> Lalín |Agosto 2025

Este ano estréase o Festival BaiLalín o sábado 20 no Campo da Feira

> Redacción

Xa está listo o programa das Festas das Dores 2025, que Lalín celebrará do 19 ao 23 de setembro por todo o alto, con novidades como a estrea do Festival BaiLalín que acollerá o sábado 20 de setembro o recinto do Campo da Festa. O pregoeiro deste ano será Damián Paío, a petición do alcalde e o goberno local que o escolleu polo seu “compromiso constante coa cultura de Lalín e do Deza, tanto no ámbito profesional como no persoal, colaborando sempre de xeito desinteresado coas asociacións e colectivos, e apoiando aos artistas noveis e abríndolle camiños”.

As festas comezarán o 19 de setembro coa tradicional tirada de fogos artificiais e a música a cargo de “Tributo Sabinero”, Os Xuncos e a orquestra América de Vigo. O sábado 20, ademais do BaiLalín, o grupo La Guardia porá o prato forte musical. Tamén haberá Festival de Gaitas e as actuacións da charanga Kilómetro 0, Lira de Prado, Os Trasnos de Doade e Carballo de Manteiga. Xa o domingo 21 o programa convida aos asistentes a asistir á actuación de The Maravillosos Tenors coa Banda de Lalín, e o resto do día a música correrá a cargo da orquestra Cinema e Susie Q´s. Nesa xornada haberá ademais exhibicións deportivas e outras actuacións como a Coral de Lalín ou os Dezas de Moneixas.

Música e grandes orquestras

O luns 22 as Festas das Dores contarán coa presenza dos Festicultores e a orquestra que porá a animación nocturna será a París de Noia. Ese día a programación terá tamén exhibicións deportivas, danza e zumba e outras actuacións coma a da Banda de Vilatuxe e a Carballeira de Cercio. Para o fin de festa o 23 de setembro a música a porán a Charanga Ardores e a orquestra Panorama.

As Festas das Dores estrean este ano un festival de música electrónica, o Festival “Bailalín”, que contará con artistas de recoñecido prestixio nacional como Juanjo García, Dumroe, Carlos López, Ole Costa e Olalla González, nun espectáculo de balde que terá lugar no Campo da Feira. 

O pleno municipal aproba por unanimidade o reforzo dos servizos de saúde mental e pediatría no CIS

> Redacción

Os proxectos urbanísticos pendentes no Concello de Lalín agardan por coñecer finalmente a cifra que recibirá a capital do Deza dos 15 millóns de euros solicitados dentro destes fondos, dos que dependen entre outros asuntos actuacións coma a da améndoa central. Segundo denunciou o alcalde, José Crespo, no pleno municipal do pasado 1 de setembro, o “secuestro” destes fondos por parte do Goberno central poderían facer perigar algunhas destas actuacións polo seu retraso. Dixo Crespo que terían que terse coñecido o pasado mes de xullo, e advertiu a falta de tempo para o goberno local xa que cando se coñezan aínda se tería que encargar a redacción dos proxectos e os informes sectoriais, e “a ver canto nos dan”. O rexedor lalinense dixo que esta é unha preocupación en moitos concellos de Galicia. Houbo acordo do pleno municipal entre todos os grupos por darlle o nome de Castelao a unha rúa de Lalín con maior entidade da que ostenta agora, e renomear algúns outros viais do concello.

O rexedor anunciou a convocatoria para este mesmo mes de setembro dunha Xunta de Portavoces municipal para buscar o maior consenso posible na denominación e espazos do rueiro lalinense. Ademais de Castelao baralláronse no pleno outros nomes como Presidente Manuel Fraga, Manuel Abeleiro López ou o bispo Luís Quinteiro Fiúza.

Máis dotación para o Centro Integral de Saúde

A moción defendida polo voceiro lalinense do BNG, Francisco Vilariño, demandando reforzos nos servizos de saúde mental e pediatría no Centro Integral de Saúde acadou o apoio unánime de todos os grupos da corporación. Deste xeito o Concello de Lalín pedirá á Consellería de Sanidade a dotación dun psicólogo e un psiquiatra máis para o CIS e tamén o reforzo do servizo de pediatría pola mañá e pola tarde no centro sanitario, un servizo que segundo denunciou Vilariño, arrastra eivas na sanidade pública lalinense. O pleno de setembro de Lalín tamén acordou por unanimidade rexeitar a proposta da nova Política Agraria Común a partires de 2028 presentada pola Comisión Europea e demandar do goberno estatal que defenda o mantemento das actuais axudas para un sector primario que é fundamental en Lalín. 

