> Lalín |Maio 2021

Lalín investirá máis de 500.000 euros en reparacións en centros educativos

Unanimidade para esixir a ADIF a recuperación dun camiño en Costoya

> Redacción

O pleno do Concello de Lalín, celebrado por primeira vez en moito tempo de xeito presencial, acordou por unanimidade a ordenanza das vivendas do Manuel Rivero e dúas modificacións de crédito. A primeira, de 570.917 euros, permitirá cubrir a pista, o parque infantil e a entrada ao CEIP Xesús Golmar, ademáis doutros 20.063 euros para o chan de caucho dos exteriores e a tarima flotante na escola unitaria. Tamén irán 14.700 euros para reparar outros centros educativos, 28.000 a convenios coa AED e Montes do Deza e 22.974 para o plan de melloras de camiños agrícolas.

No pleno o goberno municipal tratou tamén a humanización do tramo da Avenida Xosé Cuiña entre as rotondas de Donramiro e o consistorio, que chega ata conectar co paseo de Pontiñas. Ao respecto deste proxecto pendente o alcalde, Xosé Crespo anunciou que “estamos acabando de negociar os terreos” porque segundo lle criticou ao goberno anterior “vostedes nin comezaran os expedientes de expropiación”.

O goberno local explicou a ordenanza que regulará o uso das vivendas do Manuel Rivero (dúas sociais e outras dúas de emerxencia social). Estas vivendas poderán usarse como tope ata seis meses, con prórrogas en casos excepcionais ata un máximo de 18. Ao marxe das vivendas sociais, unha quedará para unha asociación e a outra funcionará coma punto de encontro familiar. Outra modificación de crédito, de 159.533 euros será para mercar mobiliario para estas vivendas.

 

Adif

Ademáis, a moción do goberno para esixir a ADIF a recuperación dun camiño en Costoya contou co apoio dos 10 edís da oposición. Este vial precisa un muro de contención para evitar máis danos cando chove arreo, segundo explicou o concelleiro de Obras, José Cuñarro.

Pola súa banda o BNG sacou adiante propostas para incentivar o comercio e a creación de ciclo rúas. 

O GDR Pontevedra Norte analiza en Bulgaria novas ofertas de turismo no rural

Este mes organizará en Lalín un evento internacional con representantes de todos os países participantes

> Redacción

O xerente do GDR Terras de Pontevedra Norte, Ramiro Ruibal, participou a comezos deste mes de xuño en Nessebar (Bulgaria) nun evento pertencente ao “Programa Europeo Erasmus + Panhera” no que participaron entidades doutros 5 países (Noruega, Bulgaria, Italia, Turquía e Grecia).

Neste encontro, os diferentes axentes territoriais seguen a traballar no desenvolvemento de novas metodoloxías de traballo co obxectivo final de propoñer boas prácticas e novas actuacións aos axentes turísticos co propósito de crear unha contorna rural máis atractiva para peregrinos e outras modalidades de turistas, ofrecendo novas experiencias acordes co entorno rural.

Durante estas xornadas en Bulgaria, os socios contrastaron diferentes fórmulas de achegamento da oferta turística aos visitantes, e ademáis estudiaron cuestións como a mobilidade no territorio, o achegamento dos recursos histórico-artísticos, a gastronomía, etc.

 

Calidade Turística

Ramiro Ruibal pola súa parte aproveitou a súa presenza neste encontró para exponer o traballo desenvolvido polo GDR Terras de Pontevedra Norte no relativo ás certificacións de calidade turística, destacando a aposta do organismo polo Compromiso de Calidade Turística “SICTED” como fórmula de implantar no territorio do Xeodestino Deza-Tabeirós un turismo de calidade. Ademáis, Ruibal propuxo aos 5 países restantes unha serie de manuais de boas prácticas e guías online que posibilitan a mellora continua dos establecementos turísticos existentes.

Como colofón a estas xornadas, o vindeiro 14 de xuño o GDR Terras de Pontevedra Norte organizará en Lalín un evento internacional deste proxecto “Erasmus + Panhera”, ao que asistirán representantes de todos os países participantes.

