> Silleda |Novembro 2017

Silleda acadou 451 novos empadroamentos e supera xa os 9.100 habitantes

A campaña de empadroamento continuará coa iniciativa “Nas festas somos máis”.

> Redacción

O censo de habitantes de Silleda, segundo os datos que manexa a Administración Local, sitúase a día de hoxe en 9.178 habitantes, unha cifra que –á espera da revisión do INE de final de ano- “confirma o grande éxito da campaña de fomento de empadroamento, ao romperse a tendencia á baixa no padrón de habitantes dos últimos dez anos”, segundo explicou o alcalde, Manuel Cuiña.
Así, segundo os datos municipais a poboación sitúase a día de hoxe en 9.178 habitantes. “O obxectivo de non perder poboación está máis que conseguido, tendo en conta os datos cos que contamos”, asegurou Cuíña. “Non só o mantemos senón que aumentou”, dixo o rexedor sobre o balance da campaña, que arrancou hai ano e medio. 
En total dende xullo de 2016 ata hoxe rexistráronse no padrón municipal 451 novas altas (sen contar os nacementos). A media de altas supera a vintena por mes dende entón, sendo o mes de mellores datos maio deste 2017, con 36 altas. 
Tamén o pasado mes de outubro se rexistraron outras 35 nos 20 días que levamos de novembro son xa 27 as altas, o que indica que este mes continuará tamén coa tendencia á alza.

 

Campaña de empadroamento
Esta campaña, baixo o título “Empadróate en Silleda, porque en Silleda somos máis”, está dirixida sobre todo a concienciar e informar sobre a importancia de estar censado no lugar onde se reside habitualmente. Estimábase ao inicio da campaña que preto de 900 persoas residían en Silleda sen estar empadroados no municipio. 
Os resultados son pois moi satisfactorios, mentres a campaña segue adiante con iniciativas coma o certame “Nas festas somos mais” que nesta segunda edición repartirá 3.000 euros en premios entre as comisións de festas que promocionen o municipio e fomenten o empadroamento. O prazo para participar no certame segue aberto ata do 2 de xaneiro. 
A falta dos datos estatísticos do INE deste ano, na última revisión que fixo o organismo en decembro de 2016 apuntábase xa ao éxito da campaña ao contabilizar só unha baixada de 30 habitantes respecto ao censo anterior, cando se perderan 200 habitantes.

Silleda contra a violencia de xénero

Os pasos de peóns do municipio lucen mensaxes contra a violencia machista.

> Redacción

A celebración o día 25 de novembro do Día contra a Violencia de Xénero suscitou numerosas iniciativas do Concello de Silleda para celebrar esta xornada reivindicativa. O Concello de Silleda procedeu ao pintado de mensaxes contra a violencia machista nos pasos de peóns. Estas frases, ás que acompaña o logo “Silleda, en negro” (no marco da campaña #En negro contra a violencia) estampáronse en 8 pasos: 4 na vila de Silleda e outros tantos na da Bandeira. 
Amedes a quen amedes. Silleda polos dereitos LGTBI; Son libre de decidir sobre a miña vida; Non es o meu dono. Non son o teu dono; Non son un príncipe azul; #Ningunha menos; Sempre libre e viva; Si é si..Non é non; Non por ser muller, si por ser persoa. Estes son os lemas que rezan a pé de rúa “para concienciar e sensibilizar á poboación sobre esta lacra na qué é preciso que nos impliquemos todos e todas”, segundo explicou a concelleira de Igualdade.
Silleda comezou ademais este mes o programa “Xénero e vulnerabilidade”, posto en marcha co apoio da Deputación de Pontevedra coa conferencia de Rosa María Calaf baixo o título “Violencia y misoginia: ayer y hoy. La representación de las mujeres en el discurso mediático”, que impartiu na Casa da Xuventude a coñecida xornalista e investigadora. A corresponsal máis veterana de TVE, con 37 anos de experiencia ás súas costas, foi pioneira en España no exercicio do reporteirismo.  Ademais da conferencia de Rosa María Calaf, o día 24 terá lugar a concentración de condea contra a violencia de xénero na praza da Igrexa de Silleda (12:30), un acto no que dende a Concellería de Igualdade de Silleda se entregarán tamén aos centros escolares lotes de libros que afrontan a problemática da desigualdade por razón de xénero e a violencia machista.


En negro contra as violencias
Por outra banda o Concello de Silleda segue a participar na campaña En negro contra as violencias, á que se sumaron xa 80 establecementos e entidades do municipio para sensibilizar –a través da cor negra- sobre a problemática da violencia de xénero na nosa sociedade. 

