> Dozón |Abril 2021

Rematado o acondicionamento de varios treitos da Vía da Prata en Dozón

Luis López e o alcalde supervisaron este proxecto, no que se investiron 20.000 euros

> Redacción

A Vicepresidencia primeira da Xunta de Galicia vén de rematar as obras de acondicionamento de varios treitos do Camiño de Santiago correspondentes coa Vía da Prata ao seu paso polas parroquias de San Salvador do Castro e Santa María de Bidueiros, no Concello de Dozón, grazas a un investimento de 20.000 euros ao abeiro da orde de axudas de mellora paisaxística e embelecemento das rutas xacobeas e da súa contorna.

Así, o delegado territorial da Xunta en Pontevedra, Luis López, e o alcalde de Dozón, Adolfo Campos, achegáronse ata a zona beneficiaria para supervisar esta actuación, orientada a corrixir as deficiencias do firme nuns treitos de acusado desnivel que misturaban o firme de zahorra co existente en estado natural.

Nesta visita, Luis López garantiu que haberá novas actuacións do Goberno galego para a mellora e embelecemento dos máis de 70 quilómetros das dúas rutas xacobeas que pasan pola bisbarra do Deza, a Vía da Prata e o Camiño de Inverno, e convidou aos concellos de Lalín, Silleda, Rodeiro e Dozón, que son polos que discorren estes percorridos, “a que aproveiten todas as oportunidades que se lle brindan dende a Xunta con motivo do Xacobeo 21-22”.

 

Novas actuacións

Neste senso, o delegado territorial lembrou que o executivo autonómico financiou ata oito proxectos –tres públicos e cinco privados– de mellora do Camiño na bisbarra do Deza o pasado ano cun investimento de máis de 80.000€ e revelou que a convocatoria de 2021 incrementou a partida nun 25% ata 1,5 millóns de euros.

En canto á actuación realizada no concello castrense, centrouse nos treitos máis danados, principalmente pola escorrentía das augas e o desnivel, cun escarificado para igualar os niveis e un recheo a base de zahorra de 20 centímetros de grosor cun posterior compactado para o seu correcto acabado. Así mesmo, á capa dotóuselle dunha lixeira pendente cara a cuneta para evacuar as augas da choiva e tamén se procedeu á instalación de tubaxe con embocaduras de formigón para a canalización das pluviais nos puntos onde cruzan o sendeiro de peregrinos.

O Concello acada a axuda da Xunta para obras de mellora na contorna da Casa Consistorial

Un total de 39 municipios da provincia repartirán 2,3 millóns de euros desta liña de axudas

> Redacción

O Concello de Dozón recibirá axuda da Xunta para realizar obras de mellora na contorna da Casa Consistorial. Dozón é o único municipio da Comarca do Deza que acadou esta achega do goberno galego. A Consellería de Medio Ambiente, Territorio e Vivenda acaba de resolver as axudas para crear ou mellorar infraestruturas municipais a un total de 39 concellos galegos, por un importe global de preto de 2,3 millóns de euros.

Esta liña de subvencións, impulsada polo Goberno galego ten por finalidade humanizar as vilas galegas e frear o despoboamento, potenciando para elo as infraestruturas e servizos e mellorando o benestar e a calidade de vida da súa poboación.

As axudas concedidas equivalen ao 70% do custo total da actuación subvencionable e a contía máxima a percibir por cada concello, en todo caso, será de 67.760,00 euros (IVE engadido). As actuacións deberán cumprir coas recomendacións establecidas na Guía de boas prácticas en intervencións en espazos públicos elaborada polo Instituto de Estudos do Territorio, en liña co Plan estratéxico da paisaxe galega que guiará a acción neste eido nos vindeiros catro anos.

 

Colaboración cos concellos

Dende a Xunta destacan que esta orde de subvencións, convocada por concorrencia non competitiva, enmárcase na aposta da Consellería de Medio Ambiente, Territorio e Vivenda por manter liñas de colaboración directa cos concellos para facilitarlles a execución de proxectos en materia urbanística. De feito, nos orzamentos de 2021 ten reservados máis de 7,4 millóns para actuacións dedicadas tanto a crear ou recuperar equipamentos municipais, como a acadar a posta en valor das contornas urbanas.

Unha parte destes fondos destinarase a cofinanciar proxectos municipais a través da sinatura de convenios cos concellos no marco do Plan Hurbe, un programa posto en marcha en 2010 e a través do cal a Xunta executou ou ten comprometidas un total de 317 actuacións urbanísticas en máis dun cento de municipios; e a outra, á convocatoria da orde de axudas dirixida a concellos de menos de 20.000 habitantes.