A Xunta de Galicia impulsa obras por case 10 millóns de euros en colexios e institutos

> Redacción

Os centros educativos da comarca do Deza están a experimentar unha gran modernización a través do Plan de nova arquitectura pedagóxica. Este plan inclúe arredor dunha trintena de actuacións na zona, cun investimento total de 9,7 millóns de euros desde 2021.

A actuación de maior envergadura é a ampliación do Instituto Ramón Mª Aller Ulloa, en Lalín, cun orzamento de preto de 3,4 millóns. Licitada a comezos de verán, esta actuación consiste na construción dun novo edificio de 2.164 metros cadrados no que se situarán espazos para os ciclos de FP da familia de Informática e Comunicacións, na que se centra a oferta do centro. Tamén se realizan intervencións puntuais nas edificacións existentes, como a apertura de xanelas e o acondicionamento dun almacén, entre outras.

Tamén en Lalín, destacan proxectos como a central de biomasa que se instalou no Colexio Xesús Golmar cun investimento de 1,3 millóns, ou a rehabilitación integral do Colexio Xoaquín Loriga con 661.000 euros.

Outras actuacións xa rematadas

Entre as intervencións destacadas na comarca tamén se sitúa a rehabilitación integral do Colexio Plurilingüe de Agolada, que actualmente se atopa en execución cun orzamento de máis de 611.000 euros. Con esta obra búscase a mellora da eficiencia enerxética do centro, polo que se están acometendo actuacións de illamento térmico e a renovación de fiestras e portas, entre outras.

Tamén son relevantes as actuacións xa rematadas no Colexio Plurilingüe de Rodeiro para o cambio das fiestras por case 500.000 euros ou a reforma de aseos e substitución de cubertas por 420.000 euros no Colexio Plurilingüe de Silleda. Tamén as melloras sectoriais e da cuberta, así como instalación eléctrica e fotovoltaica, no Colexio Pío Cabanillas Gallas, en Dozón, cun orzamento de 286.000 euros.

Ademais, no marco da segunda fase do plan, que se estende ata 2028 están previstas obras de cubrición do patio do Colexio Plurilingüe de Silleda cun importe de 46.000 euros.

A través do Plan de nova arquitectura pedagóxica, cun orzamento de preto de 500 millóns de euros, a Consellería de Educación está a renovar e modernizar os centros educativos ante as necesidades do novo ensino do século XXI, con espazos máis amplos, versátiles, flexibles e multidisciplinares.

A parroquia lalinense de Doade celebrou “26 anos mallando”

> Redacción

A parroquia lalinense de Doade acolleu o pasado mes de agosto a XXVI edición da Festa da Malla Tradicional, un evento Festa de Interese Turístico de Galicia que volveu rexistrar un cheo absoluto en público e participación. Desde media mañá o evento organizado pola Asociación de Amigos Museo Casa do Patrón comezaron as celebracións de “26 anos mallando” coa apertura dunha mostra de artesanía con dez postos de artesáns e artesas chegados desde toda Galicia. O alcalde de Lalín e o conselleiro de Educación, José Crespo e Román Rodríguez asistiron ao evento en Doade.

O programa coñezou coa apertura da mostra de artesanía, ademais doutra exposición de maquinaria e pintura, cunha selección de artistas locais e da contorna. Os primeiros compases musicais da festa correron a cargo dos Trasnos de Doade cun pasarrúas que animou o comezo da festa. A malla tradicional comezou a mediodía en Doade coa recreación das cinco modalidades de malla que existen en Galicia. Logo do traballo duro de mallar puxo a música a charanga Ardores.

