> Lalín |Abril 2021

Un novo camión reforza os servizos de emerxencias de Lalín

O vicepresidente primeiro da Xunta entregou o vehículo destinado a actuacións en áreas rurais con rúas estreitas

> Redacción

O vicepresidente primeiro da Xunta, Alfonso Rueda, fixo entrega o pasado mes de abril ao concello de Lalín dun camión autobomba urbana lixeira para os efectivos do Grupo de Emerxencias Supramunicipal con sede no concello. Os efectivos do GES que opera en Lalín contan con este vehículo destinado a intervencións de salvamento e contraincendios, que o Goberno galego adquiriu por 150.000 euros.

Este camión de emerxencias leva instalada unha bomba contraincendios e unha cisterna de máis de 1.100 litros de auga. Deste xeito, conta cunha cantidade de auga suficiente para actuar nun lume urbano e permite traballar con auga en alta presión aumentando a eficacia de extinción.

Alfonso Rueda sinalou o compromiso da Xunta cos servizos de emerxencias cun investimento de case 20 millóns de euros na cesión de material aos concellos galegos para os GES e servizos e agrupación de voluntarios de Protección Civil, aos que agradeceu o seu esforzo para velar pola seguridade dos cidadáns.

Así, incidiu na necesidade de que os profesionais de emerxencias conten co equipamento necesario para levar a cabo o seu traballo nas mellores condicións e prestar un servizo o máis áxil e eficaz posible.

GES

No marco da Comisión de Seguimento dos GES, dos que tamén forman parte as deputacións provinciais e a Fegamp, aprobouse a proposta da Xunta para crear os seis novos GES. Tres deles na provincia de Pontevedra –un na Cañiza, outro en A Lama e un en Mos/Redondela, que ao igual que o de Estrada-Lalín terá unha subsede en cada un dos dous municipios-, 2 en Ourense –un en Maceda e outro na Veiga-, xunto co servizo supramunicipal de Noia.

O vicepresidente primeiro da Xunta indicou que estes grupos contribúen a mellorar e reducir os tempos de resposta ante situacións de emerxencia, polo que apelou á colaboración entre administracións para continuar a completar o mapa de emerxencias no territorio galego. Galicia conta con 29 GES e 4 servizos municipais, entre eles 9 na provincia de Pontevedra dos que forma parte o de A Estrada-Lalín. 

Crespo busca na Xunta un aliado contra os parques eólicos en Val do Folgoso e Porcallos

O vicepresidente económico comunicoulle ao alcalde que xa remitiron a Madrid a alegación en contra

> Redacción

A Xunta de Galicia vén de informar negativamente os proxectos de parques eólicos de Val do Folgoso e Monte dos Porcallos que, tramitados polo Ministerio se atopan en fase de exposición pública, tal como lle comunicou o pasado mes de abril o vicepresidente económico e conselleiro de Economía, Empresa e Innovación, Francisco Conde, ao alcalde de Lalín, José Crespo, nunha reunión mantida entrambos para avaliar a situación dos parques eólicos. O Executivo galego informou negativamente estas iniciativas porque estes proxectos eólicos se atopan fóra das ADE (Áreas de Desenvolvemento Eólico) incluídas dentro Plan Sectorial Eólico de Galicia. Polo tanto o emprazamento destes proxectos eólicos incumpre o Plan Sectorial de Galicia e a Lei 8/2009 pola que se regula o aproveitamento eólico de Galicia e se crea o canon eólico e o Fondo de Compensación Ambiental. Francisco Conde indicou a Crespo que este informe desfavorable da Xunta aos parques eólicos Val do Folgoso e Monte dos Porcallos xa foi rexistrado polo goberno autonómico e remitido ao Ministerio. Os parques proxectados afectan ademais de a Lalín a outros concellos da comarca como Rodeiro, Dozón, Vila de Cruces e Silleda.

 

Reunións

A xuntanza tivo lugar tras unha solicitude realizada polo alcalde de Lalín ao vicepresidente segundo da Xunta interesándose por coñecer máis en profundidade a situación actual destes proxectos eólicos e as actuacións levadas a cabo desde o goberno autonómico en relación a eles.

Ademais, Crespo xa mantivo outros contactos na Xunta en relación a este asunto, e tamén en abril reuniuse coa directora xeral de Planificación Enerxética e Recursos Naturais, Paula Uría.

Dende a Xunta remarcan ademáis que tramitar un proxecto (eólico) non é o mesmo que autorizar un proxecto e insisten en que a tramitación administrativa do procedemento de autorización dun parque eólico conta sempre con todas as garantías xurídicas, técnicas e ambientais que corresponden, ademais de ofrecer a máxima transparencia para que a cidadanía poida presentar as achegas que estime oportunas. 