Silleda estrea a mellora do vial de acceso á zona oeste do recinto feiral

Esta estrada, moi utilizada polos veciños renovou o seu firme ademais de quedar pintada.

> Redacción

O Concello de Silleda continúa apostando pola mellora da rede viaria do municipio. Entre os proxectos de arranxo do firme que están que se remataron nos últimos días deste mes de novembro figura o do vial municipal que circunda o recinto feiral da Semana Verde pola zona oeste.
Este tramo parte de cerca da avenida da Estación e continua ata a zona deportiva e escolar da vila de Silleda. “Trátase dun vial moi utilizado polos veciños e veciñas e tamén polos visitantes que se achegan ata o recinto feiral e que agora quedou arranxado logo de acumular distintos desperfectos nos últimos anos”, segundo dixo o alcalde Manuel Cuiña.

 

Investimento
A inversión na mellora do firme superou os 41.000 euros, contando para elo cunha subvención de 33.054,42 euros da Dirección Xeral de Administración Local para a Mellora de Infraestruturas, dotacións, instalacións e equipamentos vinculados á prestación de servizos municipais. Entre outros nesta zona figuran ademais das instalacións deportivas municipais e do propio recinto feiral , o CEIP de Silleda, Escola Infantil A Galiña Azul, ou Escola de Música. Ademais de renovarse o firme de todo o tramo tamén se procedeu ao pintado deste viario situado na parte oeste do recinto feiral, aseguran dende o Concello de Silleda.
Con este proxecto, complétase tamén a mellora das rúas da periferia de Silleda nesta zona, logo de que en 2015 se realizara a intervención do acceso por Vilanova, creando tamén un circuíto de sendas peonís e que o pasado ano se dotara de sendas a estrada de O Castro, segundo informan dende o goberno local. 

A primeira fase das obras do campo da Gandareira estará lista antes de final de ano

A inversión nesta primeira fase de remodelación supera os 400.000 euros.

> Redacción

As obras da primeira fase de remodelación integral do campo de fútbol da Gandareira, na Bandeira, estarán listas a final de ano. Os traballos, adxudicados á empresa Taboada y Ramos, reanudáronse a mediados deste mes logo dun parón por mor dos trámites para a retirada de materiais con amianto das vellas instalacións. O investimento nesta obra supera os 400.000 euros, financiados a través dun convenio coa Deputación de Pontevedra. 
O alcalde de Silleda, Manuel Cuiña, visitou este mesmo mes de novembro os traballos da que se convertirá “nunha das grandes inversión da lexislatura”, segundo destacou o rexedor durante a súa visita ás obras. Esta dotación é unha das máis agardadas tendo en conta que o da Bandeira é o único dos 4 campos de fútbol de Silleda que aínda tiña terreo de xogo en terra.
Esta obra, centra as inversión deste ano en Silleda no ámbito das infraestruturas deportivas xunto coa renovación da manta de herba sintética do campo de Outeiriño en Silleda, estreada o pasado mes de agosto. Os traballos na Gandareira comezaron a finais do verán co derrubo dos cierres do campo, segundo explicaron dende o goberno local. 
Ademais da dotación de herba artificial, similar a do campo de Outeiriño, tamén se construirán novas gradas e aseos con esta reforma integral. 

 

Campos de fútbol municipais
Os campos de fútbol de Silleda e da Bandeira súmanse ás obras realizadas polo Concello nos anos 2012 e 2013 nos campos de Lamela e Laro, respectivamente, coa dotación de terreos de xogo de herba natural. Nestes dous últimos continúanse a facer melloras tamén como a da colocación de colectores solares para contar con auga quente sanitaria, explican dende o goberno local. 
“Dende o Concello de Silleda apostamos por mellorar os equipamentos deportivos con distintas obras de mellora ás que agora se suma a agardada e necesaria remodelación integral do campo da Gandareira”, dixo o alcalde. 

> Silleda |Outubro 2017

Unha comitiva de Silleda visitou este mes Bos Aires

O alcalde agradeceu a boa acollida que tivo en tódolos actos durante esta visita.

