> Agolada|Agosto 2025
A exposición o Plan Económico e Financeiro do Concello para 2025-2026
O PP insta ao alcalde a pedir unha oficina de información das axudas polos incendios
> Redacción
Desde o pasado mes de agosto o sitio web do Concello de Agolada ten a disposición das veciñas e veciños, no seu apartado de sede electrónica, o Plan Económico y Financeiro para os anos 2025-2026. O documento foi aprobado en pleno o pasado 14 de xullo e segundo o goberno municipal servirá para conter o gasto nas arcas municipais. Logo da súa publicación no Boletín Oficial da Provincia (BOP) o documento está a dispor da veciñanza para que coñezan a estratexia do goberno local a nivel económico para o que queda de exercicio de 2025 e o vindeiro ano 2026.
Por outra banda, e de cara ao vindeiro pleno, o PP de Agolada vén de presentar unha moción para instar ao alcalde, Luís Calvo, a que pida da Xunta unha das oficinas de información e asesoramento arredor das axudas a particulares, empresas e explotacións gandeiras provocadas no concello pola vaga de lumes do pasado mes de agosto. O Concello de Agolada rexistrou o pasado 15 de agosto un dos incendios decretados en Galicia con situación 2, o das parroquias de O Sexo e Agra, que finalmente calcinou máis de 500 hectáreas, ameazando vivendas na parroquia e queimando bolos de herba de gandeiros locais.
Outras medidas para o rural agoladense
Ademais, en nota de prensa, o PP agoladense tamén pide medidas como qun plan de axuda a reforestación do monte queimado, a semellanza do programa “50.000 arbores mais”, do veciño concello de Lalín, cun “un reparto de frondosas autóctonas a propietarios do monte nas áreas queimadas como medida de reforestación co fin de recuperar as áreas queimadas“. Os populares tamén fan fincapé na aposta porque na zona se acaben decretando as concentracións parcelarias “que recentemente tiveron o visto bo a sua viabilidade logo do preceptivo e vinculante estudo de incitación”, e indican que “seguirán traballando para ter en breve boas novas acerca do inicio das mesmas”. Aposta tamén o PP por charlas e obradoiros para promover a agricultura extensiva na zona.
“Oficio de Labregos”, unha exposición fotográfica en homenaxe á xente e a forma de vida do rural
Ángel Utrera retratou por temáticas e aldeas a esencia do rural, xunto con textos de García Porral, Otero ou Ana Vila
> Redacción
O veciño de Agolada, fotógrafo e articulista do Periódico Lalín e Comarca, Ángel Utrera, vén de expoñer nos Pendellos a mostra “Oficio de Labregos”, un traballo en homenaxe “á xente e á forma de vida no rural” compilado en imaxes por temáticas e aldeas sobre temáticas coma a matanza, os santeiros, corredoiras e congostras ou benditas mans, a carón desta exposición fotográfica textos de profesionais reputados da cultura do país como Ana Vila, David Otero ou Juan Carlos García Porral. A mostra estivo xa a exposición na Ribeira Sacra, en Ourense, Lalín, Silleda e Melide. No mes de agosto rematou o seu periplo na Agolada.
Ángel Utrera quixo dedicar esta exposición “aos meus netos, si é que acaso chegan a nacer”. María, Isaura, Carme, Neves, Xosé, Argemira, Pilar, Flora, Juan, Francisco e tantos outros son “esta mostra pequena no infinito libro a vida que vendemos, a vida a seguir, o futuro atemporal, o presente que camiña da man dos seus pasados e que o fotografo sen recato”. Súmanse a eles Manuel, Xosé, Neves, Carme, Alicia, Avelina, Flora, unha “estampa do presente inventado polo ollo imperfecto do fotografo que xoga con eles, coma homenaxe ós que recorreron aqueles rueiros, aquelas congostras, aqueles camiños, tantos e tantos sendeiros como venas polas que corre o sangue desta vida enfebrecida que nos todos inventamos ou soñamos”, explica Utrera.
O libro que agarda ser
Utrera decidiu facer esta exposición dun proxecto que inicialmente era o dun libro “no que colaboraban cos seus artigos cinco escritores do pais, que de momento segue sen concretarse nin materializarse, polo que continua a ser un proxecto”. Mentres o libro se fai realidade, a mostra percorreu parte do país amosando o “duro oficio de labregos” uns oficios que Ángel Utrera sinala que “non coñecemos se non a través das imaxes roubadas dos ollos amigos do fotografo”.
Explica o autor que coas fotografías desta exposición ao longo do tempo tentou “o imposible: atrapar a vida mesma, o espírito do que posa ante eles, as veces un pousado ou tamén, porque non, un roubado”.