Comezaron as obras do CIS de Lalín

O novo centro sanitario estará operativo a finais de 2022

> Redacción

A Xunta comezou o pasado 14 de maio  a construción do Centro Integral de Saúde (CIS) de Lalín, que supón un investimento autonómico de 9 millóns de euros e comeza a executarse co obxectivo de ofrecer aos veciños da comarca de Deza un equipamento sanitario de vangarda a finais do ano 2022. A conselleira de Infraestruturas e Mobilidade, Ethel Vázquez Mourelle, e o conselleiro de Sanidade, Julio García Comesaña, supervisaron xunto ao alcalde de Lalín, José Crespo, o inicio dos traballos de construción do novo CIS, nun acto no que tamén participou o conselleiro de Cultura, Educación e Ordenación Universitaria, Román Rodríguez. O Centro Integral de Saúde de Lalín é o segundo destas novas instalacións sanitarias de referencia que se constrúe en Galicia, logo do que a Xunta está a executar na cidade de Lugo, e aos que pronto se sumará o CIS Olimpia Valencia de Vigo, actualmente en fase de redacción do proxecto, segundo explicaron dende o goberno galego. Estará situado nunha parcela de máis de 15.000 m² do Alto de Vales e contará con boas comunicacións, pola proximidade da estrada N-525. O CIS contará cunha superficie de 5.500 m² na que se integrarán un Centro de Saúde e un Punto de Atención Continuada (PAC).

 

Equipamento

Nas súas instalacións haberá área asistencial, área pediátrica, especialidades médicas e unidades complementarias, como hospitalización a domicilio, saúde mental, hemodiálise ou atención á muller.

O obxectivo da Xunta é ofrecer servizos sanitarios de primeiro nivel aos veciños de Lalín, Agolada, Rodeiro e Dozón, ademais de prestar certas asistencias aos veciños de Silleda e Vila de Cruces, beneficiando a máis de 35.000 persoas.

O conselleiro de Sanidade remarcou a “maior capacidade resolutiva” deste centro, que engadirá programas como os de rehabilitación do solo pélvico, enfermidades músculo-esqueléticas, ou o de rehabilitación cardíaca.  

A actuación dará traballo a 170 persoas

A conselleira de Infraestruturas destacou a posta en marcha do transporte gratuíto para menores de 21 anos

> Redacción

Pola súa banda, a conselleira de Infraestruturas asegurou que o CIS de Lalín será un “espazo acolledor, funcional e diáfano”, que se completará cunha praza que unirá as dúas entradas públicas ao edificio, unha zona verde e preto de 90 prazas de aparcadoiro, tanto para os pacientes como para o persoal sanitario.

Vázquez Mourelle destacou a relevancia sanitaria do novo equipamento, cuxa execución supón tamén un factor de dinamización da economía e do emprego, posto que, indicou, o investimento da Xunta de 9 millóns de euros na construción do Centro Integral de Saúde de Lalín leva aparellados preto de 170 postos de traballo do sector da obra pública.

O Centro Integral de Saúde de Lalín e comarca de Deza é unha actuación financiada pola Unión Europea, no marco do Programa Operativo FEDER Galicia 2014-2020, como parte da resposta da UE á pandemia da Covid-19.

 

Transporte público gratuíto

A conselleira de Infraestruturas apuntou que o Centro Integral de Saúde é unha nova mostra do compromiso do Goberno galego coa mellora da calidade de vida dos veciños de Lalín.

Ethel Vázquez destacou especialmente o traballo para mellorar a mobilidade dos veciños de Lalín e de toda a comarca de Deza, ofrecendo máis e mellores servizos de transporte público.

Con ese obxectivo, lembrou que no mes de maio comezou a funcionar nas liñas de autobús que prestan servizo nos concellos de Deza a tarxeta Xente Nova, coa que os menores de 21 anos viaxan gratis. Vázquez Mourelle subliñou que se trata dunha medida moi demandada e agardada polo Concello de Lalín e apuntou o importante beneficio que supón para os mozos que se desprazan cada día desde a Vila a Santiago ou Ourense, así como para as súas familias. 

Contacto

Director Xerente: Manuel Núñez Fiuza

Deseño e maquetación: Bearisa
Colaboradores: Iago Mouriño, Bartolo Landiño, Tomás Troitiño,
David Devesa, Luis Lince, Pedro Carrio, Manuel Estévez e González Bearisa.

Administración-Publicidade: Rúa Arenal 1 Entrechán - Lalín.
Tlf.: 986 780 615986 780 615 • Fax: 986 780 615 • Móvil: 625 120 810625 120 810
e-mail: manuelfiuza@gmail.com

 

www.lalinecomarca.es