> Redacción

O alcalde de Silleda, Manuel Cuiña, visitou este mes de outubro Arxentina, unha visita na que contou cunha apretada axenda oficial en Bos Aires con encontros cos emigrantes silledenses na capital arxentina. Preto de 400 persoas asistiron no Centro Lalín, Agolada Silleda en San Isidro, á celebración da Festa da Saleta e da Festa das Dores, dúas celebracións significativas para os emigrantes da comarca dezana na Arxentina.
O alcalde Manuel Cuiña iniciou o seu discurso transmitindo o sentimento de dor e indignación pola vaga de lumes “e ao mesmo tempo a nosa satisfacción porque grazas aos veciños e veciñas, e aos corpos de emerxencia e seguridade conseguíronse evitar males maiores, aínda que o acontecido é un auténtico desastre”. 
Durante a celebración, que estivo marcada pola situación en Galicia pola vaga de lumes, o rexedor asinou no libro de ouro da entidade, “que xa sinto como a miña segunda casa” e reiterou o seu agradecemento “pola grandísima e espléndida acollida dos directivos do centro, presidido por Pío Sánchez, e por todos os emigrantes da zona e institucións que visitamos ao longo desta semana”, engadiu.
Tamén indicou que foi “un pracer coincidir co alcalde de Lalín, Rafael Cuiña, e avanzou para os asistentes algún dos proxectos municipais en marcha coma a construción da Residencia de Maiores e Centro de Día, ou outros coma o cambio de sede da Casa Consistorial.
A expedición silledense tamén visitou entidades coma o Museo Galego da Emigración, O Centro Galicia, Colexio Santiago Apóstol, ou a embaixada de España, entre outros.

 

Sociedad Hijos de Silleda en Argentina
A Sociedad Hijos de Silleda en Argentina creouse no ano 1908, practicamente ao mesmo tempo que a sociedade de Agricultores de Silleda. Un dos seus fundadores foi Antón Alonso Ríos, nado en Cortegada no ano 1887 e que chegou en 1908 a Arxentina. A Sociedade creouse con fins de instrución. 
O 25 de agosto de 1982 fusionáronse 4 entidades:Sociedade Hijos del Ayuntamiento de Agolada, Sociedad Hijos de Silleda, Sociedad Hijos del Partido de Lalín e Sociedad Unión del Partido de Lalín.

O embaixador de España en Arxentina recibiu á delegación silledense en Bos Aires

Foron moitos os centros e institucións que abriron as súas portas aos representantes trasdezaos.

> Redacción

A delegación silledense en Bos Aires foi recibida na Embaixada de España na capital arxentina. O alcalde, Manuel Cuiña, xunto cos concelleiros Klaus Brey e Pilar Peón foron convidados persoalmente dende esta institución –unha vez que souberon da súa presenza na cidade- a asistir a recepción con motivo do Día da Hispanidade.
No acto estiveron presentes figuras da política estatal e numerosos representantes da sociedade bonaerense. Na recepción ofrecida polo embaixador español Javier Sandomingo Núñez, -natural de A Coruña- o alcalde, Manuel Cuiña, departiu con personalidades coma o ministro de Saúde de Arxentina, Jorge Daniel Lemus, descendente de galegos, Cónsul General, representantes das Cámaras de Comercio e os presidentes de todas as Casas de España en Argentina. Tamén mantivo un encontro co presidente do PSOE en Arxentina. 
Segundo dixo Cuíña “é un orgullo que o embaixador de España nos convidara a esta recepción”, e destacou “a grandísima acollida que nos brindaron os moitos descendentes de Silleda e emigrantes que residen aquí e a directiva do Centro Lalín Agolada Silleda”. Cuiña agradeceu a “calorosa acollida” dos veciños e veciñas de Silleda dende a súa chegada a Bos Aires. 
“Foi tal a acollida que mesmo moitos veciños se achegaron ata o hotel no que nos hospedamos para reunirse con nós. Son moitos os veciños de Silleda que residen aquí e quizais deberíamos ter vido antes”, sinalou o rexedor silledense.

 

Centro Ospaña e outras visitas
Durante esta visita institucional os edís silledenses foron recibidos polos directivos do centro que lles ensinaron a cidade e as instalacións da entidade sitas na céntrica calle Mariano Moreno de Bos Aires. Os tres representantes municipais compartiron ademais un xantar coa directiva do centro. 
Tamén coñeceron as instalacións do Centro Ospaña, a obra social do Hospital do Centro Galego de Bos Aires, actualmente presidida polo doutor José Luis Seoane Vidal, fillo de silledenses.
O Museo da Emigración Galega en Arxentina, o Centro Galicia, ou a Federación de Sociedades Gallegas foron outras das visitas da comitiva silledense. 

A vaga de lumes tamén afectou a Silleda

Veciños, voluntarios e medios de extinción permitiron apagar o lume en Siador, Cortegada e Refoxos.

