> Dozón |Xuño 2023

Adolfo Campos afianza cun concelleiro máis a súa maioría absoluta

O alcalde comprometeuse a seguir colocando a Dozón como “referente do rural galego”

Redacción

O candidato do PP á Alcaldía de Dozón, Adolfo Campos aumentou a súa maioría absoluta no consistorio nas eleccións municipais do pasado 28 de maio. Campos acadou un total de 7 dos 9 edís da corporación, subindo un concelleiro respecto dos resultados de 2019. Dos comicios saíu ademais 1 concelleiro para UCIN (Unión de Ciudadanos Independientes), Mónica Pousa Silva; e outro concelleiro para o BNG, Miguel Ángel Docasar, que perdeu nas eleccións un dos seus representantes na corporación castreña. Adolfo Campos quixo lembrar que o PP de Dozón foi a opción máis votada da provincia o 28-M, co 78% das papeletas. Segundo asegurou orgulloso o rexedor, o resultado das eleccións para o PP de Dozón “demostra que os veciños queren que continúe un proxecto que para este mandato conta con 25 propostas para modernizar Dozón e para que sexa un referente do rural da Galicia interior que segue viva”. Ademais recalcou que o seu goberno tende a man ás propostas da oposición neste novo mandato.

Logo do resultado nas urnas, o pasado 17 de xuño celebrouse na recen estreada Casa Consistorial de Dozón o pleno de investidura no que se constituíu a nova Corporación municipal que gobernará o concello os vindeiros catro anos. Adolfo Campos foi elixido alcalde cos votos dos 7 concelleiros que o PP acadou nas eleccións. Na sesión presentou a súa candidatura tamén a concelleira de UCIN e o concelleiro do BNG, e cada un deles votouse a sí mesmo.

A diferencia do resto dos concellos da comarca, onde as sesións sobrepasaron os 40 minutos de duración, no caso de Dozón a cerimonia foi breve xa que a votación non se realizou en urna senón a man alzada, o que axilizou a sesión, que rematou en pouco máis de vinte minutos. No salón de plenos, conformaron a mesa de idade dous concelleiros do PP, o de maior e menor idade, Gumersindo Doporto e César Pérez, respectivamente. Os novos concelleiros prometeron ou xuraron os seus cargos, e no caso do BNG cun exemplar do “Sempre en Galiza” de Castelao.

A concelleira de UCIN, Mónica Pousa, estréase na política local logo de que o cabeza de lista ás eleccións municipais, José Carlos Presas, renunciara á súa acta de concelleiro, pasando así á número 2 da lista que xa forma parte dende o pasado 17 de xuño da nova corporación municipal.

 

“Referente” do rural

Na súa primeira intervención coma alcalde deste mandato, Adolfo Campos agradeceu a todos os veciños e veciñas de Dozón o apoio masivo que lle deron nas urnas o pasado 28 de maio. Ademais quixo facer unha mención especial a todo o grupo humano do PP local que o acompañou nesta campaña electoral “que participaron no traballo colectivo e o éxito acadado”. Con todos eles, Campos reafirmou que o goberno local seguirá traballando “e posicionando a Dozón coma un concello referente no rural galego”.

Para acadar este obxectivo, o alcalde de Dozón comprometeuse a traballar arreo para que Dozón “continúe sendo o concello máis inversor da provincia de Pontevedra, como viñemos sendo estes últimos anos”.

Resultados electorais

A participación o pasado 28 de maio nas eleccións situouse en Dozón no 78,3% do electorado, un punto por baixo da media dos concellos da comarca. Así a todo os resultados deixaron un respaldo aplastante para o candidato e alcalde do PP que acadou 588 votos e un concelleiro máis que en 2019, aumentando en 94 os votos recibidos. Este crecemento do rexedor do PP veu propiciado polo forte descendo en apoio dos dous partidos da oposición, BNG e UCIN.

No caso de UCIN foron 84 os votos na xornada electoral, fronte aos 137 que obtivera fai catro anos, co que perdeu 53 respaldos. Logo de renunciar o cabeza de lista á súa acta será a número 2, Mónica Pousa, quen exerza a oposición no concello co respaldo do 11% dos votos. O BNG perdeu nestes comicios 85 votos respecto dos acadados fai catro anos, e un concelleiro. Finalmente os nacionalistas acadaron 78 votos e o seu único concelleiro, Miguel Ángel Docasar, conta co respaldo do 10,29% do electorado en Dozón.

 

Primeiras actuacións

Só dous días despois de constituírse a corporación local comezaron en Dozón as obras de rehabilitación do firme da autoestrada AG-53 entre Dozón e Ourense. Unhas obras que leva a cabo a Consellería de Infraestruturas e Mobilidade cun investimento de 423.500 euros. Esta actuación enmárcase na campaña de conservación da Xunta de reforzo localizado do firme e se levan a cabo en ambas calzadas dun treito de perto de 13 kilómetros de lonxitude deste vial dende Cea e ata a A-52, entre os kilómetros 74,2 y 87, que presentaban danos superficiais na capa de rodaxe. Ademais esta actuación inclúe outras obras puntuais de renovación do firme na calzada dereita do tramo Dozón-Cea, á altura do kilómetro 59,9. Ao longo de todo o mes de xuño se levan a cabo estes traballos de acondicionamento do firme, durante 2 ou 3 semanas, nas que se produciron cortes de carrís cunha lonxitude máxima de 3 kilómetros para provocar menos efectos no tráfico da AG-53. Segundo explicou a Xunta as actuacións consisten no fresado e reparación da capa de rodaxe e, nalgúns casos, tamén na capa intermedia do pavimento. Estas actuacións abarcan unha superficie aproximada de 12.000 metros cadrados, cun volúme de pavimento retirado e reposto de aproximadamente 2.700 toneladas.

 

Contacto

Director Xerente: Manuel Núñez Fiuza

Deseño e maquetación: Bearisa
Colaboradores: Iago Mouriño, Bartolo Landiño, Tomás Troitiño,
David Devesa, Luis Lince, Pedro Carrio, Manuel Estévez e González Bearisa.

Administración-Publicidade: Rúa Calzada 11, 4º B - Lalín.
Tlf.: 986 780 615986 780 615 • Fax: 986 780 615 • Móvil: 625 120 810625 120 810
e-mail: manuelfiuza@gmail.com

 

www.lalinecomarca.es