Lalín aproba 8,5 millóns de euros de investimento nun novo alumeado público

O pleno respaldou tamén o plan de obras no rural por importe de 1,2 millóns de euros

> Redacción

O pleno do Concello de Lalín, celebrado a finais do pasado mes de abril, aprobou por unanimidade o investimento de 8,5 millóns de euros do expediente de contratación de serzivos enerxéticos de alumeado do Concello por importe de 8,5 millóns de euros. Será un contrato de 12 anos, cun desembolso de 14,4 millóns de euros, a razón de 1,2 millóns de euros ao ano. Esto implicará a renovación total do alumeado público municipal, un total de 8.300 puntos de luz e cadros. Dos 8,5 millóns de euros será o IDEA do Estado quen aporte o 80 por cento e o Concello correrá co 20 por cento restante.

O pleno telemático do concello, acadou a unanimidade de todos os grupos para respaldar esta iniciativa, que ten coma data límite de execución o mes de setembro de 2023, pero que o alcalde, José Crespo, quere que estea operativo xa no ano 2022. Segundo explicou o rexedor, esta actuación suporá ademáis aglutinar nun mesmo contrato os 11 contratos vixentes na actualidade, e rematar coas reclamacións e os problemas legais do sistema actual.

Segundo asegurou o alcalde, cando remate este mandato “creo que haberá investido máis de 40 millóns de euros. Esperemos que se noten. Iso non é só a mellora estética. A maiores, o Concello de Lalín non pon só o alumeado novo, senón que traerá consigo un aforro en torno a máis menos 500.000 euros ao ano. Despois de poñer todo novo e mellorar todo imos aforrar uns 500 mil euros ao ano. En 4 anos son 2 millóns de euros, que van poder destinarse a outras cousas”.

 

Plan de obras no rural

Tamén saíu aprobado por unanimidade deste pleno o plan de obras por importe de 1,22 millóns de euros destinado a adicar os remanentes de tesourería da liquidación do exercicio 2020 a un completo plan de obras destinado ao rural lalinense. Do montante total destacan 815.555 euros para actuación en pistas do rural, ademáis doutros 5.000 euros para roteiros polo municipio e outros 5.000 para o museo de Doade. 

O Xacobeo Clarinet Fest traerá a Lalín a mellor oferta musical de Europa

O conselleiro asegura que a Comarca do Deza é “unha referencia no eido musical”

> Redacción

O conselleiro de Cultura, Educación e Universidade, Román Rodríguez, participou o pasado 1 de maio xunto co alcalde de Lalín, José Crespo, na presentación do Xacobeo Clarinet Fest 2021, unha iniciativa que se celebrará neste concello entre os días 16 e 23 de xullo co apoio da Xunta de Galicia e que reunirá a recoñecidos clarinetistas de diferentes nacionalidades e prestixiosos directores de orquestra e pianistas. O Festival e Academia Internacional de Clarinete de Galicia 2021 está dirixida por David Fiúza e Xocas Meijide e inclúe unha vintena de concertos, exposicións, conferencias e clases maxistrais.

Román Rodríguez felicitou aos directores por elixir a comarca do Deza para esta iniciativa, xa que, tal e como salientou, conta cunha “importante e célebre tradición de músicos, instrumentistas e compositores”. “A calidade da formación dos músicos lalinenses ao longo da historia foi sentando as bases dunha canteira de novos aprendices ata consolidarse como un auténtico lugar de referencia no eido musical”.

Tamén destacou que un dos grandes atractivos desta cita é o gran nivel dos artistas invitados que inclúe músicos e profesionais de diferentes nacionalidades europeas. Concretamente, os clarinestistas que, ademais de Xocas Meijide, participan no Xacobeo Clarinet Fest 2021 son os italianos Lorenzo Copolla e Massimo Mazzone, os portugueses Vitor Matos e Sergio Pires e os españois José Luís Estellés, Juan Ferer, Jacier Llopis, Josep Sancho, Josep Fuster, José Franc Ballester e Lara Díaz.

 

Participantes

Como directores participarán o dezano David Fiuza, director da cita, e o valenciano Andrés Valero-Castells. A lista de invitados á cita complétase cos pianistas Alicia González Permuy, Cristina Esclapez e Pablo Rodríguez, considerados máximos expoñentes dentro da súa especialidade.

O programa inclúe un amplo abano de actividades gratuítas entre as que, ademais dunha vintena de actuacións musicais, se inclúen múltiples clases maxistrais impartidas polos intérpretes invitados. Estas citas se celebrarán en emprazamentos de Lalín como o conservatorio, a sede do Concello, a praza da igrexa, o Museo Municipal Ramón María Aller, o auditorio municipal, o Casino ou as principais rúas da vila co obxectivo de abrir o festival ao conxunto da sociedade e lograr unha maior asistencia e difusión.  