> Redacción

O Concello de Silleda foi un dos moitos de toda Galicia que este mes se viron afectados pola vaga de lume. As parroquias de Silleda afectadas polo terrible incendio que comezaba a primeira hora da tarde do domingo día 15 entre Cortegada e Oleiros foron volvendo á normalidade.
Dende o Concello o goberno municipal habilitou, á vista da gravidade deste incendio, todos os medios dispoñibles. “Fixemos todo o posible, co persoal e os medios dos que dispoñemos”, indicou a alcaldesa en funcións, Ana Luisa González. 
Veciños e veciñas, con cubas, tractores, as brigadas, os efectivos do Parque Intercomarcal de Bombeiros, persoal municipal de Obras e Servizos, Policía Local, ex voluntarios de Protección Civil de Silleda que se ofreceron para traballar… participaron ata altas horas da madrugada na loita contra o lume.
O lume avanzou con forza cara Cortegada, ameazando os núcleos de Xubín e Framiñán, e alcanzando despois a parte alta da parroquia de Siador.
Nesta última localidade foi preciso desaloxar varias vivendas ao fío das 22:00 horas. Así evacuáronse dúas vivendas de A Barcia, outras dúas de Penadagra e tamén varias do núcleo de Siador, a donde os veciños volveron horas despois ao fío das 05:00 horas. En Framiñán, na parroquia de Cortegada, estivo a piques de realizarse o desaloxo dos veciños, pero finalmente o lume puido controlarse. 
O Concello de Silleda abriu as súas portas para atender aos veciños para o que fixera falta e para atender as chamadas dos que precisaran información ou que ofreceron axuda. Tamén se ofreceu aos desaloxados a posibilidade de durmir en aloxamentos hostaleiros.

 

Manuel Cuiña contactou cos afectados
O alcalde, Manuel Cuiña, que se atopaba de viaxe oficial en Arxentina, chamou persoalmente a varios veciños que tiveron que deixar as súas casas e tamén ao dono das granxas de porcino de Monte Penido que afortunadamente se libraron das lapas. Rematado o lume, nas visitas á zona o goberno local comprobou que afortunadamente o lume non se levou por diante as vivendas e no caso das explotacións agrarias si hai que lamentar a total destrución dunha granxa avícola, aínda que as de porcino que se daban por perdidas se salvaron grazas a que a finca das naves e as colindantes estaban limpas”. 

En marcha as obras de mellora do vial entre A Bandeira e Ferrozos

O Plan Concellos da Deputación inviste 58.928,88 euros nesta actuación.

> Redacción

O Concello de Silleda está a acometer dende comezos deste mes de outubro as obras de mellora do vial Bandeira-Ferrozos, coa dotación dunha nova capa de aglomerado en quente. A mellora afecta a un total de tres tramos do viario que suman algo máis de 1,1 quilómetros. O primeiro tramo discorre entre o cruce da estrada e a N-525 (á altura da estación de servizo), ata a localidade de Ferrozos. O segundo tramo que se mellorará discorre entre o lugar de Ferrozos e o de Andamollo e o terceiro entre Ferrozos e A Bandeira. A inversión ascende a 58.928,88 euros. Esta actuación acometese con cargo ao Plan Concellos, a través da Deputación de Pontevedra, ao igual que as acometidas en Lis-Outeiro, en Moalde e o vial que discorre entre Arcos, en Graba, e Penadauga, en Escuadro.
O alcalde, Manuel Cuíña, que visitou os traballos, destacou a “notable mellora que suporá para os veciños e usuarios a reforma integral destas vías” que se suman a outras actuacións realizadas nos últimos meses dende o Concello de Silleda. “Seguimos actuando na extensa rede de vías municipais coa que contamos, nun ano no que se investirán máis de 500.000 euros en total na mellora de pistas”, engadiu o rexedor municipal.

 

Estrea no César Fares
Por outra banda, o pasado día 21 estreouse no pavillón César G. Fares o Obradoiro Silleda de Baloncesto, nun encontro co CB Culleredo. O recinto estrea novas canastas regulamentarias e a mellora do parqué. 
O Concello de Silleda asinou en días pasados un convenio co Obradoiro CAB SAB polo que o equipo filial terá a súa sede en Silleda. A entrada aos partidos en Silleda será gratuíta. O resto dos partidos da tempada celebraranse os domingos. Así mesmo, o Concello de Silleda disporá de 100 invitacións para asistir a un encontro da liga ACB en Santiago.

O Concello de Silleda reparte 35.000 euros de subvención entre 13 entidades deportivas

Os clubes deben xustificar as axudas antes do vindeiro 15 de decembro.

