> Lalín |Xaneiro 2021

A fibra óptica esténdese polo Concello

A fibra óptica esténdese polo Concello

> Redacción

O alcalde de Lalín, José Crespo, sinala que o servizo de fibra óptica de Telefónica de España está xa dispoñible para 2.644 fogares e empresas lalinenses en máis de 80 núcleos de poboación do rural. Ademais, o rexedor informou este mesmo mes que Telefónica de España tamén comunicou ao concello que nas próximas semanas disporán de fibra óptica as empresas situadas na zona empresarial de Bergazos, que se suman ao Polígono Lalín 2000 e ao Polígono de Botos, completando a dotación de fibra óptica ás grandes áreas empresariais.

As previsións que manexa este operador é que o servizo de fibra óptica chegue neste ano 2021 a uns 112 núcleos de poboación co alcance estimado do 30% de unidades inmobiliarias rurais do municipio, precisou o alcalde.

Así mesmo, o Concello vén de adxudicarlle a Telefónica un novo lote de axudas ao despregue de fibra óptica a través do Plan Pebang 2020 que abranguerá a 7 novos núcleos de poboación: Donfreán, Belelle, Cadrón, Reguengo, Anduxao, Vilariño e Devesa de Arriba.

Aínda que o prazo de execución máximo é ata finais de 2022, desde a compañía están programando o seu despregue para acometelo á maior brevidade posible, de acordo ao sinalado pola súa responsable de despregue de fibra óptica na nosa comunidade, Patricia Rodiño.

 

Equiparar servizos

Crespo remarcou que dende o goberno están a traballar para lograr a máxima equiparación de servizos entre o casco urbano e o rural e a dotación dun servizo de internet de alta velocidade “que é crucial na nosa folla de ruta; unha solución de valor engadido tecnolóxico que nos están a ofrecer hoxe en día as distintas operadoras de cara á mellora das prestacións das que desfruta Lalín neste eido”. Destacou que o goberno local agarda que a finais de 2021 a totalidade dos veciños do casco urbano poidan contratar internet de alta velocidade e o 70% dos que viven no rural, é dicir, que ao redor do 90% da poboación de Lalín poida desfrutar de cobertura de alta velocidade ofertada a través dos distintos operadores cos que levamos traballando varios meses (Telefónica, R, Orange, Vodafone e os operadores virtuais).

Lalín solicita 28 traballadores municipais máis con cargo ao Plan Concellos 2021

O proxecto de reforzo conta cun orzamento total de máis de 355.000 euros

> Redacción

O Concello de Lalín aprobou este mes en Xunta de Goberno solicitar a contratación de 28 persoas en situación de desemprego para reforzar o cadro de persoal municipal con cargo á liña 3 do Plan Concellos 2021 da Deputación de Pontevedra. Así o sinalou o edil delegado de Emprego, Avelino Souto, que remarcou que dita solicitude de contratación, que xa lle foi remitida á Deputación, efectuarase cunha achega provincial de 338.240,74 euros, que se dedicarán ao pagamento do devandito persoal destinado a complementar distintos departamentos municipais. O Concello realizará unha aportación de 17.728,73 euros ata completar os 355.969,47 euros do custo total do proxecto.

Souto explicou que dos 28 traballadores un total de 18 destinaranse ao departamento de Obras e Servizos para desenvolver traballos de mantemento e reparación da extensa rede viaria que temos; melloras e mantementos de zonas verdes; arranxos e coidados de centros sociais; desbroces, etc. Para este departamento contrataranse 4 peóns forestais, 4 peóns albaneis, 6 peóns de obras, 1 condutor de camión, 1 condutor pala retroescavadora e 2 condutores de tractores desbrozadora.

 

Contratos

O concelleiro delegado concretou que os 10 restantes traballadores que se contratarán ao abeiro desta liña serán: 2 auxiliares de información turística de apoio ao departamento de Turismo (1 para o Concello e 1 para a Oficina de Turismo); 1 auxiliar administrativo de apoio ao departamento de Intervención; 1 traballador social de apoio ao departamento de Servizos Sociais; 1 técnico de Secretaría de apoio á Secretaría Xeral; 1 técnico de Comercio e 1 auxiliar administrativo de apoio ao departamento de Emprego; 1 conserxe de apoio ao departamento de Deportes; 1 técnico economista para o departamento de Contratación e 1 arquitecto técnico para o departamento de Urbanismo e labores de apoio a Contratación.

A duración dos contratos varía entre os 6 e os 8 meses, aínda que unha gran parte deles será de 7 a 8 meses, polo que a duración media do contrato destes 28 traballadores que se contratarán ao abeiro do Plan Concellos situarase ao redor dos 7 meses.

