> Agolada |Abril 2019

Concello e veciños chegan a un acordo para amañar a escola de Brocos

A Deputación investirá preto de 26.000 euros nas obras.

> Redacción

A antiga escola de Brocos levou mal os últimos temporais e o seu estado empeorou nos últimos meses ata o risco de derrubo. Os veciños e veciñas, preocupados polo mal estado deste inmoble, acudiron ao Concello de Agolada para solicitar a súa rehabilitación. O edificio é propiedade da veciñanza, pero finalmente Concello e veciños chegaron a un acordo para actuar no inmoble e asinaron a cesión da escola ao Concello por un período de cinco anos.
O goberno local puxo en marcha os trámites previos a esta actuación e destinará pero de 26.000 euros chegados dende o Plan Concellos da Deputación de Pontevedra, destinados á recuperación deste inmoble. O acordo beneficia a ambas partes e os veciños e veciñas de Brocos amosaron a súa satisfacción co mesmo. Consideran que a pesares dos reparos iniciais en cederlle o inmoble ao Concello, esta foi “a mellor opción” para que a escola non acabase en ruinas.
Agora agardan polas obras de rehabilitación e na veciñanza hai xa algunhas ideas para darlle vida ao inmoble unha vez rehabilitado. O obxectivo, segundo explican, é organizar nas dependencias actividades de dinamización veciñal diarias, pero tamén barallan a posibilidade de levar a cabo charlas, actividades culturais, iniciativas para os mozos e mozas e mesmo para os gandeiros da zona.


Escola de Brocos
Esta Escola de Brocos é unha das coñecidas coma “Escolas dos Indianos”, porque se fixo grazas aos veciños emigrados a Bos Aires. Dado o seu estado actual, e logo de recibir o visto bo da Deputación, o Concello de Agolada levará a cabo obras por importe de 25.931 euros. Entre as actuacións previstas está o arranxo dos tellados, da parte baixa e da parte alta do inmoble. Ademais substituirán a actual carpintería de madeira por outra de aluminio, recintarán as fachadas e pintarán os interiores. 

> Agolada |Marzo 2019

Medio Rural apraza a setembro a solución ás parcelarias de Agolada

O conselleiro e técnicos visitaron a comezos deste mes as zonas afectadas.

> Redacción

A Consellería de Medio Rural aprazou ata o vindeiro mes de setembro a solución aos procesos de concentración parcelaria pendentes e demandados polos veciños e veciñas en Agolada. O director xeral de Desenvolvemento Rural, Miguel Ángel Pérez Dubois, e o conselleiro, José González Vázquez, visitaron o pasado 1 de marzo Agolada acompañados polos técnicos do departamento que levan a cabo estes procesos. Diante de máis dun cento de veciños e veciñas afectados, que acudiron ao Auditorio municipal ao encontro cos técnicos de Medio Rural, Pérez Dubois comprometeuse a visitar de novo Agolada en setembro cando a Xunta aprobe a nova lei e os novos instrumentos de ordenación de terras, actualmente en tramitación no Parlamento.
A Asociación Queremos Parcelarias en Agolada lembroulle tanto ao conselleiro coma ao director xeral que as 8 concentracións pendentes na zona suporían a creación de alomenos 56 postos de traballo en 14 explotacións agrarias que están pendentes destas parcelarias para a súa implantación en Agolada. Pérez Dubois pediulle á Asociación o dossier sobre estes proxectos para estudar “caso por caso” unha posible solución ás concentracións nestas parroquias.
Pérez Dubois explicou que a nova lei que Medio Rural está a tramitar no Parlamento ademais das concentracións parcelarias clásicas contemplará outras figuras de ordenación coma as concentracións parcelarias privadas entre particulares, “ que son máis rápidas e máis baratas”.


Visita do conselleiro
Logo deste encontro cos técnicos, xa pola tarde, chegou a Agolada o conselleiro do Medio Rural, que insistiu nos argumentos ofrecidos na reunión da mañá polo director xeral. De tódolos xeitos, González Vázquez mantivo un encontro coa Asociación Queremos Parcelarias en Agolada e posteriormente visitou xunto co alcalde e a directiva da Asociación algunhas das zonas das parroquias que teñen demandado a Medio Rural as parcelarias. 

> Agolada |Febreiro 2019

Agolada dispón este ano de 528.000 euros do Plan Concellos

Esta cifra é un 2,95% máis ca do exercicio anterior.

