> Cultura |Decembro 2017

Máis dun 30% das intervencións de Patrimonio poderán ser validadas dende os concellos

Este texto desenvolve a nova Lei do patrimonio cultural autonómica.

> Redacción

A Xunta de Galicia publicou este mesmo mes de decembro no Diario Oficial de Galicia unha instrución relativa ao trámite de autorizacións nos bens inmobles catalogados e declarados de interese cultural, os seus contornos de protección e as zonas de amortecemento de aplicación para a totalidade de concellos galegos.
Trátase dunha instrución negociada coa propia Federación Galega de Municipios e Provincias (FEGAMP) que vai a posibilitar que un mínimo dun 30% das autorizacións que antes tiñan que pasar pola Dirección Xeral de Patrimonio xa non precisen deste trámite. Este texto procura unha maior axilidade e unha seguridade xurídica para as persoas interesadas e as administracións implicadas.
Máis polo miúdo, o obxecto da instrución é desenvolver o criterio de interpretación sobre o réxime de autorizacións en materia de protección do patrimonio cultural e, dunha forma concreta, que actuacións sobre bens inmobles protexidos polo seu valor cultural ou, de ser o caso, nos seus contornos de protección ou zonas de amortecemento, non requiren da autorización previa da Consellería de Cultura, Educación e Ordenación Universitaria por non supoñer afección ningunha, nin poñer en risco os valores culturais protexidos. 

 

Desenvolvemento
Así mesmo, dende o goberno galego lembran que no proceso de desenvolvemento que leva a cabo a Consellería de Cultura da Lei de Patrimonio Cultural. O obxecto da instrución é desenvolver o criterio de interpretación sobre o réxime de autorizacións en materia de protección do patrimonio cultural é dunha forma concreta, que actuacións sobre bens inmobles protexidos polo seu valor cultural ou, de ser o caso, nos seus contornos de protección ou zonas de amortecemento, non requiren da autorización previa da Consellería de Cultura, Educación e Ordenación Universitaria por non supoñer afección ningunha, nin poñer en risco, os valores culturais protexidos.
Trátase dunha instrución negociada coa propia FEGAMP que describe o ámbito de aplicación para identificar as intervencións que non precisan dunha autorización previa en materia de patrimonio cultural en bens inmobles protexidos e describe a casuística completa ao respecto. 

O Museo De Belas Artes revisa as interpretacións da obra do lalinense Alfonso Sucasas

O conselleiro de Cultura e Educación inaugurou a mostra, que poderá visitarse ata o 25 de febreiro.

> Redacción

O conselleiro de Cultura, Educación e Ordenación Universitaria, Román Rodríguez, inaugurou este mes a exposición Alfonso Sucasas. Unha revisión, que repasa a traxectoria do pintor lalinense e busca unha nova mirada sobre as interpretacións dadas á súa obra. No marco da súa intervención, o titular do departamento de Cultura da Xunta de Galicia salientou a pintura de Sucasas como unha demostración auténtica de vitalidade e galeguidade, na man dun artista que “humedecía os seus pinceis nas súas emocións”.
Román Rodríguez lembrou que Sucasas é o creador dunha das imaxes de marca máis potentes e primixenias dos produtos de Galicia, a concha da vieira de Galicia Calidade, “símbolo e esencia do Camiño milenario de Santiago e tamén presente na imaxe do Xacobeo”. A súa obra, de dimensión internacional pero apegada ás súas orixes, converteuno nun dos mellores intérpretes artísticos da realidade galega, sinalou.
O conselleiro quixo felicitar ao comisario, Miguel Fernández-Cid e ao Museo de Belas Artes polo traballo realizado, así como agradecer a todas as persoas e entidades que fixeron posible a exposición, na maioría dos casos cedendo as pezas que a conforman. Román Rodríguez rematou convidando a visitar a mostra, que devolve a Sucasas ao circuíto expositivo galego e sitúao no lugar privilexiado da creación galega que lle corresponde.

 

Unha nova mirada
A mostra nace co obxectivo de buscar novas interpretacións sobre o traballo do pintor, coñecer mellor os postulados da súa obra, os seus intereses e as súas inquedanzas, coincidindo co quinto cabodano do seu pasamento. Para iso, analízanse de novo datos biográficos, cartas, entrevistas... do artista e repásanse os seus temas e iconografía, e mesmo algúns traballos pouco coñecidos dunha ampla traxectoria de máis de 50 anos de produción artística.
A exposición está conformada por 64 obras, entre pinturas e debuxos, datadas entre 1957 e 2010, entre as que destacan obras de grande formato como o autorretrato do pintor, cedido pola súa viúva María Espinosa; As ofrecidas da Lanzada ou o Tríptico dos peixes. 

O Gaiás acollerá dende marzo a exposición “Galicia universal”

A mostra reúne 194 obras dos artistas galegos máis relevantes.