Houbo como cada ano un xantar popular, de novo multitudinario, ao que seguiu a celebración do XI Serán da Malla, coa participación de numerosos grupos e bandas de música tradicional que amenizaron a tarde logo do traballo e o desfrute aos centos de asistentes a este encontro indispensable do final do verán en Lalín. No serán deste ano participaron a Banda de Gaitas do Irixo, os Amigos do Acordeón Terras de Celanova, a agrupación O Carballo da Manteiga, Os Dezas de Moneixas, as panderedteiras da Xariza de Parada, Os Rexumeiros e unha actuación conxunta do grupo tradicional Mistura e os Trasnos de Doade. Pechou a festa musical o grupo Ailá de Compostela.

150 anos da Banda de Muimenta

Tamén o pasado mes de agosto inaugurouse a exposición fotográfica dos 150 anos da Banda de Música Popular de Muimenta, a banda decana máis antiga do municipio e unha das máis lonxevas de toda Galicia. No Auditorio Municipal conmemoráronse os 150 anos de traxectoria ininterrompida facendo música, conducida por 12 directores durante a súa historia. A presentación contou coa asistencia de amigos e familiares de moitos músicos que forman e formaron parte desta agrupación.desta gran agrupación ao longo do tempo. As imaxes da exposición actúan coma unha banda sonora visual que percorre a súa longa traxectoria. 

As beneficiarias foron 4 familias de Lalín centro e outras de Soutolongo, A Penela, Vilatuxe e Filgueira

> Redacción

> Lalín |Xullo 2025

Crespo e Lorenzana mantiveron un encontro de traballo arredor da marcha e a execución do proxecto 

> Redacción

A Xunta de Galicia avanza na redacción do proxecto de urbanización da ampliación do Parque Empresarial Lalín 2000, tras a remisión por parte do Concello de Lalín dos informes sectoriais incorporados ao documento definitivo cuxa elaboración concluirá no vindeiro mes de setembro. A conselleira de Economía e Industria, María Jesús Lorenzana, mantivo un encontro co alcalde de Lalín, José Crespo, no que analizaron as distintas demandas e necesidades do concello en materia de solo industrial.Na reunión, a conselleira indicou que o obxectivo é dotar a comarca do Deza do solo empresarial necesario que contribúa ao seu desenvolvemento económico, facilitando o asentamento de novas iniciativas empresariais ou a ampliación das xa existentes, xa que nestes momentos non hai espazo dispoñible. Así, coas novas actuacións, o Parque Empresarial Lalín 2000 contará con 313.497 metros cadrados, que se sumarán aos 536.758 metros cadrados actuais, polo que este polígono disporá dunha superficie total de 850.255 m².

O proxecto de urbanización foi aprobado inicialmente polo Concello de Lalín que, tras o proceso de exposición pública, remitiu todos os informes sectoriais a Xestur para a elaboración do documento final, que se aprobará definitivamente no mes de setembro. Así mesmo, a previsión é que a 4ª fase do Lalín 2000 se licite dentro do último trimestre do ano.

Máis solo industrial

O Goberno galego, a través de Xestur, ten previsto unha inversión de 22,6 millóns de euros para ampliar nun 58,4% a capacidade do parque. Deste xeito, xa investiu 4,5 millóns de euros para adquirir a totalidade dos terreos e ten cedido temporalmente as parcelas ao centro social de Filgueira. Ademais, xa destinou 366.000 euros para o reforzo da subestación eléctrica e está a tramitar a autorización da liña de media tensión dende a subestación ata o parque. Segundo asegura nun comunicado, a Xunta de Galicia está a impulsar diferentes proxectos para dotar a provincia de Pontevedra de máis solo industrial. 

Avelino Souto será voceiro do goberno e asume Política Social, Igualdade e Xuventude

> Redacción

O alcalde de Lalín, José Crespo, vén de acometer no mes de xullo unha remodelación das áreas e o organigrama do seu goberno coincidindo co ecuador do mandato municipal, e coa intensión segundo explicou de “reforzar” áreas como os servizos sociais que, polas súas particularidades, “precisan de atención diaria permanente”. Logo desta remodelación Avelino Souto levará as áreas de Política Social (con sección específica de Infancia) e Igualdade, Xuventude e voceiro do Goberno. Carmen Canda será responsable das áreas de Muller (CIM), Cemiterios e Envellecemento ActivoNoelia Seijas se encargará das áreas de Sanidade e Deportes. O alcalde explicou que, ademais de optimizar a atención diaria en servizos sociais, vanse reforzar as áreas Vivenda, Promoción Económica e Axenda Urbana, entre outras, coa creación de novos espazos de traballo municipal. Deste xeito a área de Vivenda, unha concellería da que é titular Pablo Areán, terá un novo impulso coa dotación dunha sección específica de políticas relacionadas coa vivenda, “como un dos eixos estratéxicos do mandato”.