> Redacción

O Concello de Silleda vén de resolver a concesión das Subvencións a Entidades Deportivas para este ano 2017, -unha das tres liñas de subvención outorgadas dende o Concello de Silleda neste exercicio- cunha dotación económica de case 35.000 euros. 
A Concellería de Deportes, que dirixe Ana Luisa González Costa, xa remitiu as notificacións aos 13 clubs solicitantes informando das contías que se lle conceden, que tamén se poden consultar no taboleiro de anuncios. No caso de non producirse alegacións nun prazo de 10 días a partir da notificación, tal e como se recolle nas bases da convocatoria, a resolución será firme. As entidades beneficiarias dispoñen como máximo ata o 15 de decembro para xustificar estas subvencións, podendo solicitar prórroga a tal efecto.
A Escola de Fútbol de Silleda, tal e como xa se recolle nas bases publicadas o pasado mes de abril, percibirá 10.000 euros, reservados xa na contía destinadas a estas subvencións. 

 

Beneficiarios
O listado de beneficiarios complétase coa S.D Silleda (3.853,75 euros); S.D. Bandeira (3.754,94 euros); CF Lamela (3.359,68 euros); C.F Laro (3.260,87 euros); Sociedade Deportiva de Caza, Pesca e Tiro de Silleda (3.000 euros); Club BTT Trasdeza (2.075, 10 euros); Club Petanca Bandeira (1.877,47 euros); Deza Pádel (1.284,58 euros); Club de Pesca Deportiva Río Deza (691,69 euros); Club Castillo Deza (600 euros); Asociación Deportiva Exilieta 592,88 euros e Club Tiro con Arco Toxarco (494,07 euros). 
Na concesión destas axudas valórase o fomento do deporte base e das escolas deportivas, o mantemento das instalacións deportivas, o número de participantes directos ou indirectos nas actividades, o interese xeral da actividade, o número de deportistas federados e tamén que estes estean empadroados en Silleda.
O BOP de Pontevedra do 18 de abril publico as bases desta subvencións municipais. En total as tres liñas de subvencións suman 98.100 euros, o que supón un aumento de algo máis dun 30% respecto á partida outorgada o pasado ano. 
Ademais das culturais e deportivas a gran novidade deste ano é a convocatoria das axudas de Participación Social, dirixidas especificamente ás asociación veciñais, para diferencialas das axudas a colectivos e grupos culturais e entidades deportivas. 

Cira celebra do 7 ao 11 de novembro a 40 edición da súa semana cultural

Esta iniciativa é a día de hoxe a máis veterana do municipio.

> Redacción

A parroquia silledense de Cira celebra do 7 ao 11 de novembro próximos unha nova edición da súa Semana Cultural. O ciclo, que cumpre xa 40 anos, arranca o martes día 7 cunha homenaxe a José Lareo Rodríguez, veciño da localidade, no seu 75 aniversario, e a exposición das súas obras en madeira e pedra. 
O mércores día 8 a máxima volta a este ciclo cultural da man do Mago Richard, que actuará no centro social da localidade ás 20:30 horas. Toma o relevo o humor, outra das apostas da organización nos últimos anos, da man do humorista estradense Isi, que poñerá en escena en Cira A Comedia. A cita será o xoves día 9, tamén ás 20:30 horas.
O venres día 10 actuará a Banda Xuvenil de Ponte Ledesma, nun recital previsto para as 20:30 horas. Xa por último na xornada do sábado día 11 de novembro a 40 Semana Cultural de Cira rematará cun acto relixioso ao medido día na honra dos veciños e veciñas falecidos neste ano e unha cea de confraternidade no local social a partir das 21:30 horas, amenizada polo Dúo Punto Zero. As persoas que desexen asistir a cea, cun prezo de 20 euros, poden retirar as entradas na taberna de Maruja González. O menú estará composto por empanada, polbo, carne ao caldeiro, viño, doces variados e café. 
A cita está organizada pola Comisión de Festexos de Cira e a Concellería de Cultura. A Semana Cultural de Cira foi pioneira no rural de Silleda e a día de hoxe esta iniciativa é a máis veterana do municipio, con catro décadas de traxectoria.

 

Festa do porco
Por outra banda, A Asociación IdeaSilleda está a ultimar os preparativos para a que será a segunda edición da Festa Gastronómica do Porco que terá lugar os días 9 e 10 de decembro. Este ano, como novidade, celebrarase en conxunto coa II Festa Gastronómica do Porco unha Feira de Artesanía durante toda a fin de semana. Neste momento, un total de 14 artesáns confirmaron a súa asistencia. Os organizadores teñen o prazo aberto ata o próximo 31 de outubro para que todos aqueles que queiran participar poidan anotarse.

> Silleda |Setembro 2017

Catro propostas compiten para deseñar a nova Casa Consistorial de Silleda

Os arquitectos defenderon os seus proxectos este mes diante da Corporación.

