> Cultura |Setembro 2017

Román Rodríguez anima a congregar na Cidade da Cultura un cento de corais con motivo da próxima Romaría Coral Galega

O conselleiro asistiu á XIV edición deste evento musical que se celebrou en Rodeiro, na que participaron 24 formacións corais.

> Redacción

O conselleiro de Cultura, Educación e Ordenación Universitaria, Román Rodríguez González, aproveitou a súa asistencia á XIV Romaría Coral Galega, que se celebra en Rodeiro este mes de setembro, para animar á Federación Coral Galega (FEGOCA) -impulsora deste evento- a que a próxima edición se celebre na Cidade da Cultura de Galicia. En palabras do conselleiro, intentar congregar un cento de agrupacións corais no Gaiás con motivo do décimo quinto aniversario desta Romaría sería “un acto cultural e de galeguismo que daría visibilidade ao mundo das corais en Galicia”.
Na súa intervención o conselleiro loubou a “longa tradición” desta Romaría que arrancou no ano 1987 e que a día de hoxe xa está consolidada como unha manifestación da identidade e das tradicións do pobo. Tamén aludiu ás “raíces profundas” do movemento coral, que ten a súa orixe no Rexurdimento da man de figuras como o gran compositor Pascual Veiga, autor da música do Himno galego; e que se foi arraigando ao longo do tempo a través de agrupacións centenarias como o Real Coro Toxos e Froles de Ferrol, entre outros.

 

Selo de calidade
Así mesmo subliñou o “papel clave” que ten neste eido a Federación Coral Galega co impulso de este tipo de certames dun xeito continuado e estable no tempo. Os 245 coros que conforman o mapa polifónico galego son, a xuízo do conselleiro de Cultura, “un selo de calidade tanto desde o punto de vista cuantitativo como cualitativo”.
Finalmente ratificou o apoio do departamento de Cultura a este tipo de manifestacións culturais. De feito, a Consellería mantén un convenio coa Federación Coral Galega, dotado con 24.000 euros, para a realización da programación Lírica 2017.
O departamento de Cultura lembrou tamén que nos vindeiros días se publicará no DOG o apoio do Goberno Galego ás escolas de música a través dunha liña de axudas habilitada este ano e dotada con 300.000 euros, tanto para as dependentes dos concellos como de asociacións e fundación sen ánimo de lucro. 

O Mosteiro de Carboeiro bateu en agosto o seu récord de visitas con 3.303 entradas

Dende o 1 de setembro este enclave patrimonial ten novo horario de apertura.

> Redacción

O mosteiro de Carboeiro bateu este mes de agosto pasado o récord absoluto de visitas no mes de verán por excelencia. Así, nos 31 días de agosto rexistráronse un total de 3.303 entradas, cifra nunha antes vista dende que se fan estatísticas dos datos de visitantes a este enclave patrimonial.
O segundo mes deste ano con máis visitas foi abril (coincidindo coa Semana Santa) con 2.224 entradas, seguido de xullo, con 2.107 e maio, con 1.904. En xullo foron 1.786 as persoas que se achegaron ata o mosteiro nun ano tamén excepcional en canto á climatoloxía con outro balance moi positivo no primeiro trimestre do ano, con máis de 2.300 entradas nos tres meses.
“Como xa se prevía, Carboeiro segue a confirmarse como o gran buque insignia do turismo na nosa comarca”, segundo dixo a concelleira de Turismo de Silleda, Ana Luisa González, “tal e como se lle recordou a semana pasada ao conselleiro de Cultura, Román Rodríguez, durante a súa visita ao mosteiro”, explicou a concelleira.


Novo horario
O mosteiro de Carboeiro aplica ademais dende este mes de setembro un novo horario. Así estará aberto ao público, ao igual que nos últimos dous meses de martes a domingo, de 11:00 a 14:30 horas; e pola tarde adiantase a hora de peche, estando a entrada dispoñible de 16:30 a 19:00 horas. 
A igrexa do templo románico, o claustro, e tamén a ponte do Demo xunto co fermoso entorno natural de Carboeiro seguen a cautivar a milleiros de visitantes cada ano procedentes tanto de Galicia como de diversas comunidades autónomas e países do estranxeiro. 

