amaro a San Valentín”, 26 restaurantes e 68 empresas colaboradoras coordinan co Concello de Lalín a celebración da que é unha das festas gastronómicas máis importantes de Galicia e o resto de España. O día 8 de febreiro, día grande do Cocido en Lalín, o cirurxán Diego González Rivas pronunciará o pregón deste ano, e a Encomenda do Cocido ampliará a súa xa abultadanómina de comendadores coa incorporación docatedrático deFísica Aplicada da USC, Jorge Mira; o seleccionador de España de fútbol, Luís de la Fuente; a xornalista e escritora Irene Villa; a concelleira Almudena Maíllo; o empresario lalinense Ramiro Mejuto, entre outros.

Haberá de novo desfile de carrozas, reservas para degustar o cocido en todos os restaurantes de Lalín e un “macrococido” para 1.000 persoas no Lalín Arena. Uns días antes, o 30 de xaneiro, será tamén o Lalín Arena escenario da Gala do Cocido, retransmitida en directo pola TVG e na que se entregarán os Premio Gastronomía de Galicia e o XXXII Premio Nacional de Xornalismo Gastronómico Álvaro Cunqueiro. Celebrada a Matanza Tradicional na Vía da Prata, o Divercocido para os máis pequenos e mesmo presentado o cocido en Oviedo, todo semella estar preparado para unha nova e exitosa edición da Feira do Cocido.