> Redacción

Finalmente son catro as propostas presentadas para o deseño da que será a nova Casa Consistorial de Silleda, logo de que un referendo popular decidida o cambio da súa ubicación. O Concello de Silleda recibiu un total de 4 propostas para o deseño da futura Casa Consistorial, que se ubicará na actual Casa da Cultura, na rúa Progreso. 
A principios do pasado mes de agosto, tal e como se acordara por unanimidade no pleno de xullo, dende o Concello solicitáronse propostas a varios estudios de arquitectura silledenses, outorgando un prazo dun mes para realizar ofertas. Unha vez transcorrido o prazo, foron 4 as propostas presentadas para remodelar a Casa da Cultura como consistorio e ao mesmo tempo facer propostas de uso do consistorio actual.
Dende o goberno convocouse unha reunión a mediados deste mes de setembro para que os arquitectos/as explicaran os seus deseños. A esta xuntanza foron convidados todos os grupos da Corporación. O prezo medio dos proxectos presentados ronda os 700.000 euros.
O cambio de ubicación da Casa Consistorial foi aprobado polos veciños e veciñas de Silleda na Consulta Popular que se celebrou o pasado 4 de xuño. Cuiña lembrou que “despois desta decisión histórica na que todos os silledenses tiveron a oportunidade de participar, seguimos coa valoración das ofertas o proceso para trasladar as dependencias municipais”. 

 

Novas instalacións
A modernización das instalacións municipais e a unificación dos servizos, facilitando os trámites aos usuarios son as principais razóns do cambio plantexado polo goberno municipal e refrendado polos veciños e veciñas. 
A finais do ano 2015 o goberno iniciou os trámites para celebrar este referendum, tal e como propuxera na campaña das municipais. En xullo de 2016 levouse a proposta a Pleno. Semanas despois dende o Goberno central pediron que se mandara a pregunta exacta da consulta, que se levou ao pleno de setembro de 2016. Logo de que a Xunta enviara a Madrid os informes correspondentes, o pasado 24 de marzo o Consello de Ministros aprobaba a celebración da consulta popular en Silleda, que cumpre con todos os requisitos legais establecidos na Lei 7/1985 de 2 de abril, reguladora das Bases de Réxime Local.

O Concello de Silleda inicia a recuperación do núcleo histórico de O Foxo

Cuiña avanzou aos veciños o proxecto para dotar de alcantarillado este lugar, cun sistema depósitos de decantación.

> Redacción

O Concello de Silleda iniciou este mes os traballos enmarcados no proxecto de recuperación do núcleo histórico de O Foxo. Esta primeira actuación levarase a cabo con fondos municipais e cunha subvención da Deputación de Pontevedra para comezar a poñer en valor esta poboación que gran relevancia ata principios do século XIX, atravesada ademais polo Camiño de Santiago.
O alcalde, Manuel Cuiña, acompañado do edil de Obras, Klaus Brey, e do arquitecto municipal, mantiveron en días pasados un encontro cos veciños e veciñas desta localidade, pertencente á parroquia de Silleda, para explicar as liñas xerais da iniciativa.
As actuacións que se acometerán inclúen a recuperación do tramo da calzada medieval que cruza o poboado. Á restauración do antigo pavimento sumarase a canalización de augas pluviais mediante presas construídas en pedra. Así mesmo o proxecto inclúe a restauración do lavadoiro, acondicionando esta construción con elementos tradicionais, e recuperándoo como lugar de encontro veciñal e zona de esparcimento para os moitos peregrinos que atravesan o Foxo cara a Compostela.
Xunto coa posta en valor deste espazo público, tamén se recuperará a fonte da Botica, coa limpeza e restauración desta construción histórica, que volverá á súa ubicación orixinal e contará cun pulsador de auga conectada á traída municipal para dar servizo a veciños e peregrinos
As obras, das que resultou adxudicataria a empresa Construccións Rey Rozados, contarán ademais con seguimento arqueolóxico, coa preceptiva supervisión dada a importancia histórica e patrimonial deste núcleo. Tamén se inclue a dotación de novo mobiliario, como un banco que se ubicará no entorno do lavadoiro.


Rede de saneamento
Durante a xuntanza, Cuiña tamén avanzou outra destacada mellora. Así, explicou que se prevé dotar a este núcleo de poboación de saneamento utilizando un sistema con tres depósitos de decantación. Este mecanismo de depuración funciona por gravidade, co que se aforrarían gastos de mantemento ao non precisar conexión á rede eléctrica.
O alcalde sinalou que no caso de contar co visto bo da Administración Autonómica as obras poderían estar en marcha xa na vindeira primavera. As intervencións previstas en O Foxo, sumando a dotación do alcantarillado sitúanse en 100.000 euros.

Avanzan a bo ritmo as obras de construción do Centro de Día e Residencia de Maiores de Silleda

As obras comezaron este verán na parcela municipal ubicada xunto ao recinto feiral.

