> Lalín |Xuño 2024

Curso de igualdade, Congreso Internacional de Clarinete, música na rúa, teatro e maxia encherán as rúas de actividades

> Redacción

A programación do Concello de Lalín para o mes de xullo terá actividades para todos os públicos.

Astronomía, música na rúa, teatro, maxia, música galega, formación e conciliación son os principais eixes da programación de “Xullo xa está aquí! Lalín é cultura”. Así o anunciou a concelleira de Cultura, Begoña Blanco que avanzou que “o mes de xullo é un mes con moita actividade.

“Eventos aos que suman o programa de actividades Verán Astronómico en Lalín”, o inicio do ciclo de concertos de rúa no verán das nosas bandas de música, obras de teatro, festas do socio das bandas e o inicio dos campamentos co Campamento Verde que se desenvolverá entre o 15 e 26 de xullo, dirixido a nenos/as de entre 4 e 10 anos de idade, ademais do desenvolverse o servizo Concilia Lalín das vacacións no edificio sociocultural da rúa Manuel Rivero.

O venres 5 de xullo terá lugar ás 20 horas o concerto de fin de campamento da Banda de Música de Vilatuxe na rúa Rosalía de Castro. Ese mesmo día representarase no salón teatro a obra “Historia de aldeas”. O sábado 6 celébrase a festa do socio da Banda de Lalín e tamén da de Vilatuxe e o domingo 7 a da Banda de Muimenta.

Música

O venres 12 dará comezo o Congreso Internacional de Clarinetes no edificio sociocultural que se estenderá ata o 19 de xullo. Ás 21 horas do 12 de xullo ofrecerá un Concerto a Real Filharmonía de Galicia na Sala Tuno Valdés do Auditorio no marco deste festival. O sábado 13 no marco das actividades do dito Congreso terá lugar ás 19 horas un recital con piano e ás 21 horas o concerto de Garufa Blue Devils Big-Band.

O domingo 14 de xullo ás 19 horas terá lugar un recital de piano e ás 21 horas un concerto de Rosa Cedrón e a Orquestra de clarinetes Galaico-Portuguesa. O luns 15 desenvolverase outro recital con piano e actuará o cuarteto de cordas da Real Filharmonía (21 horas). O martes 16 terá lugar un recital de piano e a actuación do Trío de Fado Joao Pedro Santos “Coro Lusitano”. 

Numerosas actividades entre xullo e agosto xirarán arredor desta temática

> Redacción

O Concello de Lalín organiza para xullo e agosto un novo ciclo de actividades promocionais do “Destino Starlight” baixo a denominación “Verán Astronómico en Lalín” que inclúe sesións de visionado desde o Alto de Rodelas; un monográfico sobre a Lúa e posterior observación e unha proxección de fotos con telescopio. Todas as actividades son gratuítas e con prazas limitadas. Para poder participar en calquera destas actividades hai que inscribirse previamente no Museo Municipal (986 78 40 04 ou museo@lalin.gal) ata completar aforo. O “Verán Astronómico en Lalín” arrancará o venres, 5 de xullo, coa actividade “Anoitecer de verán”, un visionado que se fará de o Alto de Rodelas, zona cero do “Destino Starlight” a cargo de José Ángel Docobo Durántez, catedrático de Astronomía e coordinador de investigación do Observatorio Astronómico Ramón Mª Aller da USC (OARMA), recentemente tamén director científico de Lalín Starlight; Luca Piccoti, físico e doutor de Astronomía pola USC e investigador postdoutoral pola USC e Ángel Costas Castro, alumno de último curso da Facultade de Física e colaborador do OARMA.

O xoves 11 de xullo terá lugar ás 21 horas un monográfico sobre a Lúa no Museo municipal e posterior observación da Lúa no Observatorio dirixido por Ángel Costas e Xabier P. Couto, matemático, actualmente investigador predoutoral na Universidade da Coruña e colaborador do OARMA. O xoves 18 de xullo unha proxección de fotos con telescopio, que dará comezo ás 21 horas no Museo que estará coordinada por Francisco Javier Cerdán, destacado especialista en fotografía astronómica.

As perseidas

Este “Verán Astronómico en Lalín” pecharase o 12 de agosto, coa Noite das Perseidas, que terá por obxecto fundamentalmente poder contemplar a simple vista máis meteoros, sempre coa explicación de persoas especialistas. Como ben é sabido a denominada “chuvia de estrelas” prodúcese cando a Terra pasa a través do regueiro de partículas que os cometas deixan detrás deles no seu movemento ao redor do Sol. Tal como explica o director científico Lalín Starlight, José Ángel Docobo, estará a Lúa en cuarto crecente, pero irá baixando cara ao oeste, en tanto que hai que mirar fundamentalmente cara o leste, polo que non debe molestar demasiado o noso satélite natural a observación das Perseidas. 