> Lalín |Marzo 2021

A Xunta investirá 600.000 euros na rehabilitación do CEIP Xoaquín Loriga

Román Rodríguez asegurou que será unha das primeiras actuacións de Plan de Nova Arquitectura Pedagóxica

> Redacción

A Xunta de Galicia vai acometer unha obra de rehabilitación enerxética no CEIP Xoaquín Loriga, de Lalín, cun investimento de arredor de 600.000 euros, tal e como anunciou o pasado mes de marzo o conselleiro de Cultura, Educación e Universidade, Román Rodríguez, nunha visita ao centro na que estivo acompañado do alcalde, José Crespo.

Román Rodríguez avanzou que esta obra será unha das primeiras actuacións que se van acometer ao abeiro do Plan de Nova Arquitectura Pedagóxica que vén de aprobar o Consello da Xunta e que suporá un investimento de 191 millóns de euros nesta lexislatura. “Este Plan −sinalou o conselleiro− será a guía para a definición e o deseño dos novos espazos educativos de xeito que dean resposta ás necesidades educativas, sanitarias e tecnolóxicas do futuro e, polo tanto, as actuacións previstas no Xoaquín Loriga tamén se van cinguir ás condicións aquí marcadas”.

Os obxectivos xerais do Plan de Nova Arquitectura Pedagóxica vanse recoller no proxecto de rehabilitación integral que a Consellería de Educación vai acometer CEIP Xoaquín Loriga, e que suporá un aforro enerxético estimado de arredor do 28% en canto a consumo e do 38% en canto a emisións de CO².

 

Licitación en abril

A previsión coa que traballa o departamento educativo da Xunta é que en abril se liciten as obras, que terán un prazo de execución de tres meses a partir da adxudicación.

As actuacións previstas neste centro abranguen a mellora da fachada á que se dotará de illamento térmico, a substitución das cubertas actuais por outras con illamento de lá de roca, a substitución de todas as carpinterías interiores e exteriores e ventás. Así mesmo, en canto á melloras funcionais, acometerase a remodelación dos aseos do profesorado e do alumnado, procederase ao illamento acústico de todas as aulas, substituiráns as luminarias por outras de baixo consumo e levaranse acabo melloras estéticas como o pulido do actual pavimento de terrazo.

Lalín homenaxea a Sucasas cunha exposición

A mostra percorre a traxectoria do pintor lalinense e a súa vinculación ao Deza 

O conselleiro de Cultura, Educación e Universidade, Román Rodríguez, participou en Lalín na inauguración de Alfonso Sucasas: a figura e a súa contorna coa que se lle rende homenaxe a este pintor facendo un percorrido por toda a súa traxectoria. Trátase dunha mostra visitable no Museo Ramón Mª Aller de Lalín que reflicte a importancia do pintor para a cultura galega en xeral e a historia da comarca do Deza en concreto.

Grazas a esta iniciativa, ata o 30 de xullo os que se acheguen ao museo lalinense poderán gozar dun percorrido pola vida e obra do pintor a través de 40 óleos e 20 debuxos cos que se repasa toda a súa traxectoria. Inclúense nesta selección pezas dos seus primeiros anos, así como traballos feitos na súa etapa en Venezuela e Brasil. O percorrido expositivo continúa con cadros realizados na década dos 60 e 70, xa de volta en España, e remata con algúns dos seus últimos traballos. Na mostra comisariada por Pilar Corredoira tamén se inclúen pezas dedicadas as carballeiras lalinenses e a obra inédita O bico de Andrés.

 

Miscelánea

Pilar Corredoira é unha profunda admiradora do pintor, ao que coñeceu persoalmente, e destaca de o vencello profundo da súa obra coa Comarca do Deza. Na inauguración da mostra, a comisaria asegurou que o pintor “foi un dos artistas que mellor reflicteu o sentimento do ser humán e a súa problemática coa terra”.

Desta vinculación de Alfonso Sucasas coa súa terra falan paisaxes en cuadros adicados a carballeiras lalinenses coma a fraga de Catasós ou a de Barcia. Tamén unha maternidade reflexa a visión particular deste artista universal, os seus paisanos, con esceas coñecidas coma as dos xogadores de cartas, forman parte dunha coidada miscelánea de obras que permitirán aos visitantes descubrir moito máis de Sucasas e a súa vinculación coa Comarca do Deza. 

Adxudicadas a Construcciones Ramírez as obras do CIS de Lalín por 8,7 millóns de euros

Os traballos comezarán esta primavera e finalizarán antes de que remate 2022

> Redacción

A Xunta vén de adxudicar a mediados do pasado mes de marzo as obras de construción do Centro Integral de Saúde de Lalín por un importe de máis de 8,7 millóns de euros.Os traballos, cun prazo de execución de 18 meses, foron adxudicados á empresa Construcciones Ramírez S.L.U.