> Redacción

O alcalde de Silleda, Manuel Cuiña, visitou o pasado mes de agosto as obras de construción do Centro de Día e Residencia de Maiores. Os traballos, que realiza a firma Coviastec Silleda S.L., iniciáronse xa no mes de xullo pasado na parcela municipal situada xunto ao recinto feiral.
“As obras están avanzando a bo ritmo”, dixo o alcalde durante esta visita sobre os traballos que comezaron co desterro da parcela. Está previsto que a cimentación se inicie este mesmo mes de setembro. A Residencia contará con 59 prazas e o Centro de Día con outras 20. A inversión total que executará a empresa ascende a 3,8 millóns de euros. O edificio deberá de estar rematado nun prazo máximo de ano e medio dende o inicio da construción.
O alcalde destacou que os silledenses terán neste centro unha das prazas de Centro de Día máis baratas de Galicia, cun máximo de 300 euros ao mes, e tamén unhas das prazas residenciais máis baratas da comunidade.
“Antes de que remate a lexislatura poderemos ter logo de moitos anos de espera un dos servizos máis necesarios e agardados polos nosos veciños e veciñas”, asegurou Cuiña, destacando que está será “a obra de maior envergadura que se acometerá nesta lexislatura para o municipio de Silleda”.

 

Nova axuda do Plan de Emprego
Por outra banda, tamén o pasado mes de agosto a Xunta de Goberno Local aprobou unha nova subvención ao abeiro do Plan Municipal de Axuda á Creación de Emprego. A beneficiaria foi Maricarmen Fernández Dámaseo que poñerá en marcha un negocio de textil, un comercio especializado en moda infantil, que percibirá unha axuda de 1.200 euros. 
Esta subvención é a terceira que se outorga no ano 2017 a través deste programa, que se iniciou no ano 2015 como unha das grandes apostas do goberno municipal de Silleda para fomentar a creación de emprego. Dende mediados do 2015 outorgáronse xa un total de 11 axudas municipais para a posta en marcha de distintas iniciativas emprendedoras, con cantidades a fondo perdido que varían en función da puntuación obtida.

O Concello de Silleda estuda un convenio coa Fundación Laboral da Construción en materia de formación

O goberno local investirá 180.000 euros en distintas melloras no parque empresarial Área 33.

> Redacción

O Concello de Silleda estuda a posibilidade de asinar un convenio coa Fundación Laboral da Construción en materia de formación. A concelleira de Emprego, Ana Luisa González, mantivo un encontro con membros da entidade para analizar as posibilidades desta iniciativa a fin de reactivar aos traballadores do sector.
“Segundo os datos que nos ofrece a fundación, o persoal que se forma e especializa no sector da construción ten moitas probabilidades de lograr un emprego neste sector”, segundo explicou a concelleira.
Ana Ruzo, asesora de formación da Fundación Laboral da Construción e Soledad Álvarez, profesora de emprego, analizaron en detalle as posibilidades desta colaboración. “Cremos que será unha proposta beneficiosa para as persoas vinculadas á construción e no caso do noso Concello dispoñemos de datos a través do programa SilledaEmprega, a través do que canalizaríamos este acordo de formación”.


Parque empresarial
Por outra banda, o Concello de Silleda continuará este ano realizando distintas actuacións de mellora no Parque Empresarial Área 33. Así, nos vindeiros meses levaranse a cabo dúas actuacións para a mellora de infraestruturas viarias e de servizos enerxéticos, respectivamente. A inversión total ascende a 180.000 euros, e as obras financiaranse con cargo ás subvencións logradas da Consellería de Economía Emprego e Industria e con fondos municipais.
No primeiro caso, en relación ás infraestruturas viarias, procederase a mellora dun dos accesos ao polígono empresarial silledense, dende a estrada N-525. A inversión neste caso será de 149.996,49 euros, sendo subvencionado por parte da Administración Autonómica o 80% do importe. Trátase dun vial moi utilizado para acceder tanto a esta zona industrial do municipio.
En canto ás melloras de servizos enerxéticos o investimento ronda os 30.000 euros, tamén cunha subvención do 80%. Neste casos a actuación consiste na substitución de luminarias tanto en viais do polígono como en zonas peatonais por outras máis eficientes con tecnoloxía LED. Ademais da renovación das luminarias tamén se colocarán reloxos astronómicos para regular o acendido das mesas en función da hora do día. 

Avanzan a bo ritmo as obras de mellora e dotación de iluminación no Parque Municipal das Pedrosas

A actuación, con 199.000 euros de inversión, inclúe a colocación de balizas e realización de sendeiros neste espazo.