Román Rodríguez sinala o castro de Doade coma un referente na compilación de datos do rural galego

O conselleiro de Cultura presentou neste centro os resultados da terceira campaña de escavación arqueolóxica.

> Redacción

O conselleiro de Cultura, Educación e Ordenación Universitaria, Román Rodríguez, visitou o pasado mes de agosto o Museo Etnográfico Casa do Patrón, en cuxa sala de arqueoloxía se presentaron os resultados da terceira campaña de escavación realizada no Castro de Doade, que sinalou como un referente na recompilación de datos sobre o rural galego. 
Román Rodríguez quixo felicitar ao equipo da Casa do Patrón e aos arqueólogos participantes nesta terceira campaña -5 alumnos do máster de arqueoloxía da USC e da UVigo e 5 arqueólogos profesionais- polo minucioso traballo realizado, grazas ao que podemos coñecer detalles sobre a vida dos nosos antepasados. 

 

Ampliación da sala
A exhibición dos achádegos da terceira campaña coincide coa ampliación -a través da exhibición dos restos da campaña de 2016- da sala de arqueoloxía Aurelia do Castro de Doade, inaugurada o ano pasado no Museo como un proxecto pioneiro para a posta en valor do patrimonio local. Nun primeiro momento o espazo contaba con máis de 3500 pezas expostas, atopadas en anteriores intervencións, aos que agora se sumarán os restos mais relevantes entre os 7636 localizados na campaña 2016, que acaban de ser entregados ao Museo polos arqueólogos, unha vez catalogados e estudados. Trátase de pezas datadas entre os séculos V a. de C. e o século II d. de C., das que as máis relevantes, unha ola de cerámica indíxena  íntegra, dúas fíbulas e outros materiais de bronce, foron  totalmente restauradas.
Posteriormente, tamén se catalogarán as pezas achadas en 2017, que se cifran en varios milleiros, aínda sen clasificar, e entre os que cabe destacar algúns que evidencian claros signos da romanización do Castro, como son fragmentos de Terra sigilata hispánica, fíbulas Aucissa, vidros, cravos, restos de ánforas béticas, etc.
Esta terceira campaña levada a cabo no Castro de Doade en 2017 consistiu na localización de dúas estruturas habitacionais. Unha delas é unha vivenda redonda, executada cunha construción mixta de chantos en muro de mampostería, que posteriormente foi anulada por outra de maior tamaño atopada na campaña anterior. 
O conxunto formado por estas construcións, que formaba parte do nutrido poboado existente na Aurela de Doade hai mais de 20 séculos, quedou totalmente consolidado e pódese visitar desde o pasado mes de xuño.

Amplíase ata o 15 de outubro a permanencia no Museo Gaiás de ‘Flor Novoneyra’, o testamento pictórico de Lamazares

A mostra do pintor lalinense inaugurouse o pasado mes de xuño.

> Redacción

Flor Novoneyra, a ambiciosa exposición sobre un dos pintores galegos con maior recoñecemento e proxección internacional: Antón Lamazares (Lalín, 1954), amplía a súa estadía no Museo Centro Gaiás, na Cidade da Cultura de Galicia, ata o 15 de outubro.
A exposición, que une dos xigantes da cultura galega como Lamazares e Uxío Novoneyra, foi inaugurada o 3 de xuño e tiña previsto clausurarse o 17 de setembro. No entanto, o Museo Centro Gaiás continuará a albergar un mes máis esta mostra que o mesmo artista do Deza define como o seu “testamento pictórico”. Flor Novoneyra está formada por máis dun cento de obras nas que Lamazares transcribe versos do poeta do Courel empregando o seu coñecido Alfabeto Delfín, un código inspirado no abecedario occidental que o pintor bautizou co nome do seu pai. A exposición supón, así, un diálogo entre pintura e poesía, o encontro entre o pintor que quería ser poeta, como Lamazares se ten descrito ao longo da súa carreira, co poeta namorado da pintura.
Ademais dos cadros de Lamazares, exhibe cincuenta caligramas do poeta, considerado un dos introdutores da poesía caligráfica na literatura galega. A través dun espazo sonoro, o visitante reencontrarase tamén nesta exposición coa voz de Novoneyra, considerado un gran dicidor de versos. A mostra complétase con retratos do autor do Courel realizados por Laxeiro, Tino Grandío, Tavera ou Lorente e cunha escolla de exemplares das súas obras.


