> Lalín |Febreiro 2024

A participación dos electores da comarca nas elección galegas subiu case 9 puntos chegando ao 72,31%

> Redacción

O PP foi nas eleccións do pasado 18 de febreiro a forza máis votada na Comarca do Deza, cun total do 61,51% dos votos dos seis concellos. O BNG pola súa banda conseguiu na comarca o 24,09% dos sufraxios e o PSdeG obtivo o 10,31%. En total no Deza foron 14.340 os electores que optaron polos populares (0,15 puntos menos que no 2020). No caso do BNG foron en total 5.618 votos (unha suba de 4,23 puntos) e para o PSdeG os apoios acadaron os 2.405 votos (2,67 puntos menos que fai catro anos).

Na xornada electoral a Comarca do Deza marcou ademais unha suba de 8,89 puntos na participación, que acadou o 72,31% dos electores. Por concellos, a máis alta foi a de Agolada, e nos que máis subiu respecto das elección de 2020 foi en Dozón e Rodeiro. En Lalín votaron o 73,81% dos electores, no caso de Agolada foron o 74,19%, en Dozón a participación foi do 73,37%, en Rodeiro acadou o 72,39%. No caso de Silleda votaron o 70,58% dos electores e en Vila de Cruces a participación chegou ao 68,52%.

Por concellos

En Lalín o PP obtivo 7.403 votos (o 63,14%), o BNG acadou 2.777 (o 23,85%) e o PSdeG 974 sufraxios (o 8,36%).

En comparación coas eleccións galegas de 2020 o PP sube na capital do Deza en 760 votos, o BNG conseguiu 663 votos máis e o PSdeG perdeu nestas eleccións 288 votos dos lalinenses respecto de fai catro anos. En Agolada o PP tivo 961 votos, o BNG 361 e os socialistas 162 votos, aquí foi o PP quen subeu máis con 42 novos apoios, respecto dos 26 máis do BNG e os 24 que perdeu o PSdeG. No concello de Dozón o PP obtivo 521 votos, o BNG 112 e o PSdeG 38. No caso de Rodeiro o PP acadou 878 votos, o BNG 286 e o PSdeG 271, foi de feito o único concello do Deza no que os socialistas non perderon apoios respecto de hai catro anos e mesmo sumaron 70 votos máis. O PP en Rodeiro subeu 74 votos e o BNG 30.

En Silleda o PP tivo 2.770 votos, o BNG 1.288 e o PSdeG 750, e no caso de Vila de Cruces o PP acadou 1.807 sufraxios, o BNG subeu até os 794 votos e o PSdeG quedou en 210.

Veterinaria, gandeira e activista cultural en Lalín, a nova deputada do Deza é ademais concelleira dende 2023

> Redacción

As pasadas eleccións do 18 de febreiro deixaron un incremento da presenza da Comarca do Deza no novo Parlamento galego que se constituirá en marzo. Ariadna Fernández, natural de Os Porcallos, Goiás (Lalín), que ocupaba o número 8 na candidatura do BNG pola provincia de Pontevedra, será a deputada do Deza entre as filas nacionalistas a vindeira lexislatura. Ariadna Fernández é veterinaria, gandeira e unha muller feminista e cun gran compromiso e implicación entre o asociacionismo cultural lalinense.

Entre os 22 deputados provincias de Pontevedra (11 do PP, 8 do BNG e 3 do PSdeG) só hai dous da comarca do Deza, o conselleiro de Cultura en funcións, o lalinense Román Rodríguez, polo PP, e agora a comarca conta cunha nova representante no Pazo do Hórreo, nas filas do BNG. Nas listas electorais ía ademais polo PSdeG o ex alcalde de Silleda, Manuel Cuíña, que finalmente non acadou asento no novo Parlamento xa que ocupaba o posto número 6 na lista provincial do PSdeG, que finalmente só acadou 3 escanos.

Dous dezaos

Ariadna Fernández exerce no Deza coma veterinaria, axuda na explotación gandeira familiar en Os Porcallos, é dende 2023 concelleira do BNG en Lalín e agora ocupará un dos 25 escanos do BNG no novo Parlamento galego. Terá 36 anos o vindeiro 2 de marzo e durante a campaña electoral amosou o seu compromiso co rural galego, coa comarca do Deza e a súa defensa das políticas de revitalización do agro galego para os vindeiros catro anos.

Repite coma representante do Deza no Parlamento Román Rodríguez, lalinense de 56 anos, licenciado en Xeografía e conselleiro de Cultura, Educación, FP e Universidades en funcións na Xunta de Galicia. Rodríguez tamén foi concelleiro en Lalín, do PP e conta cun escaño do Parlamento de Galicia dende o ano 2009, en que comezou coma deputado e voceiro en materia de Urbanismo e Ordeación do Territorio dentro do Grupo Parlamentario do PP no Hórreo.

