> Agolada |Decembro 2020

Rematan en Ventosa as obras de restauración na “Catedral rural de Galicia” 

O conselleiro de Cultura anunciou o reforzo do compromiso da Xunta coa rehabilitación do patrimonio cultural

> Redacción

O conselleiro de Cultura, Educación e Universidade, Román Rodríguez, anunciou a finais do pasado mes de novembro que a restauración da Igrexa de Ventosa, en Agolada, impulsada pola Xunta de Galicia quedou rematada a comezos deste mes de decembro.

Durante o percorrido, o titular de Cultura da Xunta destacou a importancia dos traballos realizados para “poñer en valor a Catedral rural de Galicia, como así a denominou Filgueira Valverde e dar un paso máis ao impulso do noso patrimonio cultural”, dixo. Neste sentido, Román Rodríguez subliñou o reforzo inversor que o Goberno autonómico levará a cabo o ano próximo coa posta en valor da conservación do patrimonio. No referido á Igrexa de Ventosa, Román Rodríguez celebrou que se se puidesen levar a cabo estes últimos traballos enmarcados nun proxecto para reparar os danos provocados polo paso do tempo por un importe próximo aos 50.000 euros e dá continuidade aos traballos feitos xa no ano 2000 para rehabilitar e poñer en valor este templo.

 

Arranxos en Ventosa

Neste caso actuouse sobre a fachada, as cubertas e a carpintería, e mellorouse o drenaxe perimetral para reparar os danos e evitar que aparezan novas humidades. Creouse un sistema de drenaxe que sirva como complemento ao deseñado no ano 2000 e que permita dar unha mellor cobertura a recollida de augas superficiais. Limpáronse as tellas e saneouse a zona co fin de introducir unha lámina de zinc que impermeabilice a cuberta. Ademais de solucionar os problemas de humidade, estes traballos tamén permitiron manter unhas condicións climáticas estables para unha adecuada conservación tanto do templo como da importante colección de esculturas medievais, murais e elementos decorativos que alberga esta igrexa. Na zona da sancristía, tamén afectada por filtracións de auga, aplicouse unha solución que xa se utilizou en outros bens.

Os traballos na igrexa de Ventosa tamén incluíron diversas intervencións sobre os elementos de carpintería que se viron afectados polo paso do tempo e polo efecto das condicións climatolóxicas, reparáronse as pezas en mellor estado, como as portas principais das fachadas oeste ou norte ou as fiestras, e se cambiaron as que estaban peor conservadas.

Agolada destina máis de 49.000 euros aos colectivos culturais

O Plan de Obras da Deputación permitirá actuacións en Ventosa por máis de 66.000 euros

> Redacción

A xunta de goberno do Concello de Agolada aprobou este mes ás subvencións destinadas a asociacións sen ánimo de lucro. Dende o consistorio apuntan que é o maior investimento realizado ata o momento. Segundo asegura o goberno local, o seu compromiso é axudar a estes colectivos que sufriron “os efectos negativos derivados da pandemia”.

Amigos da Banda de Música Municipal de Agolada recibiu a maior contía, 24.000 euros; 8.000 máis que o ano pasado. A Sociedade Deportiva da localidade acadou 8.000 euros e a Coral 5.000. Agolada Clube Náutico, Asociación Cultural Bico da Balouta, Mar do Deza, da parroquia de Brocos, e a Asociación O Parapeto, de futsal, obtiveron 4.000 euros cada unha. A Asociación Amas de Casa Témporas recibiu 500 euros.

Dende o goberno explicaron que queren reforzar e incrementar as axudas a algunhas das asociacións máis representativas do Concello, como a Banda de Música, á que lle aumentaron a subvención, o mesmo ocorre con Bico da Balouta que obtivo 1.500 euros máis que o ano pasado e o Parapeto que recibiu 2.000 máis para este ano.

 

Obras da Deputación

O Plan de Obras e Servizos da Deputación de Pontevedra correspondente ao Concello de Agolada permitirá que os veciños e veciñas de Ventosa dispoñan de novas beirarrúas e dun parque infantil na parroquia. En concreto, os cartos do organismo provincial permitirán substituír o solado das beirarrúas desta parroquia, para colocar outras novas tendo en conta ademais a accesibilidade para os veciños e veciñas desta parroquia.

Ademais, os cartos da Deputación, máis de 66.000 euros, permitirán a substitución e adaptación de xogos infantís en Laxe, xa que o parque infantil ubicado diante do Centro Social conta con elementos obsoletos e deteriorados. Por iso, estes fondos da Deputación servirán para humanizar este espazo obsoleto dotándoo de xogos infantís e chan conforme as condición legais, substituíndo o actual por un de caucho, ademais de dotar á zona de novos xogos e tobogán.

Estes fondos corresponden ao Plan Concellos da Deputación do ano 2018, cando gobernaba o PP en Agolada.

Contacto

Director Xerente: Manuel Núñez Fiuza

Deseño e maquetación: Bearisa
Colaboradores: Iago Mouriño, Bartolo Landiño, Tomás Troitiño,
David Devesa, Luis Lince, Pedro Carrio, Manuel Estévez e González Bearisa.

Administración-Publicidade: Rúa Arenal 1 Entrechán - Lalín.
Tlf.: 986 780 615986 780 615 • Fax: 986 780 615 • Móvil: 625 120 810625 120 810
e-mail: manuelfiuza@gmail.com

 

www.lalinecomarca.es

O Periódico | Lalín e Comarca en redes sociales :