> Agolada |Outubro 2018

Agolada destina 100.000 euros á adaptación da residencia

O Concello traballa nas bases para sacar a licitación os traballos.

> Redacción

O goberno de Agolada está elaborando as bases para sacar a licitación as obras de adaptación da residencia de maiores coa que conta o municipio, que está ubicada no edificio da terceira idade da localidade. O alcalde de Agolada, Ramiro Varela, asegurou que o obxectivo do seu goberno é que unha partes destes traballos sexan adxudicados este mesmo ano.
O proxecto ten un orzamento duns 100.000 euros que serán financiados en gran parte a través do GDR Terra de Pontevedra Norte. Ao Concello corresponderalle aportar uns 24.000 euros que financiará con cargo ao Plan Concellos da Deputación
Segundo explicou o alcalde, os traballos centraranse na segunda planta do edificio, onde se ubica unha residencia de maiores que nunca chegou a poñerse en marcha. As labores neste andar consistirán na adaptación das instalacións á normativa actual, ademais da colocación dunha nova carpintería de aluminio e un tellado.

 

Segunda fase e centro de saúde
Dende o Concello explican ademais que nunha segunda fase destes traballos procederase á reforma da primeira planta deste edificio, onde actualmente está ubicado o salón de actos, e outras actuacións na cafetería e a cociña, que no futuro pasarán a ser dependencias do propio centro.
Unha vez acondicionado, este centro terá capacidade para 15 ou 20 prazas, e o goberno local buscará un xestor do mesmo, ben na Xunta de Galicia ou no ámbito privado. Ademais o Concello ten xa o compromiso da Xunta de que financiará o 50 % do orzamento das obras de mellora e remozado do centro de saúde que suporán rematar coa humidades que fai tempo denuncian os traballadores destas dependencias. O Concello de Agolada leva máis dun ano en lista de agarda para conseguir que estas instalacións sanitarias pasen a depender directamente da Consellería de Sanidade.

> Agolada |Agosto 2018

Agolada celebra este mes a súa XXII Mostra de Artesanía

As festas patronais de Agolada, un éxito a pesares da chuvia.

> Redacción

Os Pendellos acollerán do 10 al 12 de agosto a XXII edición da Mostra de Artesanía de Agolada. O programa deste ano acolle distintas exposicións, obradoiros e actuacións musicais, ademais da III Festa do Becerro Leitón, a Romaría Medieval e o III Certame de Bandas de Música Marcos Areán. A feira comezará o día 10 coa inauguración e unha batukada e comezarán os obradoiros centrados na cerámica, o pementón o queixo e o reciclaxe de tarros. Xa pola tarde os máis pequenos desfrutarán do espectáculo de Al y Tana, e ás dez da noite haberá concerto de Némesis.
O día 11 comezará cunha andaina polos Sobreirais do Arnego e celebrarase a III Festa do Becerro Leitón. Durante a xornada haberá distintas actividades de animación infantil e a romaría medieval que rematará coa degustación de torresmos, pan de millo, viño e queimada, animada pola música de Bico da Balouta. Xa o día 12 celebrarase no concello a feira tradicional nesa data e distintos obradoiros.
Este ano a mostra inclúe a celebración do III Certame de Bandas de Música Marcos Areán, coa participación das agrupacións de Sanxenxo, Beade e Agolada.

 

Cans de Caza
Complementando a Mostra de Artesanía o recinto feiral de Agolada acollerá o vindeiro 12 de agosto a terceira edición da Exposición de Cans de Caza. A organización repartirá sete trofeos: ao mellor can da feira; á mellor xaula; á mellor rehala; á mellor camada; ao mellor can de caza maior así coma de pluma e caza menor. 
Todos, salvo o mellor can da exposición, levarán ademais un saco de pienso. Tamén haberá un recoñecemento para o mellor exemplar de cada raza. 

> Agolada |Xullo 2018

Chega a VI edición do “Corazón de Artesanía”

As festas patronais de Agolada, un éxito a pesares da chuvia.

> Redacción

Durante tres días, do 6 ao 8 de xullo, o Corazón da Artesanía en Agolada, que o ano pasado atraeu a máis de 9.000 persoas, contará coa participación de 52 profesionais de Artesanía de Galicia de 26 oficios diferentes como a xoiería e a ourivería, a carpintería de ribeira, a cestería, os tecidos de baixo lizo, a marroquinería, a bixutería, os instrumentos musicais, a olería, a tellería, a cerámica, a forxa, as colareiras, a elaboración de zocos, a talla de madeira, a ebanistería, o encaixe, os tapices, os xoguetes, a torneiría de madeira, a ilustración, as maquetas, a zapatería, a elaboración de figuras de pan e a manipulación de papel. 
Ademais dos postos de exposición e venda, durante os tres días que dura o evento os visitantes poderán ver demostracións de oficios tradicionais e participar nos obradoiros abertos para todos os públicos centrados na cestería, no manipulado de papel, a elaboración de calzado, entre outros. 
O grupo O Sonoro Maxín será o encargado de pechar o programa do venres 6 de xullo e a banda de jazz compostelá Sumrrá protagonizará a noite do sábado 7. O domingo será a quenda de De vacas, que actuarán en sesión vermú, ás 13:00 horas. 
O sábado tamén ás 13:00 terá lugar o espectáculo de música e teatro As fillas bravas, da compañía Chévere. A música tradicional estará representada pola Asociación Cultural Xacarandaina, da Coruña, que actuará o domingo ás 19:00 horas, así como por Bico da Balouta, de Agolada, que se encargará dun pasacalle o sábado a partir das 18:00 horas. 


Festas patronais
Agolada celebrou tamén a finais de xuño as festas patronais na honra de San Pedro e San Pablo, un evento que foi un ano máis todo un éxito de asistencia. A pesares da forte chuvia que caeu durante a fin de semana a modo de chaparróns, o tempo respectou tanto as actuacións das bandas que participaron este ano nos festexos coma os pases das catro orquestras que congregaron arredor da Praza do Concello a numeroso público.

Contacto

Director Xerente: Manuel Núñez Fiuza

Deseño e maquetación: Bearisa
Colaboradores: Iago Mouriño, Bartolo Landiño, Tomás Troitiño,
David Devesa, Luis Lince, Pedro Carrio, Manuel Estévez e González Bearisa.

Administración-Publicidade: Rúa Arenal 1 Entrechán - Lalín.
Tlf.: 986 780 615986 780 615 • Fax: 986 780 615 • Móvil: 625 120 810625 120 810
e-mail: manuelfiuza@gmail.com

 

www.lalinecomarca.es

O Periódico | Lalín e Comarca en redes sociales :