> Redacción

A Deputación de Pontevedra deulle este mesmo mes de febreiro o visto bo a unha partida de 248.573 euros para o Concello de Agolada, estes cartos están destinados a financiar a mellora de camiños de titularidade municipal con firme de asfalto e formigón. Estes fondos, contemplados dentro do Plan Concellos do organismo provincial, acadarán este ano 2019 en Agolada un total de 528.044 euros, o que supón un 2,95% máis dos que o Concello de Agolada recibiu no exercicio anterior. Con estes preto de 250.000 euros, o Concello de Agolada poderá actuar nos camiños de Marcelín, Cacharenzo, Órrea-Vilariño, Órrea-Cima da Vila, A Baíña-Brandariz, Sa a O Sexo, Vilariño-Vilariño, Vilariño-Velpellós, Santa Comba-Quintela, Carmoega-Santandré, Brántega-San Lourenzo, Agolada 1, Agolada 2, Gurgueiro e Brocos.
Estas actuacións en camiños municipais contemplan obras no firme estas infraestruturas coa incorporación de novas capas, ademais procederán a arranxar baches, aplicarán tratamentos superficiais e mesmo limparán e perfilarán cunetas para a axeitada recollida de augas.

 

Fondos de Agader
Ademais deste investimento da Deputación no municipio, Agolada tamén recibirá máis de 72.000 euros de Agader para este exercicio e o que vén dentro do Plan de Mellora de Camiños Municipais 2019-2020 posto en marcha por este organismo da Xunta de Galicia. En toda a Comarca do Deza, a Axencia Galega de Desenvolvemento Rural (Agader) investirá dentro deste plan máis de 439.000 euros.
Lalín recibirá nestas anualidades máis de 100.000 euros, para Silleda serán preto de 84.000 euros, no caso de Vila de Cruces o importe acada os 66.000 euros, e en Rodeiro o orzamento supera os 73.000 euros. Completa os investimentos deste plan no Deza os 72.810 euros para Agolada e outros 41.000 euros para o Concello de Dozón. O acordo foi publicado a finais do pasado mes de xaneiro no Diario Oficial de Galicia. 

> Agolada |Xaneiro 2019

O conselleiro de Medio Rural volta en febreiro a Agolada polas parcelarias 

O alcalde comprometeuse con Queremos Parcelarias a facer realidade as concentracións paralizadas.

> Redacción

Un numeroso grupo de membros da Asociación Queremos Parcelarias en Agolada mantivo o pasado 22 de xaneiro un encontro co alcalde, Ramiro Varela, no que o rexedor comprometeuse a poñer todo da súa parte para sacar adiante o maior número posible das oito concentracións parcelarias iniciadas no municipio e paralizadas. Para iso, o alcalde anuncioulles aos membros de Queremos Parcelarias a visita a comezos do vindeiro mes de febreiro do conselleiro do Medio Rural, que voltará como prometeu fai dous meses cos seus técnicos para visitar os terreos afectados por estes procesos de concentración parcelaria.
Esta nova visita a Agolada do conselleiro está pendente de confirmación de data por parte do seu gabinete, aínda que en principio a data máis probable será o vindeiro 1 de febreiro. O alcalde e Queremos Parcelarias recibirán ao titular de Medio Rural e aos técnicos da Consellería no Auditorio Municipal, un acto ao que poderán asistir todos os veciños e veciñas afectados polas parcelarias que o desexen. Ademais deste encontro, o Concello de Agolada está a artellar o percorrido que realizará despois co conselleiro e os técnicos ás parroquias afectadas. 

 

Queremos Parcelarias
O presidente da Asociación Queremos Parcelarias en Agolada, Juan Carlos Sánchez Fuciños, destacou ao remate deste encontro co alcalde, que corre presa retomar os trámites porque o estudo de impacto ambiental da parcelaria de Berredo-Basadre-Eidián e Ramil caduca o vindeiro mes de novembro, e o de Agra-Seixo-Val de Sangorza e A Baíña caducará no 2020. 
Fuciños explicou que xa que este trámite está feito e xa se fixeron as medicións, “é case unha obriga moral” seguir adiante para non perder ese 30% de investimento feito, e por iso insistiu en que o ideal sería decretar estas parcelarias e poñer en marcha a revisión da lista de propietarios para reclamacións, a valoración das superficies e chegar así ás bases provisionais. 
A estas oito parcelarias, organizadas en dous núcleos, súmase un terceiro proceso de concentración nas parroquias de Brocos e Sexto, que habería que poñer en marcha dende cero.

Contacto

Director Xerente: Manuel Núñez Fiuza

Deseño e maquetación: Bearisa
Colaboradores: Iago Mouriño, Bartolo Landiño, Tomás Troitiño,
David Devesa, Luis Lince, Pedro Carrio, Manuel Estévez e González Bearisa.

Administración-Publicidade: Rúa Arenal 1 Entrechán - Lalín.
Tlf.: 986 780 615986 780 615 • Fax: 986 780 615 • Móvil: 625 120 810625 120 810
e-mail: manuelfiuza@gmail.com

 

www.lalinecomarca.es

O Periódico | Lalín e Comarca en redes sociales :