> Deputación |Decembro 2024

Agolada, Dozón, Lalín, Rodeiro, Silleda e Vila de Cruces serán beneficiados

> Redacción

O presidente da Deputación de Pontevedra, Luis López, salienta o investimento de case 16 millóns de euros nos concellos das comarcas do Deza e Tabeirós-Terra de Montes a través de programas como o +Provincia, o Plan Extraordinario de Infraestruturas Deportivas, o PON2030 ou en diversas actuacións do servizo de Infraestruturas.

Nun almorzo informativo en Lalín con medios de comunicación de ámbalas dúas comarcas e no que tamén participou a deputada provincial Belén Cachafeiro, o mandatario provincial sumou ao balance do ano o impulso que a Deputación outros preto de 2 millóns de euros distribuídos en áreas como a cultura, con máis de 300.000 euros para apoiar a 364 entidades culturais; o deporte, con case medio millón de euros para apoiar ata 59 actividades impulsadas por clubs deportivos; os máis de 320.000 para a Finca de Mouriscade ou o medio millón dirixido á acción comunitaria, con axudas a 54 entidades veciñais ou comunidades de usuarios de augas.

Aposta polo rural

“Apostar polo rural é apostar pola nosa forma de vida, polas nosas tradicións, pola nosa economía e por manter con vida as nosas vilas e aldeas. Porque polo Deza e Tabeirós pasan moitos camiños, non só o que nos leva a Compostela, tamén a encrucillada do Reto Demográfico, a desestacionalización e descentralización do turismo ou a sustentabilidade, que por primeira vez se ten en conta no reparto de fondos provinciais”, subliñou o presidente Luis López.

Antes de entrar a debullar polo miúdo o feito neste ano nos oito concellos —Agolada, Dozón, Lalín, Rodeiro, Silleda, Vila de Cruces, A Estrada e Forcarei— que integran estas dúas comarcas, o dirixente provincial repasou a pegada da acción da Deputación en distintos ámbitos da vida social deste territorio. A nivel investimentos, o +Provincia serviu para impulsar iniciativas por valor de preto de 8 millóns de euros; o PON2030 preto de 4 millóns; o Plan Extraordinario de Infraestruturas Deportivas, medio millón; e a través do servizo de Infraestruturas outros preto de 4 millóns de euros un 40% máis que o ano pasado; ou a nova liña de formación laboral xunto coas asociacións empresariais, por 150.000 euros.

Lalín e Rodeiro os que máis recibirán o vindeiro ano

> Redacción

Por concellos, o presidente da Deputación destacou os investimentos de preto de 1,6 millóns de euros en Lalín para financiar o 80% da construción do edificio polivalente en Carragoso (560.000 euros), para ampliar o Lalín Arena (280.000 euros) ou para apoiar a compra dos terreos da Gran Plaza (730.000 euros); en Rodeiro os preto de 1,5 millóns de euros destinados á pavimentación de viarios (medio millón de euros) ou á humanización da rúa B, na contorna do colexio público (425.700 euros); en Agolada os preto dun millón de euros para remodelar a piscina municipal (543.000 euros do PON2030 e Plan Concellos) ou a mellora de camiños municipais (413.000 euros).

No caso de Dozón destacou López os máis de 518.000 euros e para a reposición do firme na estrada provincial EP-6101 entre Bidueiros e Amoedo; en Silleda os preto de 1,3 millóns de euros para a mobilidade peonil no centro de Bandeira (120.000 euros), para a mellora de camiños (370.000 euros) ou para a mellora da mobilidade peonil da Avenida Recinto Feiral e rúa Arturo Pérez Lázara (760.000 euros) e en Vila de Cruces os 420.000 euros para obras en estradas e camiños municipais.

> Deputación |Novembro 2024

López e Crespo repasaron os últimos investimentos da institución provincial e novos proxectos

> Redacción

O presidente da Deputación de Pontevedra, Luis López, destacou o pasado 22 de novembro os preto de 615.000 euros destinados á mellora da mobilidade peonil na estrada provincial EP-6007, ao seu paso pola localidade lalinense de Cercio, como unha nova mostra do compromiso do goberno provincial coa modernización da rede viaria e da cooperación cos concellos. Acompañado pola deputada de Infraestruturas, Isabel Couselo, o mandatario provincial asinou co alcalde de Lalín, Jose Crespo, o convenio para a construción dunha senda peonil nun treito de 300 metros desta estrada para o que a Deputación achega o 70% do custo total da obra, uns 430.000 euros.

“Estamos diante dunha nova mostra de que a Deputación é unha administración que cumpre coas súas competencias en mantemento e mellora de estradas, e neste punto a deputada Isabel Couselo está a facer un labor exhaustivo, fundamental e imprescindible; que cumpre co seu deber de cooperar cos Concellos; e que cumpre coa súa vocación de modernizar servizos e infraestruturas”, afirmou o presidente Luis López antes de asinar o acordo.

Proxecto para Cercio

O proxecto céntrase nun treito de 300 metros da EP-6007, que conecta as localidades Goleta e Brántega, ao seu paso polo núcleo poboacional de Cercio. Nesta zona habilitarase unha senda peonil para mellorar a seguridade viaria de peóns e condutores, así como unha zona de convivencia con preferencia para as persoas. A actuación conlevará a implantación de velocidade reducida e elementos de calmado de tráfico, así como a mellora da imaxe da estrada a través do soterramento das liñas eléctricas e demais servizos urbanos.

Non é a primeira acción de colaboración entre a Deputación e o Concello de Lalín en materia de insfraestruturas viarias. Recentemente deuse por rematada a obra de mellora da EP-6005 en Lalín cun investimento total de 324.000 euros, dos que o ente provincial achegou o 80%; ou a mellora pavimento en distintos treitos das estradas EP-6002, EP-6007 ou EP-6009 ao abeiro do acordo marco de conservación de firmes cun investimento de máis de 280.000 euros.

A directiva da banda reuniuse en Pontevedra coa Deputación

> Redacción

O presidente da Deputación de Pontevedra, Luis López, xunto co deputado de Cultura, Jorge Cubela, mantivo o pasado 20 de novembro un encontro coa dirección de Asociación de Amigos da Banda de Música de Agolada. Durante a reunión, o presidente provincial garantiulles ás membras da directiva da banda agoladesa “o apoio da Deputación tanto para a banda como para a escola de música que xestionan”. Explicou Luís López que “a asociación realiza un labor fundamental para a dinamización cultural do concello e de toda a contorna”.

Tamén o presidente provincial fixo fincapé en que este “é o colectivo máis numeroso do municipio, realiza actividade durante todo o ano, e polo tanto resulta imprescindible para o municipio. Merece a pena apoialo e coidalo”.

No encontro, que tivo lugar no despacho presidencial do Pazo provincial despois de que o pasado luns o solicitaran desde a directiva do colectivo e no que participaron a secretaria da asociación, María Crespo; e a tesoureira Raquel Fernández, o titular do goberno da Deputación avanzoulles a vontade do ente provincial de establecer vínculos de colaboración coa agrupación que permitan soster as funcións da agrupación. Entre elas, a nova liña de compra de instrumentos e vestiario dotada con 200.000 euros.