> Dozón |Marzo 2021

O Concello de Dozón ultima a instalación das illas de contedores para activar a recollida selectiva

Adolfo Campos pide que “toda a veciñanza tome conciencia”

> Redacción

O Concello de Dozón finalizará a comezos deste mes de abril a instalación das novas illas de contedores de lixo para, a continuación, completar a implantación da recollida selectiva tras reestruturar cos operarios municipais e coas empresas externas correspondentes as quendas e rutas de baleirado dos contedores.

Este proceso de despregue dos contedores efectuouno nas últimas semanas a brigada municipal, polo que, ao ter que alternar esta tarefa con outros cometidos, dilatouse un pouco máis do previsto. O alcalde, Adolfo Campos Vázquez, sinalou ao respecto que “na maior parte dos lugares a creación das illas de contedores requiriu a preparación dunha base, o que motivou que estes traballos se prolongasen algo máis do inicialmente previsto”.

 

Compromiso de goberno

O rexedor local fixo fincapé no feito de que a activación da recollida selectiva era “un dos compromisos asumidos polo goberno local” e salientou a importancia de que “toda a veciñanza tome conciencia de que o bo funcionamento da recollida selectiva dependerá do comportamento particular de cada cidadán á hora de separar responsable e axeitadamente os diferentes tipos de residuos”. Con tal motivo, o goberno local distribuíu en días pasados folletos explicativos en todos os fogares para que cada veciño/a dispoña da información necesaria para clasificar e separar os residuos. Por último, o rexedor local lembrou tamén que aqueles veciños/as que desexen solicitar composteiros individuais deben dirixirse ao consistorio para posteriormente realizar unha petición conxunta á Deputación de Pontevedra ao abeiro do Plan Revitaliza.

 

Mellora de viais e saneamentos

Por outra banda, o Concello de Dozón tamén acometeu recentemente outras actuacións de mellora no polígono industrial. Concretamente, no exercicio de 2020 realizou un investimento de 162.000 euros para o acondicionamento de viais e saneamentos. 

O goberno local a piques de rematar as bases para licitar os espazos dispoñibles no Viveiro de Empresas

Campos confía en que a nova instalación estea ocupada e operativa antes do verán

> Redacción

O Concello de Dozón activará nas vindeiras semanas o proceso administrativo para poñer en marcha un dos proxectos relevantes do actual mandato, como é o novo Viveiro de Empresas situado no Polígono Industrial de Dozón.

As instalacións deste viveiro, que constan de dúas naves independentes de 240 metros cadrados de superficie, supuxeron un investimento de 278.000 euros, dos cales o 80% aportouno a Consellería de Economía, Empresa e Innovación e o 20% restante achegouno o concello con fondos propios.

Unha vez rematadas as obras de construción, o goberno local aprobou no pleno do pasado mes de febreiro a ordenanza fiscal reguladora do prezo público pola utilización dos espazos dispoñibles no viveiro, que estableceu un custo mensual de 0,40 euros por metro cadrado de superficie útil, cantidade á que debe engadírselle o IVE correspondente. A maiores desta taxa polo aluguer durante o período de concesión, os adxudicatarios das naves deberán asumir os gastos polo subministro de auga, a recollida de lixo, o consumo de enerxía eléctrica, as comunicacións telefónicas e calquera outro custo de material de oficina ou servizos de comunicación.

 

Prazos

O alcalde de Dozón, Adolfo Campos Vázquez, manifestou a súa intención de que este novo Viveiro de Empresas “poida estar ocupado e plenamente operativo antes do verán, se a situación derivada da pandemia non dilata os prazos previstos”.

“Desde o goberno local establecemos unhas taxas de aluguer por debaixo dos prezos medios do mercado e tamén por debaixo doutros viveiros semellantes existentes na contorna, como é o caso de Lalín. O noso obxectivo é favorecer o emprendemento e darlles as máximas facilidades posibles aos impulsores de proxectos empresariais preferentemente industriais e/ou produtivos que contribúan a xerar postos de traballo e, en consecuencia, riqueza no noso municipio”, subliñou. Neste senso, o rexedor local explicou que as dúas naves independentes dispoñen de zona de oficinas, espazo de servizos e área de produción, polo que “son válidas para proxectos empresariais de múltiples sectores, coa vantaxe competitiva engadida de estar situadas moi preto da AG-53 e practicamente equidistante de Santiago e Ourense, cunha saída óptima cara a Meseta”. 

Contacto

Director Xerente: Manuel Núñez Fiuza

Deseño e maquetación: Bearisa
Colaboradores: Iago Mouriño, Bartolo Landiño, Tomás Troitiño,
David Devesa, Luis Lince, Pedro Carrio, Manuel Estévez e González Bearisa.

Administración-Publicidade: Rúa Arenal 1 Entrechán - Lalín.
Tlf.: 986 780 615986 780 615 • Fax: 986 780 615 • Móvil: 625 120 810625 120 810
e-mail: manuelfiuza@gmail.com

 

www.lalinecomarca.es