O delegado territorial visitou as dependencias deste servizo en Lalín

> Redacción

A Xunta de Galicia destina uns 228.000 euros a sufragar os gastos veterinarios de materias das Agrupacións de Defensa Sanitaria Gandeira (ADSG) do Deza-Tabeirós O delegado territorial do goberno galego visitou este mes de xuño as instalacións da ADSG Xundeva en Lalín, que recibiu unha achega total de 145.400 euros na última convocatoria. O delegado territorial da Xunta en Pontevedra, Agustín Reguera, visitou o centro da ADSG Xundeva en Lalín con motivo das axudas da Consellería de Medio Rural para estas agrupacións. Reguera percorreu as instalacións da ADSG xunto aos seus responsables e interesouse por coñecer as principais necesidades e retos aos que están a facer fronte neste momento.

Esta agrupación recibiu unha axuda de 145.400 euros na última convocatoria destas achegas, correspondente ao ano 2023, dos cales 4.000 corresponden á liña destinada a adquisición de material funxible, mentres que os 141.400 restantes serán destinados a sufragar os gastos do persoal veterinario. Na comarca do Deza-Tabeirós o investimento total da Xunta nesta convocatoria foi de preto de 228.000 euros.

Sector agrogandeiro

Reguera aproveitou a visita para agradecer o traballo incansable de todos os gandeiros galegos “que se esforzan cada día nun sector tan duro como este para ofrecer uns produtos de altísima calidade”. O delegado aproveitou esta visita a Xundeva en Lalín para lembrar que “a finalidade última destas axudas é seguir mellorando o estado sanitario das explotacións gandeiras galegas con programas zoosanitarios comúns para a prevención e control de enfermidades”.

Segundo dixo o delegado territorial da Xunta, estas medidas fomentan a consolidación das ADSG, entidades que facilitan o cumprimento da normativa vixente referente á identificación, ao benestar e á sanidade animal. Mediante estas achegas, preténdese avanzar na integración de gandeiros nas ADSG, con axudas proporcionais ao esforzo económico que realizan estas agrupacións nos devanditos programas. Na súa visita, Reguera estivo acompañado polo alcalde de Lalín, José Crespo. 

A cita multicultural reuniu a numerosos artistas

> Manuel Estévez

No Pazo de Sabadelle en terras de Chantada está patente a exposición “O tempo que ficou no olvido”, que conta coa colaboración do Concello. O slogan da mostra, sacada dun texto do inesquecible escritor galego, Antón Avilés de Taramancos, pretende lembrar o tempo deses artesáns que facían que a vida da xente fora máis cómoda. Así, está dedicada a todos eles e aos oficios que había na aldea de Sabadelle: comadroa, cesteiro, ferreiro, capador, alambiqueiro, zoqueiro, entre outros.

Esta cita multicultural igualmente reuniu á artista e performance, Elena Salgueiro, aos pintores Lomarti e Xoán Guerreiro, ao escultor Tino Canicoba, a Mercedes V. Saavedra e a súa proposta de etnografía de mulleres, á Premio Nacional de Poesía, Olga Novo; á música, Carolina Rubirosa e á ourive de Compostela, Susi Gesto.

Susi Gesto desenvolveu na Casa do Losada en Sabadelle o obradoiro ‘Virxe do Faro’ para a elaboración dunha xoia para a Virxe do Faro. Do obradoiro do que participaron 25 persoas de toda Galicia resultaron dúas xoias, unha para a Virxe do Faro e outra para a filla. Colaborou da iniciativa o Concello de Chantada, o Bispado de Lugo e a Fundación Pública da Artesanía de Galicia.

Artistas

Xosé Antonio Quiroga Díaz, director do Ecomuseo Pazo de Arseriz, lembrou no acto de apertura do evento no medio rural na parroquia de Sabadelle a mulleres e homes que traballaron, viviron e partillaron nos lugares de Carballedo, Castiñeira, Stª Rosa, Cardavós, Vilameá e Fondo de Vila, unha extensa nómina de veciñas e veciños que so seu oficio artesán atenderon as necesidades do resto da comunidade e da bisbarra, entre eles Balbina González Fernández, costureira; Remigio Toubes Subiela, zoqueiro; Pura de Sudrio, parteira; Jaime González Fernández, Cubeiro; Antonio Reinoso Vázquez, capador; Antonio Vázquez Fernández, Alambiqueiro; Regina Fernández Pena, Tecedeira; José Fernández López, Xastre; Elias Varela Rodríguez, sacristán; Delfina Somoza Nodar, Tecedeira; Manuel Eiriz Fernández; Zapateiro; Silverio Ferreiro Gómez, Xarreiro/ Cesteiro; Anuncia Pérez Varela, Parteira; Dario José Ledo das Quintas, Fragueiro/Cubeiro; Luis Ledo Rodríguez, Ebanista; Tomás Figueroa, Ebanista; Manuel Ferreiro Otero, Ferreiro; Victorino Moure Nodar, Zapateiro e Manuel Estévez Méndez, Zoqueiro. 

> Lalín |Maio 2024