Reforzos e novas áreas

Tamén na área de Industria, Crespo anunciou o reforzo da Concellería de Promoción Económica, adscrita a Beatriz Canda, coa creación dunha sección específica dedicada a fortalecer a coordinación co departamento autonómico de Economía e Industria, a Consellería da Xunta da que é responsable María Jesús Lorenzana..

As competencias en Axenda Urbana, responsabilidade de Paz Pérez, terán tamén seu “reforzo específico” para as áreas parroquiais. Na competencia sobre Cemiterios “unha das principais prioridades deste mandato”, segundo o goberno local, vaise centrar os vindeiros dous anos na posta en marcha da nova fase de Fraga do Alén e na mellora do cemiterio vello, baixo a responsabilidade de Carmen Canda. Outra das políticas de reforzo do goberno de Crespo ten que ver co Envellecemento Activo, creando unha nova área da Concellería de Carmen Canda, coa intención de potenciar todas as políticas que teñen que ver coas persoas maiores e as súas actividades tanto no rural como no urbano. 

Concertos, romarías, estrelas e actuacións infantís nun programa para todo o mes

> Redacción

A programación de “Agosto en Lalín” reúne concertos (de clarinete, das bandas lalinenses, de dúos e tríos e o espectáculo “O Gran Guateque”) e festas como a XXXI Romaría Interxeracional ou a XXVI Malla Tradicional, así como actividades promocionais do destino Lalín Starlight e actividades infantís, entre elas o Xoga Lalín que se desenvolve todos os mércores entre ás 16.30 e 20.30 h., alternativamente entre a Praza da Igrexa e a Praza de Europa. Así o venres, 1 de agosto, terá lugar a última xornada do VI Galicia Clarinet Fest, o festival de clarinetes máis importante de Europa que se celebra entre o 28 xullo ao 1 de agosto en Lalín baixo a dirección artística de Xocas Meijide.

O sábado 2 de agosto iniciaranse os concertos das bandas de música lalinenses na rúa que se desenvolverán durante o verán. Será co concerto da Banda A Lira de Prado, ás 19 horas na Praza da Torre. Ao día seguinte, o domingo 3 de agosto, ás 19 horas e na rúa Rosalía de Castro actuará a Banda de Música Popular de Muimenta.

O 3 de agosto será a XXXI Romaría Interxeracional que terá lugar na orixinaria Carballeira de Barcia a partir das 12 horas. O martes 12 de agosto no marco das actividades promocionais de Lalín Starlight terá lugar a Noite das Perseidas, que terá por obxecto fundamentalmente poder contemplar a simple vista desde o Alto de Rodelas as Perseidas, coa explicación de persoas especialistas como o director científico de Lalín Starlight, José Ángel Docobo, Luca Piccotti, Ángel Castro, Nerea Puime e David Area.

“O Gran Guateque”

O xoves 7 de agosto terá lugar o espectáculo “O Gran Guateque” na Praza da Igrexa ás 21.00 horas con Micky, Fórmula V e Pablo Abraira que interpretarán vellos temas que foron grandes éxitos. A actuación é gratuíta a partir das 21 horas na Praza da Igrexa.

Ao longo de todo mes irá sucedéndose unha completa programación que inclúe, o sábado 23, a XXVI Malla Tradicional de Doade, Festa de Interese Turístico Galego, que se desenvolverá en Codeseda (Doade) a partir das 11 horas. 

Serán 17 vivendas nunha parcela cun investimento estimado de 3,3 millóns de euros

> Redacción

A conselleira de Vivenda e Planificación de Infraestruturas, María Martínez Allegue, participou na reunión do consello de administración da Sociedade de Vivenda Pública de Galicia, que deu conta da adxudicación da redacción dos proxectos para a construción de 129 vivendas de promoción pública na Estrada, Lalín, Teo e A Coruña, o pasado 19 de xullo. No concello de Lalín construiranse 17 vivendas de promoción pública nunha parcela emprazada na Rolda Leste-Agro de Lalín de Arriba. A redacción do proxecto e dirección de obra será adxudicada a Germán Gómez Espejo por importe de 118.580 euros.

