> Silleda| Xullo 2018

O alcalde de Silleda Manuel Cuiña e o arquitecto do proxecto da nova casa consistorial de Silleda, Abraham Castro, presentaron o deseño do que será o futuro edificio nun acto público que tivo lugar na actual Casa da Cultura, onde se ubicarán as novas dependencias municipais. Co lema “Naturalmente Noso”, a nova casa consistorial poñerá a Silleda á vangarda en dependencias municipais en toda a Comarca.
Coa distribución do novo edificio preténdese reunir tódolos servizos coas súas dependencias correspondentes na planta baixa, quedando a parte superior para as depedencias administrativas, a alcaldía e o salón de plenos. 
As fachadas dos dous edificios contarán con materiais unificados e estarán unidos por unha pasarela tamén con dotación simbólica: cun sistema de vigas de 33 pezas que representan a cada unha das parroquias silledenses. En total a intervención contará cunha superficie construída de 1.510 metros cadrados, e unha superficie total útil de máis de 1.020 metros cadrados. O entorno da nova casa consistorial adaptarase á realidade urbanística.

> Lalín| Maio  2018

A nova normativa da Xunta en materia de xestión de biomasa forestal e corta de “árbores ilegais” está a xerar tamén na Comarca do Deza un regueiro de dúbidas ao respecto da súa aplicación. Diante desta incertidume a Consellería do Medio Rural publicou o pasado 7 de maio unha instrución na que se delimitan as competencias de cada administración e dos particulares para levar a cabo as obrigas que establece a Xunta aos propietarios de masas forestais.
A demanda de empresas que realizan traballos forestais en Galicia, entre eles de roza de leiras e tallas, disparouse nas últimas semanas, a escasos días de que remate o prazo para que estean limpas as denominadas franxas de seguridade de 50 metros ao redor de núcleos urbanos e edificacións illadas.

> Vila de Cruces| Abril  2018

A Festa do Galo de Curral de Vila de Cruces chega á súa XXV edición. A cita para os amantes deste prato será o vindeiro 27 de maio. O prezo do menú nos establecementos hostaleiros de Vila de Cruces oscilará entre 25 e 30 euros. Nesta edición será un restaurante da zona o encargado do menú degustación, que se servirá a tódolos asistentes á festa a un prezo de seis euros.
O programa comezará pola mañá cun pasarrúas de grupos folclóricos. Como novidade esta edición contará cunha exposición de tractores clásicos. Do espacio musical encargarase o grupo “Coribantes”. O presentador de televisión Carlos Lozano será o pregoeiro, e seguidamente haberá a actuación da cantante Merche. Pola tarde terá lugar o clásico Festival de Bandas de Galicia.

> Lalín| Marzo  2018

As parroquias do Deza están a darlle un impulso aos procesos de concentración parcelaria en trámites, paralizados, abertos ou mesmo de nova creación. Ao longo do pasado mes de marzo técnicos da Consellería do Medio Rural expresaron o seu apoio ao impulso das parcelarias en concellos coma Silleda, Vila de Cruces ou Agolada. Noutros casos coma Lalín e Rodeiro, as máquinas comezaron a traballar xa na colocación de marcos nas novas fincas concentradas e na apertura de pistas e accesos.
Silleda ten en marcha na parroquia de Oleiros a concentración parcelaria, xa en fase de investigación da titularidade das fincas. En Vila de Cruces, Jesús Otero acadou o respaldo da conselleira do Medio Rural o seu apoio ás concentracións de Loño, Arnego ou Toiríz. E en Agolada, os veciños de Berredo, Eidián, Basadre e Ramil por un lado, e os de Baíña, Val, Sexo e Agra polo outro, están reactivando estes procesos. Tamén se sumaron a esta iniciativa os veciños de Sexto e Brocos.

> Lalín| Febreiro  2018

O Diario Oficial de Galicia (DOG) publicou o pasado día 12 de febreiro a orde da Consellería do Medio Rural pola que se regula a aplicación dos pagamentos directos á agricultura e á gandaría e das axudas ao desenvolvemento rural suxeitas ao Sistema integrado de xestión e control, no marco da Política Agraria Común (PAC). Son un total de 190 millóns de euros para preto de 33.000 beneficiarios galegos, que terán ata o vindeiro 30 de abril para solicitar ditas achegas. A convocatoria deste ano, moi agardada na Comarca do Deza, ten como novidade que establece unha nova definición para os pastos permanentes e aumenta as axudas nas zonas con limitacións naturais. O prazo para presentar a solicitude prolóngase ata o vindeiro 30 de abril, sendo obrigatorio facelo por vía electrónica e dirixida ao Fondo Galego de Garantía Agraria (Fogga) a través do formulario que se pode atopar en https://sgapac.xunta.es.

> Moneixas| Xaneiro  2018

> Lalín| Xaneiro 2018

O cocido de Lalín convírtese tódolos invernos nunha das citas senlleiras que atraen a milleiros de visitantes e abre a porta ó entroido na Comarca do Deza. Este ano o evento acada medio século de vida, e con motivo desta celebración o concello de Lalín preparou un programa de actos, que nesta edición ten como novidade a inclusión dunha tirada de fogos de artificio, actuacións musicais, actividades para nenos e nenas, exposicións, libros de receitas e o principal atractivo que é a degustación nos restaurantes de Lalín e a comarca, do prato estrela desta festa.
Ademais do atractivo desfile de carrozas polas rúas do centro da vila, este ano tampouco falta a carpa de exposicións instalada no campo da Feira Vella, patrocinada por Mahou. Esta carpa ampliouse con respecto ao ano pasado e dará collida a máis expositores, que farán promoción dos distintos productos con degustacións para o público e venta.