Ampliación das visitas comentadas
Deste xeito, Flor Novoneyra compartirá espazo por máis tempo coa outra grande exposición que acolle na actualidade o Museo Centro Gaiás, Da árbore á cadeira, que pon en valor a riqueza ambiental dos bosques, da tradición en Galicia dos oficios vinculados ás artes da madeira e ao do deseño contemporáneo do moble. Ambas contaron durante os meses de verán de xullo e agosto con visitas comentadas, de balde, pola mañá e pola tarde, ás 12,30 e 17,30 horas, para unha descuberta máis polo miúdo de todas as pezas e as interesantes historias que agochan.
Estas dúas quenda diarias, de martes a domingos, tamén se ampliará a setembro, ata o día 17, ao igual que as visitas comentadas que se realizan ao complexo arquitectónico ideado por Peter Eisenman.

> Cultura |Xullo 2017

A Xunta pon os espazos do Gaias á disposición dos concellos para actos ou accións culturais

Román Rodríguez asinou coa Fegamp un convenio de colaboración para a cesión sen custe destas instalacións.

> Redacción

A Consellería de Cultura, Educación e Ordenación Universitaria pon á disposición dos concellos de toda Galicia os espazos da Cidade da Cultura co fin de que poidan aproveitar as posibilidades arquitectónicas e a visibilidade deste complexo para todas as presentacións e actos promocionais que desexen levar a cabo na capital de Galicia.
A colaboración entre o Gaiás e os concellos de Galicia pechouse este mes na sinatura dun convenio entre a directora xerente da Fundación Cidade da Cultura de Galicia, Ana Isabel Vázquez; e o presidente da Federación Galega de Municipios e Provincias (Fegamp), Alfredo García Rodríguez, unha sinatura que foi presidida polo conselleiro de Cultura, Educación e Ordenación Universitaria, Román Rodríguez.


Un espello para 313 rostros
O conselleiro destacou que “a apertura do Gaias a todos os concellos de Galicia é unha prioridade” na xestión da Cidade da Cultura, e subliñou que este complexo debe operar como “unha plataforma para dar a coñecer o mellor da nosa Comunidade”. Neste sentido, remarcou que “os 313 rostros do noso país deben poder ollarse nun mesmo espello; e ese espello é a Cidade da Cultura”, á que definiu como “a casa cultural de todos os galegos e galegas”.
Por iso, Román Rodríguez animou a todas as entidades locais a que se sumen a este acordo, posto que se trata dunha garantía para darlle máis visibilidade ás actividades dos concellos e para lograr máis beneficios turísticos.
Pola súa banda, o presidente da Fegamp fixo fincapé en que “é un acerto que os concellos podan utilizar as instalacións da Cidade da Cultura de forma gratuíta e aínda máis para os concellos pequenos e con menos recursos, xa que non se poderían permitir o uso destes espazos debido ao custo que suporía”. Así mesmo, subliñou que “este convenio mantén a liña de colaboración do goberno autonómico cos concellos e que é unha forma de poñer en valor o Gaias e achegalo a todos os galegos e galegas”.
A Fegamp presentará agora este convenio a todos os concellos galegos promovendo a súa adhesión e informando de que os que participen poderán empregar sen custe os espazos da Cidade da Cultura. 

O legado literario, ético e emocional de Rosalía de Castro para Galicia

Román Rodríguez participou no acto de conmemoración do 132 aniversario do pasamento da precursora das nosas letras.

> Redacción

O conselleiro de Cultura, Educación e Ordenación Universitaria, Román Rodríguez, participou este mes na Casa da Matanza no acto de conmemoración do 132 aniversario do pasamento de Rosalía de Castro, no que destacou a importancia do legado literario, ético e emocional da precursora das nosas letras para o desenvolvemento de Galicia. “Na figura de Rosalía temos un referente que imitar e co que orientarnos na sociedade actual, ela debe estar presente na nosa acción política e cívica”, salientou.
O conselleiro tamén fixo alusión na súa intervención ao papel de dinamización e promoción cultural desenvolvido pola Fundación Rosalía de Castro e deulle os parabéns aos gañadores das tres categorías do V Concurso Escolar de Poesía, que ao longo do acto leron os poemas galardoados.
O acto foi precedido dunha visita institucional ao espazo museístico guiada por Pepe Barro. Na conmemoración celebrouse a reapertura da Casa, despois das distintas obras e intervencións realizadas nos últimos anos e houbo un momento para a lembranza e o recoñecemento do papel de Camilo Agrasar, figura destacada polo seu traballo en prol da difusión do legado rosaliano no eido da Casa Museo.


