> Agolada |Xaneiro 2021

A Xunta aumenta en Agolada un 10% as horas do SAF

O concello poderá prestar preto de 30.000 horas deste servizo

> Redacción

A Consellería de Política Social vén de aumentar o investimento no Servizo de Axuda no Fogar (SAF) para a atención de persoas dependentes en toda a comunidade, a partires deste mesmo ano, en 10 millóns de euros. Ao abeiro desta medida, os concellos dezás de Silleda e Agolada van dispoñer de 9.612 horas máis en cada exercicio para esta prestación.

O Concello de Agolada está a prestar na actualidade 26.880 horas deste servizo financiado pola Xunta e vai ver reforzada esta atención con 2.784 horas máis concedidas polo Goberno galego. Deste xeito, e grazas a esta alza do 10,3%, poderá alcanzar as 29.664 horas por exercicio.

Pola súa banda, o Concello de Silleda vai ser un dos grandes beneficiarios da alza do orzamento do SAF para dependentes de toda Galicia no presente exercicio –que chegará ata os 83,6 millóns de euros-, xa que vai recibir un dos maiores incrementos desta prestación en toda a provincia, ao contar con 6.828 horas máis, un ascenso do 15,9%. Deste xeito, o municipio trasdezá pasará das 42.900 horas de teleasistencia para dependentes na actualidade, a alcanzar as 49.728 horas.

A delegada territorial da Xunta en Pontevedra, Luisa Piñeiro, informou desta concesión nunha reunión telemática celebrada coas responsables e traballadoras de Servizos Sociais de ambos municipios. Neste contacto explicoulles que este incremento do SAF determinouse de oficio por parte dos servizos técnicos da consellería aplicando o criterio da lista de agarda de cada un dos municipios para poder atender a máis usuarios, especialmente na actual situación polos efectos sociais da crise sanitaria da Covid-19.

Xavier Lemos, o pintor dedicado plenamente a Agolada durante o confinamento

Realizou un intenso traballo plástico, fundamentado nas pegadas do Mestre Mateo en Ventosa

> Manuel Estévez

Ao pintor vigués Xavier Lemos, o confinamento pillóuno plenamente ocupado pictóricamente, involucrado no proxecto “Detrás das pegadas do Mestre Mateo”, xa rematado. Cadros de grande formato, para impulsar a riqueza do templo de San Xulián de Ventosa, en terras dezanas de Agolada, coñecida como a “Catedral do Románico de Galiza”, que foi así como a bautizou o profesor Filgueira Valverde, quen entre outras ocupacións chegou á dirección do Museo de Pontevedra, institución que acolle tres pezas pocedentes do Santuario de Agolada, “San Gregorio”, “Santa Bárbara” e un “Ánxel adorando”.

No interior da Igrexa, levantada nas faldras do Monte Farelo, atesora pezas que datan do século XII, autoría que se atribuen ao Mestre Mateo e seus discípulos, canteiros da bisbarra que traballaron en Carboeiro, onde tiñan un obradoiro. Unha intervención de bo agrado para o Bispo de Lugo, a onde pertence a parroquia de Ventosa, desde o punto de vista de Alfonso Carrasco Rouco.

 

Exposición

“Detrás das pegadas do Mestre Mateo” que é así como se denomina o proxecto, existen once cadros, a través dos que se dará a coñecer mediante exposicións por salas e espazos expositivos no Camino Francés, desde Roncesvalles ata Santiago de Compostela, estando axendadas diversas mostras en Sahagún, León, Carrión dos Condes (Palencia) e Galicia, previstas para este ano, que aínda non se poideron materializar por mor da pandemia.

Entre os cadros cabe destacar o Sepulcro de Lope de Ventosa, esculpido pola Escola do Mestre Mateo e trasladado as telas polo pintor de Vigo e mesmo o Pórtico da Gloria.

De certo, unha época frutífera, plasmando igualmente neste tempo dous retratos importantes da traxectoria, o Arzobispo de Belcastro, o galego de Sarreaus (Ourense), Xosé Rodríguez Carballo e o Papa Francisco, que xa forman parte das dependencias do Vaticano e ainda houbo horas de lecer para dedicarlle a inseparable guitarra, lembrando os anos da xuventude, como integrante dos grupos de música pop de Vigo, “Nocturnos”, “Potes” e “Temples”. 

Contacto

Director Xerente: Manuel Núñez Fiuza

Deseño e maquetación: Bearisa
Colaboradores: Iago Mouriño, Bartolo Landiño, Tomás Troitiño,
David Devesa, Luis Lince, Pedro Carrio, Manuel Estévez e González Bearisa.

Administración-Publicidade: Rúa Arenal 1 Entrechán - Lalín.
Tlf.: 986 780 615986 780 615 • Fax: 986 780 615 • Móvil: 625 120 810625 120 810
e-mail: manuelfiuza@gmail.com

 

www.lalinecomarca.es

O Periódico | Lalín e Comarca en redes sociales :