> Agolada|Xullo 2025
Preocupación entre a veciñanza polo estado do encoro de Portodemouros
O indicador de contaminación do encoro duplica ao das Conchas
> Redacción
As veciñas e veciños da parroquia de Brocos (Agolada) levan máis dun mes preocupados pola evolución que están a ver no encoro de Portodemouros, tanto pola redución do seu caudal de xeito “alarmante” como pola presenza frecuente de episodios de contaminación como “escumas e cor verde na auga”, segundo explicaron algún veciños a este xornal. Denuncian que no último mes está a baixar “de xeito preocupante” o nivel da auga do encoro, algo que segundo explican desde Naturgy -concesionaria do aproveitamento hidroeléctrico deste encoro- débese a que están a realizar “traballos de mantemento e mellora do aliviadoiro da presa”, unhas obras que obrigan a baixar o caudal para poder acometelas e que, asegura Naturgy “están perfectamente informadas e autorizadas por Augas de Galicia”, o ente dependente da Xunta de Galicia con competencias neste encoro.
O certo é que na zona do Agolada Clube Náutico en Brocos a antiga aldea está a emerxer entre a auga, onde xa é visible parte dos restos de construcións da antiga aldea do Marquesado anterior ao encoro, que comezou a funcionar o 1 de marzo de 1968 e dispón dunha concesión para o seu aproveitamento hidroeléctrico até o ano 2062. Na zona o Proxecto Gama de Altri-Greenalia, ten pedida unha captación de 46 millóns de litros de auga ao día durante 75 anos, para abastecer á macrocelulosa que queren construír en Palas de Rei e que tamén en Agolada ten unha ampla contestación social.
Índices de contaminación
As denuncias veciñais refírense tamén ás verteduras e a presenza de cianobacterias recorrentes no encoro. Non van desencamiñados porque segundo os últimos datos do Xeoportal do Ministerio para a Transición Ecolóxica e o Reto Demográfico (Miteco) Portodemouros duplica o valor do indicador de contaminación dos encoros que ten, por exemplo, o das Conchas, sobre o que unha sentencia do Tribunal Superior de Xustiza de Galicia (TSXG) vén de darlle á razón aos veciños e condenar á Xunta e á Confederación Hidrográfica do Miño Sil por esta contaminación.
Os datos do Miteco sitúan en Portodemouros un valor de 24,26 nanogramos por litro a presenza destes pigmentos indicadores da contaminación, que nas Conchas é de 12,6 ng/l.
Sen avances das parcelarias de Agolada oito meses despois de anunciar a Xunta a reactivación
> Redacción
En outubro de 2024 a directora xeral de Agader, Paz Rodríguez, anunciaba nun encontro con veciños na parroquia agoladesa de Eidián a publicación o 5 de novembro no Diario Oficial de Galicia (DOG) do estudo previo de inicio das zonas de reestruturación parcelaria paralizadas en Agolada desde fai máis de 20 anos e que afectan a A Baíña-Berredo-Órrea, Agra-O Sexo-Val de Sangorza e Basadre-Eidián-Ramil. Oito meses despois dese anuncio o BNG vén de denunciar que segue sen haber pasos adiante nestes procesos demandados fai décadas pola veciñanza e nos últimos tempos reivindicados pola Asociación Queremos Parcelarias en Agolada.
A deputada do BNG Ariadna Fernández, que xa presentou varias iniciativas a respecto esta lexislatura no Parlamento de Galicia, denunciou en xullo que estas tres zonas de reestruturación parcelaria propostas en Agolada “poderían estar decretadas a principios de ano segundo o que marca a lei”, pero diante da inacción da Xunta de Galicia “mentres non se decreten non hai límite de tempo para os traballos”. A deputada nacionalista cree que a Xunta “segue alongando todo o que pode o proceso, acolléndose a que non existe prazo legal” para os decretos.
A veciñanza leva máis de 20 anos agardando
Estas concentracións parcelarias paralizadas desde fai máis de 20 anos en Agolada permitirían reordenar 1.359 hectáreas nas parroquias de A Baíña, Berredo e Órrea, outras 1.156 nas de Agra, O Sexo e Val e outras 1.438 en Basadre, Eidián e Ramil.
O investimento para a reordenación sería de 11 millóns de euros. Desde a Asociación Queremos Parcelarias xa denunciaron que a paralización destes proxectos está a poñer en risco explotacións e proxectos futuros na zona.
Ariadna Fernández advirte tamén de que “estes retrasos continuados” poden provocar que cando as parcelarias se fagan efectivas “non queden explotacións xa na zona, como ten pasado noutros lugares”. Advirte a deputada do BNG que “despois a escusa será que os datos de UGM inscritas nos rexistros oficiais son baixos, como pasa no caso de Brocos e Sesto”, que quedaron fóra deste proceso.
Contacto
Director Xerente: Manuel Núñez Fiuza
Deseño e maquetación: Bearisa
Colaboradores: Iago Mouriño, Bartolo Landiño, Tomás Troitiño,
David Devesa, Luis Lince, Pedro Carrio, Manuel Estévez e González Bearisa.
Administración-Publicidade: Rúa Calzada 11, 4º B - Lalín.
Tlf.: 986 780 615
986 780 615 • Fax: 986
780 615 • Móvil: 625 120 810625 120 810
e-mail: manuelfiuza@gmail.com
www.lalinecomarca.es
Versión para imprimir 