Cabodano multitudinario
Ademais do conselleiro participaron neste cabodano rosaliano o presidente da Real Academia Galega, Víctor Freixanes; a vicepresidenta da Deputación da Coruña, Goretti Sanmartín; o presidente da Fundación Rosalía de Castro, Anxo Angueira; e o director do Ámbito Cultural de El Corte Inglés, Pati Blanco. Do mesmo xeito, interviñeron as profesoras Ana Blanco e Catherine Davies, e os gañadores de cada unha das tres categorías do V Concurso Escolar de Poesía. A conmemoración gozou dun colofón musical cun concerto de Amancio Prada e a interpretación do himno galego.
Román Rodríguez anticipou na súa intervención que, canda a Fundación Rosalía, se acometerán entre 2017 e 2018 novas obras na sede padronesa desta entidade. En concreto, levaranse a cabo diversas actuacións de acondicionamento e reforma dos edificios anexos á Casa-Museo e melloras na accesibilidade do conxunto. Unhas melloras nas que a Xunta de Galicia ten previsto investir 120.000 euros. 

“Os papeis do vello mariñeiro”, a obra póstuma de Neira Vilas

Este sexto título neiraviliano, composto por máis de 60 relatos, foi editado por Bolanda.

> Redacción

“Os papeis do vello mariñeiro”, máis de 60 historias de mariños mercantes galegos que Xosé Neira Vilas recompilou e deixou inéditos, dálle voz a un navegante galego alén mar: un personaxe dunha aldea do interior de Galicia, labrego, fillo e neto de labregos, que ao morrer deixa nun pallal esquecidos moitos dos recordos da súa vida de navegante.
Esta obra póstuma neiraviliana, a sexta que sae do prelo da man de Edicións Bolanda, presentouse este mes nun acto no que participou o secretario xeral de Política Lingüística, Valentín García, quen quixo ter unha sentida lembranza para o autor, falecido en 2015, e destacar que “volve a ilustrar con palabras o espírito da Galicia máis auténtica dun xeito maxistral”.
O acto contou tamén coa participación do editor, Antonio Couto; do presidente da Fundación Xosé Neira Vilas, Luís Reimóndez; e do secretario da Real Academia Galega, Henrique Monteagudo.
Neira Vilas ofrece, a través de entretidos contos e do personaxe do vello mariñeiro, unha clarificadora visión dun mundo moi descoñecido: o dos mariñeiros que pasan longas tempadas en alta mar percorrendo lugares do máis diverso e coñecendo países, xentes e culturas ben diferentes á propia. Experiencias que conforman unha forma de ser moi particular e que o autor transcribe nestes “papeis” póstumos para que poidamos coñecer mellor o vello mariñeiro galego e as súas peripecias polo mundo adiante nun tempo non moi afastado pero ben diferente ao actual.
A publicación intégrana máis de 60 relatos acompañados de cadansúa ilustración de Alberto Fernández, autor tamén da imaxe da capa. Trátase do sexto título do autor editado por Bolanda.

 

Xosé Neira Vilas
Xosé Neira Vilas (1928-2015) foi membro numerario da Real Academia Galega, Doutor Honoris Causa polas universidades da Coruña e da Habana e fillo predilecto do Concello de Vila de Cruces. Entroutros galardóns recibiu a Medalla Castelao, o Premio Laxeiro, o Pedrón de Honra, o Premio Trasalba, o Premio da Crítica Española (novela en galego) e o da Crítica Galega (ensaio). O Premio Otero Pedrayo 2013 recoñeceu de maneira unánime a súa contribución á cultura galega e recibiu, da man da Xunta de Galicia e do Goberno galego, o Premio da Cultura Galega das Letras 2014 e a Medalla de Ouro de Galicia 2015. 