As obras comezarán na primavera e axilizaranse de forma que o novo equipamento estea ao servizo dos veciños de Lalín e da comarca do Deza antes de que remate 2022.

Os traballos consistirán na construción dunhas instalacións que reforzarán a atención aos veciños de Lalín, Rodeiro, Dozón e Agolada, ademais de prestar determinadas asistencias aos concellos de Silleda e Vila de Cruces, servindo a unha poboación de 35.000 persoas.

Construirase un edificio de máis de 5.700 metros cadrados, cunha superficie útil de máis de 4.900 metros cadrados, que se distribuirán en catro andares, dos cales tres se dedicarán ao centro de saúde e un ao Punto de Atención Continuada (PAC).

 

Equipamento

O novo equipamento sanitario disporá de área asistencial, con 11 consultas de medicina, 11 de enfermería, 1 consulta de farmacia, 2 consultas de odontoloxía, sala de técnicas, mostras e varias polivalentes; tamén área de especialidades, con 4 consultas, 2 de enfermería e 3 gabinetes de exploración; área pediátrica, con 3 consultas, 2 de enfermería e 1 sala de atención integral; ademais de área de hospitalización a domicilio, atención á muller, rehabilitación, telemedicina, diagnóstico por imaxe ou hemodiálise; e o punto de atención continuada (PAC), que disporá de 3 consultas, sala de críticos, sala de observación e 5 dormitorios.

A posta en marcha do Centro Integral de Saúde de Lalín permitirá ampliar o programa de cirurxía menor ambulatoria, activar o servizo de rehabilitación cardíaca, de solo pélvico e de enfermidades músculo-esqueléticas. As instalacións disporán dunha área de servizo de transporte sanitario con soporte vital básico, espazos comúns, de persoal, administración e arquivo.

A Xunta oferta 291 prazas nas escolas infantís do Deza para o curso 2021-2022

Luís López confirma que se manterán as 8 escolas infantís na comarca

> Redacción

A Xunta de Galicia vai ofertar 291prazas públicas autonómicas na rede de escolas infantís A Galiña Azul para o vindeiro curso 2021/2022 logo da correspondente publicación da planificación de centros. Ademais, a Consellería de Política Social acaba de abrir o período de solicitude de praza ata o 12 de abril e informa de que a mesma pode formalizarse por medios telemáticos a través da sede electrónica da Xunta de Galicia. En caso de dúbida, os usuarios poden recabar información nos propios centros infantís.

Na escola de Pontiñas en Lalín haberá 74 prazas, no Lalín 2000 outras tantas, en Vila de Cruces serán 61 as prazas ofertadas e no caso de Silleda o número ascende a 82 prazas. Así o explicou o delegado territorial da Xunta en Pontevedra, Luis López, segundo a planificación desta prestación en toda a provincia. López confirmou que, para o vindeiro curso, manteranse as oito escolas infantís nas comarcas de Deza e Tabeirós-Terra de Montes, das que a dúas corresponden ao Concello de Lalín, e que comezarán a súa actividade o 6 de setembro de 2021 cun tempo máximo de ata once meses e oito horas diarias por cativo.

 

Gratuidade

Ademais, a Consellería de Política Social mantén, por segundo curso consecutivo, a gratuidade total de matrícula e servizos nas escolas infantís de Galicia –incluíndo as municipais, de iniciativa social e privadas– dos segundos fillos e consecutivos tras a súa implantación hai un ano co obxectivo de facilitar a conciliación e axudar ás economías familiares.

“Temos unha gran rede de escolas infantís que, ademais de atender axeitadamente aos nosos cativos e contribuír a que comecen paseniñamente coa súa formación, amosáronse como un lugar seguro fronte á covid-19”, explicou o delegado territorial, que tamén puxo en valor a gratuidade para os segundos fillos e sucesivos, “xa que se trata dunha medida pioneira e única en España que amosa o compromiso que temos coas familias, coa súa calidade de vida e co favorecemento da conciliación”.

Contacto

Director Xerente: Manuel Núñez Fiuza

Deseño e maquetación: Bearisa
Colaboradores: Iago Mouriño, Bartolo Landiño, Tomás Troitiño,
David Devesa, Luis Lince, Pedro Carrio, Manuel Estévez e González Bearisa.

Administración-Publicidade: Rúa Arenal 1 Entrechán - Lalín.
Tlf.: 986 780 615986 780 615 • Fax: 986 780 615 • Móvil: 625 120 810625 120 810
e-mail: manuelfiuza@gmail.com

 

www.lalinecomarca.es