> Rodeiro |Agosto 2018

Río colleita un novo éxito da súa feira Camba Sustentable

Centos de persoas achegáronse a Rodeiro para desfrutar das actividades e a gastronomía.

> Redacción

Como cada ano, o pasado mes de xullo a parroquia rodeirense de Río celebrou a súa Feira Camba Sustentable, que novamente colleitou un gran éxito de público, que desfrutou das actividades programadas e a gastronomía tradicional da zona. Centos de persoas de todas as idades asistiron á XII edición desta feira en Río, onde puideron aproveitar a música, a comida e toda unha programación de actividades que cada ano atraen mesmo a visitantes doutras comarcas.
Este ano, os asistentes puideron mercar e degustar queixos da marca Viejo Mundo, chegados a Rodeiro dende Asturias baixo a D.O. Queso Casín, unha das máis antigas de Europa. Entre outros produtos a mostra ofrecía queixo de cabra con mazá ou con castañas. A gastronomía estivo tamén presente nos postos de pan de millo e distintos doces que fixeron as delicias dos asistentes. Vendedores de abalorios e artesáns de todo tipo expuxeron en Rodeiro as súas creación coma xoguetes de madeira e outras artesanías feitas en cable, alambre e mesmo aceiro. 

 

Música e xogos
Ao longo de toda a xornada, os máis pequenos tiveron a posibilidade de desfrutar de múltiples actividades programadas especialmente para eles, coma o “Trono de xogos”, un tiovivo ecolóxico e mesmo tiveron clases de baile ao son de distintos grupos de gaitas.
O xantar correu a cargo de Casa Sánchez e Casa Achacan, que ofreceron sendas catas de viños en espazos gastronómicos. Pola tarde chegou a quenda dos xogos tradicionais, coa empresa Enrédate. E a música ao longo da xornada correu a cargo de distintos grupos, coma os Festicultores, que puxeron un broche de ouro un ano máis a esta feira. 

> Rodeiro |Xullo 2018

Rodeiro aproba por 374.000 euros a mellora da seguridade na rúa A

O concello ten en marcha as actividades de lecer no verán para os nenos e nenas.

> Redacción

O goberno local de Rodeiro aprobou na súa xunta do mes pasado o proxecto técnico da obra “Mellora da seguridade viaria na rúa A”, cun importe de 374.390,17 euros. Tamén, durante a mesma reunión acordaron solicitar unha subvención para levar a cabo esta actuación. Deste xeito o goberno local acordou pedirlle á Deputación de Pontevedra unha axuda por importe de 355.670,66 euros, con cargo ao Plan de remodelación e mellora da seguridade dos viarios municipais (Plan DEPO-REMSE).
Ademais na xunta de goberno local do pasado mes de xuño o Concello de Rodeiro tamén fixou a organización dos programas “Actividades de verán 2018” e “Aberto por vacacións 2018”. Trátase do sexto ano consecutivo no que a Concellería de Cultura programa ao longo destes meses de verán unha serie de actividades lúdicas e formativas para os máis pequenos. 

 

Actividades
Segundo explican dende o goberno local, a finalidade destas actividades municipais é que os menores poidan gozar do seu tempo de lecer durante estas vacacións escolares. Nestas actividades os responsables das mesmas inciden en cuestión que beneficien a formación e aprendizaxe en diversos ámbitos da vida, coma os deportes, os hábitos saudables, as relacións sociais, a natureza ou o coidado do medio ambiente. Para participar nestes programas o concello estableceu para este ano un prezo de 40 euros por inscrito en cada quincena. No caso de anotarse ao mesmo tempo varios irmáns só terán que pagar 25 euros a partires do segundo inscrito. 
No caso do programa Aberto por vacacións 2018, o obxectivo é permitir a conciliación laboral e familiar e ten lugar polas tardes. O prezo é de 30 euros e se participan máis dun irmán só hai que aboar a partires do segundo 25 euros. O goberno local adxudicou este ano á sociedade Arelar Xestión Socioeducativa S.L. a xestión deste último programa por importe de 3.442,45 euros, por quincena, ata un máximo de tres. 

Contacto

Director Xerente: Manuel Núñez Fiuza

Deseño e maquetación: Bearisa
Colaboradores: Iago Mouriño, Bartolo Landiño, Tomás Troitiño,
David Devesa, Luis Lince, Pedro Carrio, Manuel Estévez e González Bearisa.

Administración-Publicidade: Rúa Arenal 1 Entrechán - Lalín.
Tlf.: 986 780 615986 780 615 • Fax: 986 780 615 • Móvil: 625 120 810625 120 810
e-mail: manuelfiuza@gmail.com

 

www.lalinecomarca.es

O Periódico | Lalín e Comarca en redes sociales :