A Xunta destina 390.000 euros a subvencionar 20 festivais galegos de música e de escena

Son 11 os eventos musicais que se repartirán este orzamento.

> Redacción

A Xunta de Galicia subvenciona este ano por valor de 390.000 euros un total de 20 festivais escénicos e musicais galegos, tal como se recolle na resolución publicada pola Axencia Galega das Industrias Culturais (Agadic) da Consellería de Cultura, Educación e Ordenación Universitaria.
A convocatoria deste ano, á que puideron acollerse eventos celebrados en Galicia entre o 1 de novembro de 2016 e o 31 de outubro de 2017, destina 220.000 euros para 11 festivais de música e 170.000 euros para os de teatro, danza e demais disciplinas escénicas.
A través destas axudas, a Xunta de Galicia busca contribuír á consolidación dun mapa galego de festivais de carácter profesional, así como a dinamizar a contratación artística e a creación de públicos nestes sectores culturais. De feito, o texto da convocatoria fai especial fincapé na consideración deste tipo festivais como un sector cultural estratéxico para Galicia e no impulso da súa profesionalidade, de xeito que se esixe que polo menos a metade dos concertos ou representacións programadas sexan de pago, agás no caso dos festivais escénicos de rúa.

 

Citas por toda Galicia
Os festivais musicais beneficiarios este ano son o Resurrection Fest en Viveiro, WOS Festival en Santiago, Sinsal Son Estrella Galicia na Illa de San Simón (Redondela), Portamérica en Caldas de Reis, Festival da Luz en Boimorto, SonRías Baixas en Bueu, Cantos na Maré en Pontevedra, Revenidas en Vilaxoán (Vilagarcía de Arousa), FIV de Vilaba, Festival V de Valarés de Ponteceso e Festival de Jazz de Lugo.
En canto aos encontros escénicos, reciben subvención o FIOT de Carballo, Galicreques de Santiago, Mostra Internacional de Teatro Cómico e Festivo de Cangas, FITO de Ourense, Mostra de Teatro de Cariño, Festival de Títeres de Redondela, Festiclown en Vilagarcía, Corpo(a)terra de Ourense e Festival de Teatro Galego do Carballiño. Na colaboración da Xunta de Galicia cos festivais de teatro galego, hai que engadir o apoio que se presta á Mostra Internacional de Teatro de Ribadavia, cofinanciada mediante un convenio asinado entre a Agadic e o concello ribadaviense por valor de 60.000 euros. 

> Cultura |Xuño 2017

A Cidade da Cultura acolle “Flor Novoneyra”, o testamento pictórico de Lamazares

A mostra permanecerá aberta ata setembro e nela Lamazares constrúe unha antoloxía plástica cos versos de Novoneyra.

> Redacción

Flor Novoneyra, a nova exposición do Museo Centro Gaiás, supón un encontro entre dous grandes da cultura galega: Lamazares e Uxío Novoneyra e que o propio artista do Deza define como o seu “testamento pictórico”. Flor Novoneyra está formada por máis dun cento de obras nas que Lamazares transcribe versos do poeta do Courel empregando o seu coñecido Alfabeto Delfín, un código inspirado no abecedario occidental que o pintor bautizou co nome do seu pai. A exposición supón, así, un diálogo entre pintura e poesía, o encontro entre o pintor que quería ser poeta, como Lamazares se ten descrito ao longo da súa carreira, co poeta namorado da pintura.
Flor Novoneyra, ademais dos cadros de Lamazares, exhibe cincuenta caligramas do poeta, considerado un dos introdutores da poesía caligráfica na literatura galega. A través dun espazo sonoro, o visitante reencontrarase tamén nesta exposición coa voz de Novoneyra, considerado un gran dicidor de versos. A mostra complétase con retratos do autor do Courel realizados por Laxeiro, Tino Grandío, Tavera ou Lorente e cunha escolla de exemplares das súas obras.


