> Lalín |Outubro 2021

O Concello derroga en 2022 o ICIO, as taxas de terrazas e as certificacións urbanísticas

> Redacción

O goberno local de Lalín vén de tomar importantes medidas para favorecer a recuperación da actividade económica local logo da pandemia. O executivo de Crespo levou este mes a pleno ordinario a derrogación de varios impostos e taxas, así coma a supresión doutros tributos. Segundo explicou o alcalde, estas medidas pretenden favorecer o investimento no municipio, tanto por parte de veciños coma de empresas.

O Imposto de Construccións, Instalacións e Obras quedará suprimido en Lalín en 2022. Esto suporá un aforro duns 200.000 euros para os veciños, segundo aseguraron dende o goberno local. A supresión do ICIO beneficiará a particulares, a granxas e ás empresas que queiran instalarse en Lalín. Segundo dixo o alcalde "deixaremos de ingresar bastante, pero compensa porque xerará riqueza no pobo, pode ser un acicate para investir”.

O goberno local tamén suprimiu as taxas de terrazas, que supuñan ás arcas municipais entre 15.000 e 20.000 euros, e a de toldos e marquesiñas, cifrada en 10.000 euros de ingresos. Crespo explicou que pola pandemia “aumentou a cultura de terrazas” pero lembrou que igualmente os locais teñen que pedir licencia para ampliar as existentes.

O executivo de Crespo tamén derroga a taxa de certificacións urbanísticas, que supón actualmente un pago de 750 euros por certificado. Segundo dixo o alcalde, con todos estes tributos suspendidos os veciños e veciñas aforrarán entre 400.000 e 500.000 euros.

Máis rebaixas

O Concello eliminou outras taxas coma a do servizo de conciliación (1,25 euros), as ordenanzas dos servizos de uso do circuito de motocross do Monte do Carrio; o préstamo de bicicletas; o Espazo Infantil Aberto; de Entornos Saudables; o lavado e desinfección de vehículos e o traslado, depósito e conducción de cadáveres. Ademais, o Concello anunciou que dende 2022 as persoas que merquen un vehículo eléctrico recibirán unha bonificación do 75% no Imposto de Vehículos de Tracción Mecánica (IVTM). Así, o recibo quedará entre 10 e 25 euros. O executivo de Crespo tamén traballa para variar os tramos que se aplican na taxa do lixo, para aplicar descontos ás familias numerosas con máis de 3 fillos e fillas. 

Esta autoestrada ten as peaxes máis altas de España, con 7,77 céntimos por kilómetro

> Redacción

A Xunta e os Concellos afectados acordaron este mes de outubro analizar o impacto de aplicar o modelo de bonificacións da AP-9 na autoestrada Santiago-Ourense e trasladar a demanda ao Ministerio de Transportes. A conselleira de Infraestruturas e Mobilidade, Ethel Vázquez, xunto cos delegados territoriais da Xunta en Ourense, Gabriel Alén, e en Pontevedra, Luis López, reuniuse con preto dunha vintena de alcaldes dos concellos da traza da autoestrada Santiago-Ourense, dando así resposta a unha solicitude do alcalde de Lalín, José Crespo.

Vázquez Mourelle destacou que a autoestrada estatal AP-53 é clave para a vertebración interior de Galicia, xa que é o eixe de comunicación principal entre Santiago e Ourense, esencial para a competitividade de municipios como Boqueixón, Vedra, Silleda, Lalín, Dozón ou Piñor, entre outros.

Ethel Vázquez lembrou que a AP-53 é unha das autoestradas coas peaxes máis altas de España: 7,77 cts/km (sen IVE), fronte aos 6,12 cts/km de tarifa media da AP-9, logo das bonificacións aplicadas este verán, ou os 5,67 cts/km das autoestradas autonómicas. Precisou que esta infraestrutura non conta actualmente con ningún tipo de bonificacións, nin sequera para o caso dos usuarios recorrentes.

Estudo e enmendas

No encontro detallouse a realización dun estudo para analizar o impacto que suporía que o Goberno aplicase na AP-53 as bonificacións vixentes na AP-9. Así, a conselleira referiuse á gratuidade da volta para os vehículos lixeiros que regresen en 24 horas; á redución do 20% adicional para os vehículos lixeiros que fagan 20 desprazamentos ao mes; e do 20% para vehículos pesados. Unha vez realizado este estudo, na xuntanza tamén se acordou celebrar unha nova reunión cos alcaldes afectados para presentar os resultados e remitirllos ao Ministerio de Transportes, Mobilidade e Axenda Urbana.

