> Agolada |Febreiro 2020

“Queremos Parcelarias” explica sobre o terreo as súas demandas

A eurodeputada Ana Miranda e o deputado do BNG Mini Rivas visitaron Agolada coa xunta directiva da asociación

> Redacción

A portavoz do BNG en Europa, Ana Miranda, e o deputado do Bloque no Parlamento galego,
Mini Rivas, visitaron este mes de febreiro o municipio de Agolada para coñecer as concentracións parcelarias pendentes. No percorrido que fixeron pola zona criticaron a “nefasta xestión” do goberno galego por non ter executado a totalidade dos fondos FEDER dispoñibles para levar a cabo esta actuación.
Acompañados polos responsables da Asociación “Queremos Parcelarias” en Agolada visitaron as zonas das concentracións de Berredo, Basadroa e das beiras do Ulla para despois, desprazarse a Baíña e a O Sexo.
“É inaceptable que existan fondos europeos sen gastar, xa que se as parcelarias non se rematan como moi tarde en 2023, eses cartos terían que ser devoltos a Bruxelas”, subliñou Ana Miranda
ao longo do percorrido. Para o BNG esta mala execución dos fondos FEDER dispoñibles, “da que temos múltiples exemplos”, demostra a nula aposta do PP polo rural galego.
Durante a visita o deputado Mini Rivas sinalou que o PP “incumpre a súa propia promesa cando prometeu que ía rematar as concentracións parcelarias pendentes”.
Pola súa banda, o presidente de Queremos Parcelarias, Juan Carlos Sánchez Fuciños, destacou que “para a nosa sorpresa, dixéronnos que aínda hai diñeiro dos fondos Feder sen gastar, e que as parcelarias terían que ser iniciadas, como moi tarde en 2021 e finalizadas en 2023, porque senón ese diñeiro terá que ser devolto a Bruxelas, o que deixaría claro que a aposta polo rural e polo campo está a ser nula”, segundo explicou Sánchez Fuciños.
“A concentración parcelaria é fundamental para fixar poboación no rural e superar o excesivo fraccionamento de parcelas”, salientou Mini, quen criticou que o goberno galego non fixera ningún esforzo para poñer a disposición terras para os labradores e a xente nova que quere traballalas.
“Aquí precisamente hai xente emprendedora que si querería traballalas”, apuntou ao respecto.

> Agolada |Agosto 2019

A Festa da Carballeira de Ventosa cumpre 30 anos

A parroquia acolle tamén en setembro a tradicional Festa do Faro.

> Redacción

O sábado 3 de agosto a parroquia agoladense de Ventosa celebra a Festa da Carballeira, este ano cumpre a súa edición número XXX. Para a celebración desta festa a comisión programou unha sesión vermú a cargo da Pequena Banda e a Banda Xuvenil de Agolada, que serán os encargados de abrir o programa festivo da xornada.
Para o xantar a mediodía haberá servizo de mesas, polbo e pinchos variados de queixo. E logo da comida a tarde estará amenizada coa tradicional verbena a cargo da charanga Ardores e o Grupo Tentación.


Festa do Faro
Xa no mes de setembro a parroquia de Ventosa volverá a ser o centro das celebracións no concello de Agolada, xa que os días 8 e 9 celebrarán as Festas do Faro, tamén cunha longa tradición de máis de 40 anos. O día 8 de setembro actuará a Banda de Música de Agolada e as orquestras Panamá e Charleston. Ao día seguinte, o 9 de setembro, a música correrá a cargo da Banda de Merza e da Orquestra Cinema. Os dous días haberá ás 12 do mediodía misa cantada polo coro da parroquia e a continuación terá lugar a sesión vermú no campo da romaría.

> Agolada |Xullo 2019

Agolada estrea alcalde, Luís Calvo Miguélez

O PAYJ obtivo maioría absoluta nas eleccións con 7 concelleiros fronte aos 4 do PP.

> Redacción

O Concello de Agolada estrea alcalde logo de preto de 40 anos de reinado do PP nos gobernos municipais. O pasado 26 de maio o Partido Anticorrupción y Justicia (PAYJ) deulle a volta ao panorama político agoladense, derrotando aos populares de Ramiro Varela e acadando a maioría absoluta que o pasado 15 de xuño convirteu ao seu candidato, Luís Calvo Miguélez, no novo alcalde de Agolada co respaldo de 7 concelleiros fronte aos 4 acadados polo PP.
A mesma noite electoral, as ansias de cambio político chegaron á Praza do Concello, onde varias ducias de simpatizantes do PAYJ celebraban xa a súa aplastante victoria diante do PP. A expectación mantívose ata o 15 de xuño, data fixada para o pleno de investidura, e o salón de sesión do Concello quedou pequeno para acoller a tódolos asistentes ao insólito acto que confirmou o cambio de rumbo na política local.
Sen dúbida o alcalde saínte, Ramiro Varela, foi o gran ausente e protagonista da xornada. Logo de 14 anos á fronte do Concello de Agolada, días antes da sesión plenaria renunciou á súa acta de concelleiro non acudiu polo tanto á investidura do que xa é o seu sucesor á fronte da Alcaldía. Luis Calvo Miguélez recibiu os votos maioritarios do seu grupo no concello e o bastón de mando de Agolada para os vindeiros catro anos.

 

“Humildade”
Logo da investidura, o novo alcalde apelou á “humildade” coma ferramenta para mudar as políticas que o PP exerceu dende fai décadas en Agolada. O novo rexedor amosou ademais o seu talante dialogante ao concederlle ao novo voceiro do PP, Santiago Castro Fernández, a palabra para dirixirse ao numeroso público asistente ao pleno.
Calvo Miguélez asegurou que no seu mandato van mudar moitas cousas en Agolada, e referiuse especialmente á atención do Concello aos veciños e veciñas, que recibiron a promesa do novo rexedor con múltiples ovacións ao longo da celebración da súa investidura.

Contacto

Director Xerente: Manuel Núñez Fiuza

Deseño e maquetación: Bearisa
Colaboradores: Iago Mouriño, Bartolo Landiño, Tomás Troitiño,
David Devesa, Luis Lince, Pedro Carrio, Manuel Estévez e González Bearisa.

Administración-Publicidade: Rúa Arenal 1 Entrechán - Lalín.
Tlf.: 986 780 615986 780 615 • Fax: 986 780 615 • Móvil: 625 120 810625 120 810
e-mail: manuelfiuza@gmail.com

 

www.lalinecomarca.es

O Periódico | Lalín e Comarca en redes sociales :