> Vila de Cruces |Abril 2026

Todo está listo en Vila de Cruces para celebrar unha nova edición da Festa do Galo de Curral. O Concello de Vila de Cruces vén de presentar o programa completo da XXXII edición da Festa Gastronómica do Galo de Curral, que este ano será os días 30 e 31 de maio e contará con música, gastronomía e novidades. A festa dará comezo o sábado 30 de maio ás 12 do mediodía cunha cata maridaxe de galo de curral con viños da Ribeira do Ulla, da man de Nacho Costoya. Ese mesmo día ás seis da tarde celebraráse a XXXII edición do Festival de Bandas de Galicia, que este ano conta coa presenza da Unión Musical Ponteledesma, a Banda Escola de Música de Rianxo e a Artística de Merza. Xa pola noite para seguir coa fin de semana de festa, actuará a orquestra Panamá.

O domingo 31 de maio será o día grande desta Festa Gastronómica do Galo de Curral. A xornada comezará ás once da mañá con pasarrúas a cargo das agrupacións O Arco de Merza e Vai Nela de Salgueiros e para as once e media está prevista a chegada ao casco urbano dos coches antigos da Escudería Clásicos O Toxo. Na Praza do Concello conducirá a gala Mercedes Seijo.

As actuacións comezarán ás doce e dez cun concerto de Xuntounos Ela, previo ao pregón que este ano corre a cargo da actriz e presentadora María Mera. Como prato forte musical, arredor da unha do mediodía ofrecerá na praza un concerto acústico Bertín Osborne.

Os establecementos hostaleiros do concello agardan cheo absoluto para a hora de xantar no día grande da festa desde ano e xa pola tarde, como fin de festa, ás seis e media actuará a Orquestra Capitol. Na presentación da festa, destacaron desde o Concello que será “unha fin de semana chea de sabor, tradición e encontro”, unha nova edición “na que seguimos medrando e innovando, sen perder a nosa esencia”. O evento anual cruceño é “unha festa que fala de nós, do que somos e do que queremos seguir sendo”, destacaron desde o goberno local.