Explicou que tendo en conta ese menor impacto nas contas estatais e o acordo unánime do Parlamento galego, o estudo permitiría concretar o custo para introducir, vía emenda, a partida necesaria nos Orzamentos Xerais do Estado para que as bonificacións se empecen a aplicar xa o vindeiro ano.   

Disporá dunha capacidade de 5.000 metros cúbicos que permitirá mellorar a rede de saneamento do núcleo urbano

> Redacción

A Conselleira de Infraestruturas e Mobilidade, Ethel Vázquez, avanzou no Parlamento a licitación, antes de que finalice o ano, das obras do novo tanque de tormentas de Lalín, que suporá un investimento da Xunta de máis de 6 millóns de euros. Vázquez Mourelle informou de que o obxectivo da Xunta é adxudicar as obras no primeiro semestre do 2022 para iniciar os traballos no segundo semestre do ano.

A conselleira indicou tamén que nos Orzamentos da Xunta para o vindeiro ano xa se reserva unha partida de preto de 1 M€ para esta actuación, con compromiso de investimento plurianual ata o 2023.

Sinalou que esta é unha das actuacións da Xunta para previr as verteduras en Lalín, e enmárcase nas medidas previstas no Plan de saneamento local impulsado por Augas de Galicia co fin de coñecer en profundidade o funcionamento do sistema, identificar as súas deficiencias e proxectar as actuacións precisas para poder solucionalas.

Ethel Vázquez puxo de exemplo as deficiencias que presenta a rede de saneamento e depuración do Concello de Lalín, como as doutros moitos concellos de Galicia, para acreditar que os problemas poden resolverse mediante a suma de esforzos das administracións.

Traballo Xunta-Concello

Subliñou que o Concello de Lalín está preocupado polo funcionamento do seu sistema de saneamento e por ese motivo lle solicitou axuda á Xunta para solucionar os problemas, para o que a Administración autonómica elaborou o Plan de saneamento de Lalín.

Precisou que este plan estableceu unha serie de actuacións, sendo a construción dun tanque de tormentas en Pontiñas e a mellora dos colectores interceptores o primeiro paso. O proxecto construtivo xa está redactado e atópase en fase de supervisión, concretou.

A conselleira explicou que o tanque de tormentas disporá dunha capacidade de 5.000 m³, que, xunto coa ampliación e mellora dos colectores interceptores do Pontiñas, permitirá mellorar o funcionamento da rede de saneamento do núcleo urbano de Lalín, reducindo o número e volume de vertidos ao medio receptor.

Luís López cualificaos de “claves para o forte impulso” da Comarca

> Redacción

A Xunta de Galicia vén de fixar uns investimentos iniciais de 34.695.383 euros para as bisbarras de Deza e Tabeirós-Terra de Montes no proxecto de Orzamentos 2022, segundo informou o delegado territorial, Luis López, que sostén que “este gran esforzo vai ser clave para outorgar un forte impulso de desenvolvemento e progreso e un salto cualitativo dos servizos públicos a toda esta contorna interior do norte da provincia”. No caso da Comarca do Deza este importe ascende a 17.047.695 euros.

“O punto de partida para Deza e Tabeirós por parte da Xunta xurde do noso compromiso con estas bisbarras e está fixado en case 35 millóns de euros, unha contía que vaise ampliar con total seguridade a través dos plans, convenios, ordes de axudas ou novos proxectos que xurden ao longo do ano”, manifestou o representante autonómico.

Outras partidas

O delegado territorial salientou que as principais actuacións orzamentadas para a zona, todas elas por riba do millón de euros, son o remate do Centro Integral de Saúde (CIS) e a ampliación do parque empresarial Lalín 2000, na capital dezá, e o comezo da autovía AG-59, os talleres de madeira no IES Losada Diéguez e os novos xulgados da Estrada. “Os principais investimentos, por contía ou singularidade, roldan os 25 millóns de euros, pero as contas da Xunta tamén contemplan para Deza e Tabeirós outros investimentos en instalacións deportivas, novas tecnoloxías, silvicultura, limpeza de montes e desbroces, obras educativas, como a renovación das luminarias en ata seis centros, entre outras, mellora e sinalización do Camiño de Santiago, transporte ou dixitalización no ensino ata alcanzar os citados 35 millóns”, significou o delegado, que salientou que os investimentos iniciais que aparecen recollidos nos Orzamentos 2022 “son aqueles que están máis maduros e avanzados administrativamente, pero seguimos traballando polas comarcas con outros proxectos, como a mellora da PO-201 entre Silleda e Laro, o saneamento e o albergue de Rodeiro, os mosteiros de Camanzo, en Cruces, e San Pedro de Vilanova, en Dozón ou unha nova e ampla quenda de melloras nos centros educativos públicos, entre outras”.