Ata o 17 de setembro
Producida pola Xunta de Galicia, a través da Fundación Cidade da Cultura, a exposición está comisariada por María Díaz Rey, directora da galería About Art en Pontevedra, e conta coa colaboración da Fundación Uxío Novoneyra a través da implicación da viúva e un dos fillos do poeta, Elba Rei e Uxío Novoneyra. O proxecto representa a proposta da Cidade da Cultura para a programación expositiva do verán e poderá visitarse desde o 2 de xuño ao 17 de setembro con entrada de balde. Flor Novoneyra conta co patrocinio do Fondo Gaiás da Empresa Galega. Case cinco décadas despois de que a súa aparición revolucionase a plástica en Galicia, Lamazares segue a ser hoxe un dos pintores galegos con maior proxección internacional. A súa obra, recoñecida dentro e fóra da comunidade, se ten exposto nos museos máis prestixiosos de España e en galerías internacionais de referencia. Influenciado polas vangardas, pintor-nómada que viviu en Nova York, París, Madrid e Berlín, a contorna rural que marcou a súa infancia no val do Deza deixou unha fonda pegada no seu imaxinario. O seu interese pola poesía e a súa relación de amizade con poetas son dúas constantes do seu universo creativo.

Cultura convoca 500.000 euros en axudas para mellorar a rede de equipamentos culturais dos concellos

Subvencionan equipamento escénico e audiovisual, iluminación e so.

> Redacción

A Consellería de Cultura e Educación promove a mellora da rede de equipamentos culturais de Galicia cunha nova convocatoria de axudas dotada economicamente con 500.000 euros. O Diario Oficial de Galicia publicou as bases desta liña de subvencións destinada ás corporacións locais e ás súas entidades públicas e que ten por obxecto adecuar as instalacións e locais municipais utilizados para a realización dunha actividade cultural estable, tanto no que respecta á mellora do equipamento como á dotación técnica.
Concretamente, a dotación das axudas destinarase á realización de investimentos de equipamento escénico, iluminación e son, equipamento audiovisual e xeral de sala, sistemas de prevención e seguridade, novas tecnoloxías, investimentos destinados á posta en funcionamento de locais para usos culturais, investimentos en bibliotecas públicas municipais, así como a accións encamiñadas á mellora da accesibilidade e á supresión de barreiras arquitectónicas.
A axuda máxima por beneficiario que concederá a Consellería será de 30.000 euros, que en ningún caso poderá exceder o 90% do orzamento total do proxecto subvencionable. Este importe de 30.000 euros ascenderá a 35.000 euros cando se trate de solicitudes presentadas conxuntamente por máis dunha entidade local. O prazo para a presentación comezará mañá, 30 de maio, e prolongarase durante un mes.

 

Proxectos apoiados en 2016
A través desta convocatoria de subvencións, a Secretaría Xeral de Cultura apoiou en 2016 un total de 91 proxectos municipais destinados a mellorar locais e instalacións de toda Galicia nos que se vén desenvolvendo unha programación cultural estable. A través de convenios de colaboración, o departamento que dirixe Anxo Lorenzo tamén colaborou o pasado ano na renovación do equipamento do Edificio de Usos Múltiples de Teixeiro, do Concello de Curtis, co acondicionamento do Centro Cultural Vista Alegre de Bandeira, no Concello de Silleda.
Na Rede de Bibliotecas Públicas de Galicia, ademais de realizar diferentes accións nos centros de xestión autonómica de Santiago de Compostela, Pontevedra, A Coruña, Lugo e Vigo para mellorar a accesibilidade, a iluminación ou os andeis, o Goberno galego subscribiu cadanseu convenio cos concellos de Lalín e de Mondariz para dotar de mobiliario a nova biblioteca lalinense e a recentemente rehabilitada de Mondariz, cun investimento total de 70.000 euros.

Contacto

Director Xerente: Manuel Núñez Fiuza

Deseño e maquetación: Bearisa
Colaboradores: Iago Mouriño, Bartolo Landiño, Tomás Troitiño,
David Devesa, Luis Lince, Pedro Carrio, Manuel Estévez e González Bearisa.

Administración-Publicidade: Rúa Arenal 1 Entrechán - Lalín.
Tlf.: 986 780 615986 780 615 • Fax: 986 780 615 • Móvil: 625 120 810625 120 810
e-mail: manuelfiuza@gmail.com

 

www.lalinecomarca.es

O Periódico | Lalín e Comarca en redes sociales :