> Redacción

O conselleiro de Cultura, Educación e Ordenación Universitaria, Román Rodríguez, e o director xeral de Responsabilidade Social Corporativa e Comunicación de ABANCA e presidente de Afundación, Miguel Ángel Escotet, anunciaron este mes que o Museo Centro Gaiás da Cidade da Cultura acollerá do 16 de marzo ao 14 de outubro de 2018 a exposición ‘Galicia universal. A arte galega nas coleccións de ABANCA e Afundación’.
A mostra presentará 194 obras das coleccións de ABANCA e Afundación, unha escolla de pinturas, esculturas, fotografías e instalacións dos artistas galegos máis relevantes desde o primeiro terzo do século XIX até hoxe, con nomes como Pérez Villaamil, Serafín Avendaño, Sotomayor, Castelao, Maside, Souto, Colmeiro, Laxeiro, Lugrís, Seoane, Maruja Mallo, Jorge Barbi, Manolo Paz, Francisco Leiro, Menchu Lamas ou Antía Moure, entre outros.
Román Rodríguez agradeceu a ABANCA e Afundación a súa xenerosidade nunha exposición que describiu como “a máis ambiciosa realizada nos últimos anos sobre arte galega” e na que o público constatará a relevancia de Galicia como “foco artístico durante os últimos douscentos anos”, cunha comunidade de creadores apegados ás raíces, pero conectados cos movementos do panorama internacional.

 

Programa de actividades
A exposición contará cun programa de actividades e visitas guiadas e didácticas co fin de contribuír á difusión das obras, cunha especial atención á comunidade escolar, pero tamén aos amantes da arte, co obxectivo de incrementar a afluencia de turismo cultural.
O atractivo da exposición virá reforzado polo deseño da montaxe, a cargo do recoñecido estudio galego de arquitectura Abalo e Alonso.
A exposición organiza as obras seguindo un criterio temático, no que as pezas se agrupan ao redor de cuestións como a cultura popular, a presenza da muller na arte, o compromiso social, a paisaxe, o retrato, a tradición e renovación ou os movementos da nova arte galega. Permite comprender como a construción da arte galega e o resulta de dous factores: do compromiso dos artistas coa identidade e, por outro banda, da súa vocación de universalidade, reflectida na ligazón coas tendencia e movementos internacionais. 

O Deza lembra a Xosé Cuíña

Conselleiros, alcaldes, políticos, familiares e amigos asistiron en Lalín á homenaxe ao político dezano.

> Redacción

Este mes de decembro cúmprense dez anos do falecemento de Xosé Cuíña Crespo, o político dezano que deseñou as grandes infraestruturas de Galicia durante os gobernos de Manuel Fraga, dende 1990 ata súa marcha da Xunta en xaneiro de 2003. O seu municipio natal acolleu por este motivo unha homenaxe a Cuíña no Salón Teatro, para lembrar a figura do seu gran valedor. Acompañaron á familia neste acto empresarios, coma José María Farto e Antonio Campo; políticos coma Miguel Santalices, Román Rodríguez, José Crespo, Xesús Palmou, José Luis Baltar, Miguel Domínguez e os alcaldes populares de Vila de Cruces, Rodeiro e Agolada.
O seu fillo, actual alcalde de Lalín, agradeceu ao numeroso público que abarrotou o Salón Teatro a súa presenza. Rafa Cuíña lembrou á xeración do seu pai coma “unha xeración moi importante de empresarios e emprendedores que fixo o Lalín de hoxe”. No seu discurso, o rexedor lalinense describiu ao seu pai coma “un revolucionario e namorado do rural”, e destacou o seu carácter ”visionario” con exemplos da súa xestión coma a autopista AP-53, que permite conectar “Lalín e Noruega por autoestrada”, ademais do interior galego coas autoestradas do mar.

 

Un home de palabra
No acto interveu tamén o arquitecto ourensán Juan Cabanelas, e a modo de peche foi o presidente do Parlamento de Galicia, Miguel Santalices o encargado dea lembranda do seu amigo. “Tres motivos me traen aquí: honrar a un amigo, a un político e a un parlamentario”, dixo Santalices, que destacou de Xosé Cuíña que era “un deputado aguerrido, combativo, valente, encaraba como ninguén os temas a discutir” e loubou a súa “habilidade negociadora” e o feito de que “sempre cumpría coa súa palabra”.
A misa previa a este acto foi oficiada polo bispo de Tui-Vigo, Luis Quinteiro Fiuza, na igrexa parroquial de Lalín, cantada pola Coral Polifónica de Agolada. Íntimo amigo da familia Cuíña, o prelado destacou do homenaxeado a “lealdade coa súa xente e cos seus principios” e as súas “profundas crenzas cristiás”. O párroco Marcos Torres deu as grazas ás persoas que encheron o templo en nome da familia. 

Contacto

Director Xerente: Manuel Núñez Fiuza

Deseño e maquetación: Bearisa
Colaboradores: Iago Mouriño, Bartolo Landiño, Tomás Troitiño,
David Devesa, Luis Lince, Pedro Carrio, Manuel Estévez e González Bearisa.

Administración-Publicidade: Rúa Arenal 1 Entrechán - Lalín.
Tlf.: 986 780 615986 780 615 • Fax: 986 780 615 • Móvil: 625 120 810625 120 810
e-mail: manuelfiuza@gmail.com

 

www.lalinecomarca.es

O Periódico | Lalín e Comarca en redes sociales :