A estimación do investimento total nesta obra é de 3,3millóns de euros, segundo anunciou a Consellería de Vivenda en nota de prensa. En relación ao concello da Estrada, o consello de Vipugal autorizou a adxudicación á UTE Garitaonaindia-Amenedo o contrato para a redacción do proxecto e dirección de obra para a construción de 28 vivendas, na parcela cedida polo municipio, situada na Avenida de Vigo. O importe de adxudicación será de 205.666,63 euros con IVE incluído. A estimación do investimento total nesta obra é de 5,3 millóns de euros.

Dous meses para elaborar os proxectos

Tamén se autorizou a adxudicación da redacción do proxecto e dirección de obra para a construción de 26 vivendas de promoción pública no solo cedido polo concello de Teo na zona das Galanas. Este contrato será adxudicado a Sabin-Blanco Arquitectos S.L.P. por importe de 207.116,91 euros. A estimación do investimento total nesta obra é de 4,9 millóns de euros.

Finalmente, o proxecto para a construción de 58 vivendas na parcela 5D dos Rosais, na Coruña, será adxudicado á UTE Naos 04 Arquitectos – Manuel Vázquez Muiño por importe de 369.050 euros. A estimación do investimento total nesta obra é de 11 millóns de euros. Todos os adxudicatarios dispoñen dun prazo de dous meses para a redacción do proxecto básico e tres meses máis para o de execución.

No que vai de ano, máis de 5.000 peregrinos percorreron xa esta ruta cara Compostela

> Redacción

O Consello da Xunta aprobou en xullo obras de mellora na Vía da Prata, tamén coñecida como Camiño do Sueste ou Mozárabe. En concreto, as actuacións desenvolveranse na intersección deste itinerario coa N-525 no punto quilométrico 295+000 e suporán unha mellora da seguridade viaria dos peregrinos que percorren esta ruta xacobea. Segundo os datos facilitados polo Goberno galego, no que vai de ano, máis de 5.000 peregrinos percorreron xa o Camiño Mozárabe, que medra a un ritmo do 4 por cento. O proxecto aprobado onte prevé a construción dunha ponte elevada sobre esta estrada nacional, por onde transita parte do itinerario, ao seu paso por Bendoiro. O obxectivo é garantir a seguridade das persoas que realizan esta ruta, ao eliminar o cruzamento a nivel entre o Camiño de Santiago e a N-525 nun treito cunha configuración viaria de alta complexidade. As características da estrada neste punto, con catro carrís de circulación, incluíndo un carril por sentido, un carril central de espera e cuñas de deceleración para o acceso ao vial local, fai que a opción máis segura sexa a través da ponte. Coa construción desta nova infraestrutura, deberase variar lixeiramente o itinerario do Mozárabe.

Mellora da seguridade viaria dos peregrinos

Desde a Xunta de Galicia aseguran que están a apostar pola mellora da seguridade viaria do Camiño de Santiago, cun investimento global de 43 millóns de euros no horizonte 2027 que inclúen un plan específico de mellora viaria e outras actuacións financiadas con fondos europeos Feder. Por un lado, Turismo de Galicia conta cun plan específico de mellora da seguridade viaria no Camiño de Santiago no que inviste 40 millóns ao que se suman outras actuacións con fondos europeos por un importe de 3 millóns de euros.

Con este proxecto queren incrementar a protección a camiñantes, así como a accesibilidade. Para isto, crearanse sendas peonís e eliminaranse cruzamentos en estradas, entre outras actuacións.

Concertos e recitais na sexta edición do evento, que reuniu este ano 65 clarinetistas

> Redacción

As prazas, rúas e espazos musicais de Lalín volveron acoller, por sexto ano, o Galicia Clarinet Fest, un evento musical que coloca á capital do Deza como referente internacional da música clásica. Nesta edición participaron 65 clarinetistas chegados de todo o mundo, e docentes musicais do máis prestixioso do panorama internacional. Concertos nas prazas, recitais e unha gran acollida dos participantes marcaron o éxito desta nova edición do evento.