> Redacción

As obras do proxecto para a mellora integral do Parque Municipal das Pedrosas, un espazo natural e de lecer no entorno do casco urbano cada vez máis utilizado por veciños e veciñas, avanzan a bo ritmo, segundo informaron este mesmo mes de setembro dende o Concello de Silleda. Está lista xa a reconstrución dos muros de pedra exteriores, que estaban derrubados nalgúns puntos e a día de hoxe a rede de sendeiros, de case 1.200 metros de lonxitude está xa perfilada. 
Esta é unha das actuacións principais que se incluíron este ano por parte do goberno local no apartado de inversións dos orzamentos municipais, a través da cantidade que lle corresponde do Plan Concellos da Deputación de Pontevedra, cunha inversión de 199.999 euros. A actuación iniciouse a finais do pasado mes de agosto coa reconstrución do peche perimetral de pedra deste espazo. Tamén están xa metida a tubaxe que levará electricidade ao parque municipal. 

 

Iluminación
A creación de sendeiros interiores, con xabre, súmase á gran novidade das obras: a dotación de luminarias. A iluminación deste entorno natural realizarase mediante sistema LED, polo que vén apostando nos últimos anos o Concello de Silleda, coa colocación de balizas de 80 centímetros de alto. Estímase que a actuación estará rematada o vindeiro mes de outubro. 
Neste recinto ubícanse ademais un parque infantil, un parque biosaudable, outras instalacións xuvenís (con tirolina e outros aparellos) e unha cancha deportiva. “Trátase dun espazo natural e de ocio moi usado polos silledenses. Coa dotación de iluminación ampliaremos as posibilidades de uso deste parque municipal, xa que moitas das persoas que habitualmente pasean pola zona terán a oportunidade de facelo tamén pola noite”, segundo dixo o alcalde, Manuel Cuiña. 

Silleda renova un ano máis o contrato en prácticas do enxeñeiro industrial

O titulado superior, Ricardo González, continuará traballando no Concello ata setembro de 2018.

> Redacción

O Concello de Silleda vén de renovar por un ano máis o contrato en prácticas do enxeñeiro superior industrial, en virtude do convenio asinado entre a Federación Galega de Municipios e Provincias (Fegamp) e o Colexio de Enxeñeiros Industriais de Galicia.
O Concello de Silleda foio primeiro municipio galego que se acolleu a este acordo para contar cos servizos dun titulado que se forma en prácticas. Así, dende o pasado mes de marzo, Ricardo González Santos, sumouse á plantilla municipal realizando distintos traballos relacionados coas posibilidades da biomasa no termo municipal. 
Á vista do resultado do seu traballo e do interesante proxecto para crear un rede de calor na zona deportivo-escolar de Silleda, optouse por renovar o acordo por un ano máis, algo que fixo o alcalde este mesmo mes de setembro no seu despacho asinando unha prórroga deste contrato co xoven enxeñeiro que está plenamente implicado nas políticas que leva a cabo o goberno local de Silleda. 
O alcalde, Manuel Cuiña, que asinou a renovación xunto co director de Xestión do Colexio Oficial de Enxeñeiros Industrias de Galicia, Pablo Pérez, destacou “o gran traballo realizado por Ricardo González nestes meses, polo que vimos necesario ampliar o seu contrato en prácticas, á vista dos bos resultados e do magnífico proxecto da rede de calor co que optamos a unha liña de subvencións autonómicas”, engadiu o alcalde.

 

Aproveitamento da biomasa
Cuiña destacou que o aproveitamento da biomasa e do seu potencial é unha das apostas do Concello nesta lexislatura. De feito o Concello de Silleda aprobou o acordo de adhesión ao Convenio entre o Colexio Oficial de Enxeñeiros Industrias de Galicia e a Fegamp en novembro do pasado ano.
“O proxecto elaborado por Ricardo González cando concorreu como candidato para a formación en prácticas xa nos pareceu moi completo e de grande interese e á vista do traballo realizado o balance é moi satisfactorio”, asegurou o alcalde. 

Contacto

Director Xerente: Manuel Núñez Fiuza

Deseño e maquetación: Bearisa
Colaboradores: Iago Mouriño, Bartolo Landiño, Tomás Troitiño,
David Devesa, Luis Lince, Pedro Carrio, Manuel Estévez e González Bearisa.

Administración-Publicidade: Rúa Arenal 1 Entrechán - Lalín.
Tlf.: 986 780 615986 780 615 • Fax: 986 780 615 • Móvil: 625 120 810625 120 810
e-mail: manuelfiuza@gmail.com

 

www.lalinecomarca.es

O Periódico | Lalín e Comarca en redes sociales :