A Xunta recibe oito ofertas para facer o CIS

As obras comezarán na primavera e prevese a súa finalización antes de que remate o ano

> Redacción

A Xunta vén de recibir a mediados deste mes de xaneiro 8 ofertas para executar as obras do Centro Integral de Saúde de Lalín, cun investimento de 9 millóns de euros. Destas 8 ofertas presentadas, 4 delas están conformadas por UTE que agrupan a 12 empresas.

As obras comezarán na primavera e axilizaranse de forma que o novo equipamento estea ao servizo dos veciños de Lalín e da comarca do Deza antes de que remate 2022.

Os traballos consistirán na construción dunhas instalacións que reforzarán a atención aos veciños de Lalín, Rodeiro, Dozón e Agolada, ademais de prestar determinadas asistencias aos concellos de Silleda e Vila de Cruces, servindo a unha poboación de 35.000 persoas.

Construirase un edificio de máis de 5.700 metros cadrados, cunha superficie útil de máis de 4.900 metros cadrados, que se distribuirán en catro andares, dos cales tres se dedicarán ao centro de saúde e un ao Punto de Atención Continuada (PAC).

 

Novo equipamento

O novo equipamento sanitario disporá de área asistencial, con 11 consultas de medicina, 11 de enfermería, 1 consulta de farmacia, 2 consultas de odontoloxía, sala de técnicas, mostras e varias polivalentes; tamén área de especialidades, con 4 consultas, 2 de enfermería e 3 gabinetes de exploración; área pediátrica, con 3 consultas, 2 de enfermería e 1 sala de atención integral; ademais de área de hospitalización a domicilio, atención á muller, rehabilitación, telemedicina, diagnóstico por imaxe ou hemodiálise; e o punto de atención continuada (PAC), que disporá de 3 consultas, sala de críticos, sala de observación e 5 dormitorios.

A posta en marcha do Centro Integral de Saúde de Lalín permitirá ampliar o programa de cirurxía menor ambulatoria, activar o servizo de rehabilitación cardíaca, de solo pélvico e de enfermidades músculo-esqueléticas. As instalacións disporán dunha área de servizo de transporte sanitario con soporte vital básico, espazos comúns, de persoal, administración e arquivo. 

A Xunta investirá 160.000 euros para restaurar o Mosteiro de San Pedro en Dozón

Román Rodríguez visitou o templo e destacou os problemas de humidade, a cuberta, as fachadas e a carpitería exterior

> Redacción

O conselleiro de Cultura, Educación e Universidade, Román Rodríguez, visitou o pasado 16 de xaneiro o Mosteiro de San Pedro de Vilanova en Dozón, onde anunciou que a Xunta de Galicia ten previsto levar a cabo un proxecto de restauración grazas dunha achega de 160.000 euros.

Durante a súa visita, o titular de Cultura explicou que a achega do Goberno autonómico permitirá resolver os problemas de humidade que afectan ao inmoble, especialmente ás zonas sur e norte, onde é preciso revisar as últimas drenaxes. Así mesmo, tamén está prevista a limpeza das fachadas prestando especial coidado nos elementos escultóricos romanos. Dentro deste proxecto tamén se inclúe a revisión dos encontros, beirados e tellas da cuberta, así como a substitución dos elementos interiores e da carpintería exterior que estean en mal estado. Román Rodríguez incidiu na necesidade de levar a cabo estes traballos, despois de que a última actuación de conservación, centrada na mellora do tellado e da fachada exterior, se fixera no ano 2004. Proba disto, é que son xa apreciables os efectos do deterioro ocasionado pola colonización biolóxica, a falta de mantemento e o incorrecto funcionamento dos sistemas construtivos con maior compromiso na evacuación da auga de choiva e a protección ante a humidade de capilaridade e filtración, especialmente a drenaxe.

 

Fundada no século XII

Durante a visita, o titular de Cultura, salientou que con estas actuacións o Goberno autonómico continúa reforzando o seu compromiso co patrimonio galego e que se reflicte nos orzamentos do vindeiro ano, onde a partida para actuacións de conservación e restauración se incrementa nun 19%.

Neste caso, os traballos impulsados pola Xunta de Galicia permitirán poñer en valor a igrexa románica fundada no século XII e da que destaca a salientable imaxe cisterciense que mostra o interior do templo.

Contacto

Director Xerente: Manuel Núñez Fiuza

Deseño e maquetación: Bearisa
Colaboradores: Iago Mouriño, Bartolo Landiño, Tomás Troitiño,
David Devesa, Luis Lince, Pedro Carrio, Manuel Estévez e González Bearisa.

Administración-Publicidade: Rúa Arenal 1 Entrechán - Lalín.
Tlf.: 986 780 615986 780 615 • Fax: 986 780 615 • Móvil: 625 120 810625 120 810
e-mail: manuelfiuza@gmail.com

 

www.lalinecomarca.es

O Periódico | Lalín e Comarca en redes sociales :