As actividades comezaron o 27 de xullo cun concerto de benvida a cargo dun ensamble de clarinetes baixos dirixido por David Fiúza na Praza da Torre de Lalín. O director artístico do festival éo clarinetista Xocas Meijide. Nos cinco días deste V Galicia Clarinet Fest Lalín acolleu máis de 10 concertos. No Salón Teatro do Auditorio celebrouse o espectáculo Sonoro infinito, que combina o virtuosismo do clarinetista Manuel Martínez coas últimas tecnoloxías audiovisuais, unha experiencia sensorial única que presentou en Lalín o narrador Celso Fernández Sanmartín.

Os maiores virtuosos a nivel internacional

Un recital de piano cos mellores profesores de España; outro recital da clarinetista Edurne Zabalo co acordeonista Gorka Hermosa, a Real Filharmonía de Galicia dirixida por Estellés r con Juan Ferrer, Espasandín e Meijide como solistas fixo de Lalín a capital do estreo mundial de Paradoxe, de Alexandre Kosmicki.

Do elenco de profesores formaron parte este ano Michelle Anderson, profesora da British Columbia University; Juan Ferrer, clarinetista solista da Orquestra Sinfónica de Galicia e José Luis Estellés, profesor da Hochschule für Musik and Köln de Berlín, xunto con prestixiosos profesionais como Josep Fuster, profesor da ESMUC de Cataluña; Manuel Martínez, clarinete solista da Banda Municipal de Barcelona; Emilio Alonso Espasandín, requinto na Orquesta Nacional de Cannes; David Fiúza, director da Banda Sinfónica de Galicia; Xocas Meijide, profesor na Universidade do Minho en Braga e na Academia Internacional de Galicia e a pianista lalinense, Alicia González Permuy.

Lalín Destino Turístico Starlight acollerá actividades este mes de agosto

> Redacción

Unha vez máis, as actividades de “Lalín Destino Turístico Starlight” acadaron un notable éxito de participación co Roteiro das Estrelas en Bermés, celebrado na noite do Día de Galicia. Unhas 120 persoas, superando amplamente as previsións iniciais, tomaron parte nesta expedición que combinou astronomía e historia. Os participantes, incluíndo o alcalde José Crespo, o concelleiro Miguel Medela, veciños e representantes da Comunidade de Montes de Bermés, percorreron lugares emblemáticos vinculados ao primeiro científico galego, o Matemático Rodríguez.

A ruta, guiada polo director científico de Lalín Starlight, José Ángel Docobo, xunto coa investigadora Carmen Villanueva e o cronista oficial Daniel González Alén, iniciouse na Fonte Castiñeroa (O Vento), lugar onde o Matemático situou o centro de Galicia, para despois visitar a casa natal de José Rodríguez González (Bermés do Fondo) que foi posible vela grazas á colaboración da familia que se dispuxo a abrila. Tamén visitaron o busto de Rodríguez no campo da festa e a igrexa onde fora bautizado. O roteiro rematou cunha observación astronómica a simple vista desde o campiño próximo á igrexa. Esta actividade enmárcase na homenaxe que o Concello de Lalín, en colaboración con outras institucións, rende ao Matemático Rodríguez no bicentenario do seu falecemento.

Actividades en agosto

“Lalín Destino Turístico Starlight” seguirá este mes de agosto con dúas actividades programadas. O 12 de agosto o Destino Starlight vivirá a Noite das Perseidas desde Rodelas, unha actividade na que participarán expertos para explicar este fenómeno anual. Para quen desexe acudir haberá autobuses desde Loriga para desprazarse. O 20 de agosto o Museo Ramón María Aller acollerá unha charla da astrónoma Eva Seijas, e tamén está programada unha observación telescópica desde o Observatorio conducida por Luca Piccotti. Precisamente en xullo o conselleiro de Educación, Román Rodríguez, visitou o Observatorio Astronómico Ramón María Aller Ulloa para celebrar os 100 anos da chegada a
Galicia -a Lalín- do refractor Steinheil, un telescopio crucial para as observacións do lalinense Ramón Aller, pioneiro da astronomía galega.