> Rodeiro |Agosto 2019

O “Verán Cultural” de Rodeiro, unha oferta de ocio para todos os públicos

Teatro, monólogos, música ou cine na rúa son algunhas das actividades que ofrece en xullo, agosto e setembro

> Redacción

A programación do “Verán Cultural” de Rodeiro está a ser todo un éxito entre o público. Actividades coma o cine na rúa, o teatro ou os monólogos levan durante todo este mes de xullo conquistando éxitos entre o público. No que vai de mes os cambotes puideron desfrutar xa de títeres, música, teatro e cine na rúa. Pero a programación sigue adiante ata o vindeiro mes de setembro. Así o día 24 de xullo haberá “Contacontos a pé de rúa”, na Casa da Cultura ás 20 horas, e o día 26 volverá o “Cine na Rúa” na Praza do Parque coa proxección da película “Campeones”.
Xa no mes de agosto, Rodeiro comezará forte co concerto o día 2 de Luar na Lubre, e o día 9 o mago Toño ofrecerá o seu espectáculo de maxia “O mundo ao revés”. Os venres 16 e 23 de agosto a Casa da Cultura acollerá ás 20 horas sendos monólogos titulados “Eu quero ser galega” e “A vida pasa voando”.

 

Agosto e setembro
O venres 30 de agosto o protagonista nas actividades culturais deste verán en Rodeiro será o teatro. Malasombra Produccións chegará ás 22 horas á Casa da Cultura cambota para representar a súa obra “Os fabulosos cleaners”. E xa no mes de setembro a cita será o día 6, neste caso coa maxia a cargo de Martín Camiña, que levará á Casa da Cultura ás 20 horas o seu espectáculo “Lingua do país”. Ademais da programación cultural, o Concello de Rodeiro ofrece durante todo o verán o seu campamento infantil e o servizo do programa “Aberto por vacacións”. Trátase dunha completa oferta estival destinada á conciliación das familias e ao ocio para todos os públicos, ademais de fomentar nos máis pequenos o gusto polas actividades culturais e ofrecer alternativas para desfrutar das longas tardes e noites do verán cambote. 

> Rodeiro |Xullo 2019

Luis López afronta o seu terceiro mandato coma alcalde de Rodeiro

Será ademais o novo representante do PP na Deputación de Pontevedra.

> Redacción

O popular Luís López “Lugués” será ate o ano 2023 de novo alcalde de Rodeiro. Logo da súa victoria nas eleccións do pasado 26 de maio, nas que acadou a maioría absoluta con 6 concelleiros fronte aos 4 de Unidade por Rodeiro e 1 do PSdeG, o pasado 15 de xuño Luís López obtivo de novo o bastón de mando cambote. No plano de investidura López contou ademais coa presenza do presidente provincial do PP e vicepresidente da Xunta de Galicia, Alfonso Rueda. Luis López afronta deste xeito o seu terceiro mandato consecutivo “con maior responsabilidade pero tamén con máis experiencia”, dixo o recen reelixido alcalde logo de ser investido polo novo pleno de Rodeiro. López apelou a tres piares fundamentais para esta nova etapa que comeza: traballo, diálogo permanente e proximidade aos problemas dos veciños”, e para iso aproveitou a investidura para tenderlle a man á oposición “para traballar todos por Rodeiro”.
Para o pleno de investidura en Rodeiro o salón de plenos e a sala adxunta con televisión para seguir a sesión rexistraron un cheo total. Entre os asistentes ao acto estiveron tres exalcaldes, Manuel Lamazares, Eliseo Diéguez e José Vence. 
Comezado o pleno constituíuse a mesa de idade, conformada por Pablo Sobrado e Belén Villanueva, e acto seguido presentáronse as tres candidaturas que concorreron ás eleccións e obtiveron representación. O PP, Unidade por Rodeiro e PSOE defenderon aos seus candidatos e o voto en furna posterior deu coma resultado a victoria do candidato popular por maioría absoluta. 

 

Primeiros días de traballo
En Rodeiro a festividade do San Antonio, o pasado 17 de xuño, deu un día máis de asueto a veciños e á nova corporación municipal que tomou posesión o sábado 15. O reelixido alcalde será ademais deputado provincial polo PP esta lexislatura, un cargo que se suma os que ostenta de presidente da Mancomunidade Terras do Deza e do GDR Pontevedra Norte.
Ademais da súa labor na Alcaldía de Rodeiro, nos seus primeiros días coma rexedor López explicou que exercerá coma deputado do PP na Deputación de Pontevedra reclamando máis apoio da institución para os concellos máis pequenos. 

Contacto

Director Xerente: Manuel Núñez Fiuza

Deseño e maquetación: Bearisa
Colaboradores: Iago Mouriño, Bartolo Landiño, Tomás Troitiño,
David Devesa, Luis Lince, Pedro Carrio, Manuel Estévez e González Bearisa.

Administración-Publicidade: Rúa Arenal 1 Entrechán - Lalín.
Tlf.: 986 780 615986 780 615 • Fax: 986 780 615 • Móvil: 625 120 810625 120 810
e-mail: manuelfiuza@gmail.com

 

www.lalinecomarca.es

O Periódico | Lalín e Comarca en redes sociales :