Medio Rural considera “estratéxica” a nave de Botos para extinción e prevención de incendios

> Redacción

O alcalde de Lalín, José Crespo, asinou este mes de febreiro co secretario xeral técnico e do Patrimonio da Consellería de Facenda e Administración Pública, Jorge Atán, a cesión por parte da Xunta de Galicia ao Concello de Lalín de dúas parcelas cuxo valor económico supera os 800.000 euros e que pasan a incorporarse e a incrementar o importante patrimonio municipal. Os predios e as edificacións que se ceden son a A-26 do Polígono Lalín 2000, que ocupa o edificio de Expodeza que xa é de titularidade municipal, aínda que seguirá ocupada por Medio Rural ata o remate das obras do edificio administrativo da Xunta de Galicia en Lalín, e a parcela número 18 do Polígono de Botos.

A parcela A-26, co edificio de Expodeza, conta con 3.216 metros cadrados de superficie na fachada do polígono Lalín 2000 que da á N525. Ten unha superficie construída de 738 metros cadrados que corresponden ao edificio principal de Expodeza repartido en dúas plantas. A maiores, conta cun aparcamento semicuberto que totaliza 210 metros cadrados. Esta parcela e as construcións computan un valor a efectos fiscais de 547.727 euros.

Medio Rural

O rexedor agradeceu a boa vontade do conselleiro de Medio Rural, José González Vázquez, que atendeu a petición de dispor de parte da parcela que a Xunta tiña para a nave de maquinaria para instalar alí os almacéns e a nave municipal de maquinaria e a cesión de Expodeza en contraprestación aos metros que non se utilizarán por parte do Concello no edificio administrativo que se está a construír. Ambas parcelas e as súas edificacións, que xa están incorporadas ao patrimonio municipal, superan os 700.000 euros de valoración e supoñen un incremento importantes nos ben propiedades da entidade municipal

Tamén este mes o conselleiro do Medio Rural, acompañado polo director xeral de Defensa do Monte, Manuel Rodríguez, e polo alcalde de Lalín realizou unha visita técnica á nave propiedade desta dirección no concello de Lalín, que vén de rematar as súas obras de reacondicionamento. O conselleiro salientou a importancia destas instalacións para previr incendios forestais e facilitar a súa extinción.

O Museo da Marioneta e do Xoguete é un dos seus máximos reclamos

> Redacción

O Pazo de Liñares recibiu ao longo de 2023 un total de 9.214 visitas, a cifra máis alta das rexistradas desde a súa apertura en 2014 que consolida a este Ben de Interese Cultural (BIC) como un referente turístico de primeira orde mimetizado na contorna cultural, gastronómica e turística da zona, interrelaciónandose entre todas as ofertas para unha promoción conxunta.

Dos 9.214 visitantes é de destacar que o 4,55% (419) proceden do estranxeiro; o 17,89% de distintos puntos de España; o 20,24% de Lalín e o 57,41% doutros puntos de Galicia. Así mesmo da totalidade 8.109 visitantes foron persoas adultas e 1.105 menores.

Da totalidade das visitas, 2.388 persoas participaron en excursións (con 193 alumnos/as); 1.062 en diversos actos e 290 en vodas. Así mesmo tamén se desenvolveron outros 304 eventos que fan referencia a participantes en actividades como sesións fotográficas, gravacións, reportaxes e xogos.

Oferta plural

O Museo Galego da Marioneta e do Xoguete. da Colección A. Chaves, é un dos máximos reclamos e motivacións para vir coñecer Liñares, a súa contorna e desfrutar da oferta turística de Lalín. Un centro museístico referente con máis de 1.000 pezas, moitas inéditas, e que leva ao visitante a unha viaxe pola historia do xoguete, da infancia e do xogo. Na parte dedicada á Marioneta recolle unha representación de pezas e montaxe máis destacadas de compañías de toda Galicia exhibindo as súas pezas máis destacada na súa traxectoria. Tamén se atopa unha peza autómata, inspirada no manual do clérigo Domingo Martínez de Presa, de 1662, creada ex profeso para Liñares e que reproduce un baile da época renacentista.

Liñares tamén se configura como un espazo multifuncional, cultural e turístico no que se desenvolven vodas, presentacións de libros, charlas, cursos, eventos, sesións de fotos, coloquios, entre outros tipos de actividades. Tamén conta cunha sala enteira adicada a Loriga e outra adicada ao xeólogo Jan Dirk Hilgen que destaca pola mostra de parte dos seus microscopios e minerais deste xeólogo holandés con estreita vinculación lalinense.

O Centro de Xestión do Coñecemento Arqueolóxico e a súa exposición permanente completan unha oferta plural e diversa.